پینٹاگون نے ’غیر شناخت شدہ فضائی مظاہر‘ سے متعلق درجنوں خفیہ فائلیں جاری کیں، جن میں پراسرار ویڈیوز، اپالو مشنز کی تصاویر اور فوجی رپورٹس شامل ہیں۔
اگرچہ بعض لوگ انہیں خلائی مخلوقات کا ثبوت قرار دے رہے ہیں مگر ماہرین کا کہنا ہے کہ ان کی زیادہ تر سائنسی وضاحت ممکن ہے۔
لیکن سب سے بڑا سوال یہ ہے کہ ان خفیہ فائلز کا انکشاف ابھی کیوں کیا گیا؟
گہری تاریک رات تھی۔
سن 2013 کی ایک گرم موسمِ گرما کی رات میں مشرقِ وسطیٰ کے کسی علاقے میں امریکی فوج کا ایک فضائی عسکری پلیٹ فارم اپنے حرارتی سینسرز کے ذریعے آسمان کی نگرانی کر رہا تھا کہ اچانک اسکرین پر ایک ایسی شے نمودار ہوئی، اس جیسی چیز وہاں موجود فوجیوں نے پہلے کبھی نہیں دیکھی تھی۔
وہ شے 8 کونوں والے ستارے جیسی دکھائی دے رہی تھی، نہایت روشن، تاریکی میں معلق، گویا خلا سے اچانک ظاہر ہوئی ہو۔
وہ اسکرین کے ایک کنارے سے دوسرے کنارے تک عجیب انداز میں حرکت کر رہی تھی اور ایسا محسوس ہو رہا تھا جیسے وہ طبیعیات کے معلوم قوانین کی پابند نہ ہو۔
مزید پڑھیں
اسی لمحے نگرانی کے کمرے میں بے چینی پھیل گئی۔
فون بجنے لگے اور سوالات اٹھنے لگے کہ آخر یہ شے کیا ہے؟ کیا یہ چین یا روس کی کوئی خفیہ فوجی ٹیکنالوجی ہے یا واقعی خلا سے آنے والی کوئی چیز؟
یہ واقعہ، جسے حال ہی میں منظرِ عام پر لایا گیا، ان ’غیر شناخت شدہ فضائی مظاہر‘ UAPs کے گرد جاری عالمی بحث کی عکاسی کرتا ہے، جن
کی فائلیں امریکی پینٹاگون نے 8 مئی 2026 کو دوبارہ کھولیں۔
پینٹاگون نے ایک خصوصی سرکاری ویب سائٹ کے ذریعے ان مظاہر سے متعلق نئی فائلوں کی پہلی کھیپ جاری کرنے کا اعلان کیا اور واضح کیا کہ آئندہ مزید فائلیں بھی مرحلہ وار جاری کی جائیں گی۔
پہلی کھیپ میں تقریباً 160 فائلیں شامل تھیں، جن میں تصاویر، ویڈیوز، فوجی و سفارتی رپورٹس، تاریخی دستاویزات اور گواہیوں کا ریکارڈ شامل تھا۔
ان مواد میں 1940 کی دہائی سے لے کر آج تک کے مختلف واقعات کا احاطہ کیا گیا۔
سب سے زیادہ توجہ اپالو مشنز کی تصاویر نے حاصل کی، جن میں امریکی خلا باز Buzz Aldrin کے وہ بیانات بھی شامل تھے جن میں انہوں نے ’اپالو 11‘ مشن کے بعد چاند کے قریب ایک عجیب روشن شے دیکھنے کا ذکر کیا تھا۔
مشرقِ وسطیٰ میں
ریکارڈ کی گئی
پراسرار 8 کونوں
والی شے نے
توجہ حاصل کرلی
اسی طرح ’اپالو 17‘ مشن کی تصاویر میں 3 روشن نقاط مثلثی انداز میں دکھائی دیتے ہیں، جیسے کوئی فوجی فارمیشن ہو۔
مزید یہ کہ مشرقِ وسطیٰ، مشرقی ایشیا اور یورپ کے اوپر ریکارڈ کی گئی پراسرار ویڈیوز بھی جاری کی گئیں۔
تاہم رائٹرز اور ایسوسی ایٹڈ پریس کے مطابق ان میں سے بہت سا مواد پہلے بھی مختلف شکلوں میں دستیاب تھا لیکن اب انہیں ایک جگہ جمع کرکے نسبتاً کم سنسر شدہ صورت میں پیش کیا گیا۔
’غیر شناخت شدہ مظاہر‘ کا مطلب یہ نہیں کہ یہ لازماً خلائی مخلوقات ہیں۔
’غیر شناخت شدہ مظاہر‘ سے مراد ایسی چیزیں یا حرکات ہیں جنہیں فوری طور پر دستیاب معلومات سے سمجھنا ممکن نہ ہو۔
یہ اجسام ہوائی جہاز، سیٹلائٹس، موسمی غبارے، روشنی کے انعکاسات، موسمیاتی مظاہر یا حتیٰ کہ کیمروں اور ریڈارز کی تکنیکی خرابیاں بھی ہو سکتے ہیں۔
موجودہ دہائی میں ان مشاہدات میں نمایاں اضافہ ہوا ہے۔
پینٹاگون نے کئی ویڈیوز کی صداقت تسلیم کی مگر کبھی یہ نہیں کہا کہ یہ خلائی مخلوقات کی موجودگی کا ثبوت ہیں۔
اس کے باوجود ان ویڈیوز نے انٹرنیٹ پر سنسنی پھیلا دی۔
ہر دھندلی ویڈیو اور ہر پراسرار روشنی بہت سے لوگوں کے نزدیک خلائی مخلوقات کی موجودگی کا ثبوت بن جاتی ہے، اور اسی سے سازشی نظریات جنم لیتے ہیں۔
8 کونوں والے جسم کی ویڈیو کو ہی مثال کے طور پر دیکھیے۔
پہلی نظر میں یہ واقعی کسی غیر زمینی ٹیکنالوجی جیسی لگتی ہے، مگر حقیقت میں یہ عام تصویر نہیں بلکہ حرارتی Infrared تصویر تھی۔
یعنی جو کچھ اسکرین پر نظر آ رہا تھا وہ جسم کی اصل شکل نہیں بلکہ اس سے خارج ہونے والی حرارت یا توانائی کا نقش تھا۔
اس قسم کی تصاویر میں سیاہ اور روشن حصے الٹ بھی ہو سکتے ہیں۔
ممکن ہے جو چیز تاریک نظر آ رہی ہو، وہ دراصل سب سے زیادہ گرم حصہ ہو۔
مزید یہ کہ کیمرہ اس جسم سے دسیوں کلومیٹر دور تھا، اور اس فاصلے پر تصویری تفصیلات دھندلی ہو جانا معمول کی بات ہے۔
مزید پڑھیں
ویڈیو میں دکھائی دینے والی حرکت صرف اس جسم کی نہیں تھی بلکہ کیمرہ لے جانے والے طیارے، زاویۂ فلم بندی اور کیمرے کی حرکت کا بھی اثر شامل تھا۔
ان تمام عوامل کو سامنے رکھا جائے تو منظر اتنا پراسرار نہیں رہتا جتنا
پہلی نظر میں محسوس ہوتا ہے۔ ماہرین کے مطابق یہ کسی جدید ڈرون یا فوجی طیارے کے انجن کی حرارتی جھلک بھی ہو سکتی ہے۔
ستمبر 2023 میں ناسا کے ایک آزاد سائنسی پینل نے رپورٹ جاری کی جس میں کہا گیا کہ زیادہ تر غیر شناخت شدہ مظاہر کا تعلق خلائی مخلوقات سے نہیں۔
رپورٹ کے مطابق بیشتر معاملات میں مسئلہ ناقص معلومات، دھندلی تصاویر یا سیاق و سباق کی کمی تھا۔
اسی طرح پینٹاگون کی 2021 کی رپورٹ، جس میں 2004 سے 2021 تک کے 144 واقعات کا جائزہ لیا گیا، کسی بھی خلائی مخلوق کے ثبوت تک نہیں پہنچ سکی۔
امریکی فلکیاتی طبیعیات دان ایڈم فرینک کا کہنا ہے کہ یہ مواد عوام کی توجہ ضرور حاصل کرتا ہے، مگر غیر معمولی دعووں کے لیے غیر معمولی ثبوت درکار ہوتے ہیں۔
پینٹاگون کے دفتر AARO کے سابق سربراہ شان کرک پیٹرک نے بھی خبردار کیا کہ ان ویڈیوز کی پراسراریت کا بڑا حصہ تصویر برداری کے طریقہ کار سے جڑا ہوتا ہے۔
اسی طرح محقق مِک ویسٹ کے مطابق ان ویڈیوز میں ’پراسرار‘ دراصل کم معیار کی تصاویر اور محدود معلومات کا نتیجہ ہے۔
دوسری جانب بل ڈائمنڈ کا کہنا ہے کہ کائنات میں زندگی کا امکان ضرور موجود ہے مگر اس کا مطلب یہ نہیں کہ وہ مخلوقات زمین پر آ چکی ہیں۔
دلچسپ بات یہ ہے کہ سی آئی اے کی بعض رپورٹس کے مطابق امریکی فوج نے ماضی میں بعض UFO کہانیوں کو پھیلنے دیا تاکہ خفیہ فوجی پروگراموں اور جاسوس طیاروں کو چھپایا جا سکے۔
2024 میں پینٹاگون نے بھی اعتراف کیا کہ 1950 اور 1960 کی دہائی میں UFO مشاہدات کی بڑی وجہ امریکی جاسوس طیاروں اور خفیہ فضائی تجربات کی آزمائشیں تھیں۔
رپورٹ کے مطابق فلموں، ٹی وی پروگراموں، سوشل میڈیا اور انٹرنیٹ نے بھی خلائی مخلوقات سے متعلق عوامی تخیل کو مزید تقویت دی۔
یہ سوال اب بھی موجود ہے کہ ان فائلوں کو اس وقت کیوں جاری کیا گیا؟
امریکی حکومت کہتی ہے کہ مقصد شفافیت ہے مگر ناقدین کا خیال ہے کہ یہ عوام کی توجہ حساس سیاسی معاملات سے ہٹانے کی کوشش بھی ہو سکتی ہے، خصوصاً جیفری ایپسٹین کیس اور ایران کے ساتھ کشیدگی سے۔
رائٹرز کے مطابق بعض ناقدین نے ان فائلوں کو ’چمکتی چیز‘ قرار دیا جو عوام کی توجہ اصل مسائل سے ہٹانے کے لیے استعمال کی جا رہی ہے۔
یہاں تک کہ معروف پوڈکاسٹر جو روگن نے بھی ان فائلوں کے اجرا کے وقت کو مشکوک قرار دیا۔
آخر میں، بیشتر ماہرین اس بات پر متفق ہیں کہ اگرچہ ان مظاہر کے بارے میں تجسس فطری ہے، مگر ہر پراسرار منظر کو خلائی مخلوق کا ثبوت سمجھ لینا سائنسی طرزِ فکر نہیں۔
اب تک کوئی ایسا ناقابلِ تردید ثبوت موجود نہیں جو یہ ثابت کرے کہ زمین پر کسی غیر زمینی تہذیب نے قدم رکھا ہو تاہم یہ بحث آج بھی زندہ ہے اور شاید آنے والے برسوں میں مزید فائلیں اور تحقیقات اس موضوع کو مزید گرمائیں گی۔