امریکی صدر ڈونلڈ ٹرمپ نے دعویٰ کیا ہے کہ ایران کے معاملے پر اسرائیلی وزیر اعظم بنیامین نیتن یاہو کے ساتھ مکمل ہم آہنگی موجود ہے تاہم امریکی میڈیا رپورٹس دونوں رہنماؤں کے درمیان اختلافات کی نشاندہی کر رہی ہیں۔
دوسری جانب ایران نے واضح کر دیا ہے کہ اگر دوبارہ حملہ ہوا تو جنگ مشرق وسطیٰ سے آگے تک پھیل سکتی ہے، جبکہ پاکستان کی ثالثی میں مذاکرات بھی جاری ہیں۔
امریکی صدر ڈونلڈ ٹرمپ نے آج بدھ کے روز کہا ہے کہ ایران کے معاملے پر ان کی اسرائیلی وزیرِاعظم بنیامین نیتن یاہو کے ساتھ مکمل ہم آہنگی موجود ہے تاہم ایک رپورٹ میں دونوں رہنماؤں کے درمیان اختلافات کا بھی انکشاف کیا گیا ہے۔
دوسری جانب ایرانی پارلیمنٹ کے اسپیکر محمد باقر قالیباف نے اعلان کیا ہے کہ ایرانی فوج جنگ کے ایک نئے مرحلے کے لیے تیار ہے۔
اسرائیلی میڈیا کے مطابق امریکی صدر اور اسرائیلی وزیرِاعظم کے درمیان گزشتہ رات ایک طویل ٹیلیفونک رابطہ ہوا، جسے ’فیصلہ کن‘ قرار دیا گیا۔
مزید پڑھیں
امریکی ویب سائٹ ایکسیوس نے ایک امریکی ذریعے کے حوالے سے بتایا کہ ٹرمپ نے نیتن یاہو کو آگاہ کیا کہ ثالثی کرنے والے فریق امریکہ اور ایران کے درمیان Letter of Intent تیار کر رہے ہیں، جس پر دستخط کے بعد جنگ کے باضابطہ خاتمے اور 30 روزہ مذاکراتی عمل کا آغاز ہوگا۔
ان مذاکرات میں ایرانی جوہری پروگرام اور آبنائے ہرمز کھولنے کے معاملات شامل ہوں گے۔
رپورٹ کے مطابق ٹرمپ اور نیتن یاہو کے درمیان آئندہ اقدامات کے حوالے سے اختلافات سامنے آئے جبکہ امریکی ذریعے نے دعویٰ کیا کہ ’ٹیلیفونک گفتگو کے بعد نیتن یاہو شدید ناراض تھے‘۔
ذریعے نے مزید بتایا کہ واشنگٹن میں اسرائیلی سفیر نے امریکی قانون سازوں کو بھی آگاہ کیا کہ نیتن یاہو اس گفتگو کے بعد تشویش میں مبتلا تھے۔
ایکسیوس کے ذرائع کے مطابق نیتن یاہو مذاکرات کے ابتدائی مراحل میں بھی شدید پریشان رہے، یہاں تک کہ جب معاہدہ طے نہ ہو سکا تب بھی۔
ایک ذریعے نے تبصرہ کرتے ہوئے کہا کہ نیتن یاہو ہمیشہ فکر مند رہتے ہیں۔
نیتن یاہو وہی کریں گے جو میں چاہوں گا
امریکی صدر ڈونلڈ ٹرمپ نے ریاست میری لینڈ میں مختصر گفتگو کے دوران کہا کہ ایران کے معاملے پر نیتن یاہو کے ساتھ مکمل اتفاق ہے، اور وہ وہی کریں گے جو میں چاہوں گا۔
اس سے قبل اسرائیلی میڈیا نے بتایا تھا کہ ٹرمپ اور نیتن یاہو نے ہفتے کے اختتام پر بھی مشرق وسطیٰ کی صورتحال پر گفتگو کی تھی۔
اس دوران ٹرمپ نے ایران پر دوبارہ حملوں کی دھمکی دی اور کہا کہ انہوں نے مذاکرات کو موقع دینے کے لیے ایک منصوبہ بند حملہ آخری لمحات میں مؤخر کر دیا تھا۔
ایران نے
دوبارہ حملے کی
صورت میں
جنگ بڑھانے
کی دھمکی
دے دی
آج اپنے بیان میں ٹرمپ نے کہا ہم ایران کے ساتھ جنگ کو جلد از جلد ختم کریں گے۔
انہوں نے مزید دعویٰ کیا کہ ایرانی قیادت شدید خواہش رکھتی ہے کہ معاہدہ طے پا جائے۔
انہوں نے کہا کہ ہم ایران سے مذاکرات کر رہے ہیں، امید ہے مزید فوجی کارروائی کی ضرورت نہیں پڑے گی لیکن اگر ضرورت پڑی تو ایک اور سخت حملہ کیا جا سکتا ہے۔
ٹرمپ نے آبنائے ہرمز کو فوری طور پر دوبارہ کھولنے کے ہدف پر زور دیا تاہم ساتھ ہی کہا کہ ایران سے متعلق اپنے مقاصد کے حصول میں وہ جلد بازی نہیں کریں گے۔
امریکی صدر نے ایران میں معاشی مشکلات اور عوامی غصے کا بھی ذکر کیا۔
انہوں نے کہا کہ لوگوں میں غصہ موجود ہے، ایسا غصہ ہم نے پہلے نہیں دیکھا۔
دیکھتے ہیں آگے کیا ہوتا ہے، جسے بعض حلقے ایران میں ممکنہ عوامی احتجاج کی طرف اشارہ قرار دے رہے ہیں۔
رواں سال کے آغاز میں بڑے عوامی احتجاج کا سامنا کرنے کے باوجود ایرانی قیادت امریکی اور اسرائیلی دباؤ کے مقابلے میں برقرار رہی، جبکہ ملک کے اندر کسی منظم اپوزیشن کی واضح علامت سامنے نہیں آئی۔