ایلون مسک کی خلائی کمپنی اسپیس ایکس نے باضابطہ طور پر ابتدائی عوامی شیئر فروخت IPO کا اعلان کر دیا ہے، جو تاریخ کا سب سے بڑا آئی پی او بن سکتا ہے۔
کمپنی 75 ارب ڈالر تک سرمایہ جمع کرنے کی کوشش کر رہی ہے جبکہ اس کی متوقع مارکیٹ ویلیو 2 کھرب ڈالر سے تجاوز کر سکتی ہے۔
ایلون مسک کی خلائی، سیٹلائٹ اور مصنوعی ذہانت کی کمپنی اسپیس ایکس نے باضابطہ طور پر اپنے ابتدائی عوامی شیئرز فروخت کرنے IPO کا اعلان کر دیا ہے، جس کے بعد کمپنی تاریخ کے سب سے بڑے ابتدائی عوامی شیئر فروخت پروگرام کی جانب ایک اہم قدم بڑھا رہی ہے۔
امریکی سیکیورٹیز اینڈ ایکسچینج کمیشن میں بدھ کے روز جمع کرائی گئی دستاویزات کے مطابق، کمپنی، جس کا باضابطہ نام ’اسپیس ایکسپلوریشن ٹیکنالوجیز کارپوریشن‘ ہے، نے اپنے شیئرز کی فروخت کے لیے ’ناسڈاک‘ اسٹاک ایکسچینج کا انتخاب کیا ہے، جہاں اس کا تجارتی علامتی نام ’ایس پی سی ایکس‘ SPCX ہوگا۔
مزید پڑھیں
اسپیس ایکس نے سرمایہ کاروں کے لیے جاری کردہ دستاویزات میں اپنی نئی مالی تفصیلات بھی ظاہر کی ہیں، جو ایک ایسے آئی پی او کی راہ ہموار کر رہی ہیں جو مالیاتی منڈیوں کی تاریخ کا سب سے بڑا شیئر فروخت پروگرام ثابت ہو سکتا ہے۔
اعداد و شمار کے مطابق کمپنی کی گزشتہ سال آمدنی 18.7 ارب ڈالر رہی، جو سالانہ بنیاد پر 33 فیصد زیادہ ہے تاہم تحقیق و ترقی سمیت
اخراجات میں اضافے کی وجہ سے کمپنی کو 4.9 ارب ڈالر کا خالص خسارہ بھی برداشت کرنا پڑا۔
خبر رساں ادارے رائٹرز کے مطابق کمپنی 12 جون کو ناسڈاک میں اپنے شیئرز درج کرانے کا ہدف رکھتی ہے۔
اس سے قبل بلوم برگ نے اپریل میں رپورٹ کیا تھا کہ اسپیس ایکس نے خفیہ طور پر اسٹاک مارکیٹ میں فہرست ہونے کے لیے درخواست جمع کرائی تھی۔
دنیا کی سب سے بڑی نجی کمپنی، جس کی قیادت دنیا کے امیر ترین شخص ایلون مسک کر رہے ہیں، اپنے آئی پی او کے ذریعے 75 ارب ڈالر تک سرمایہ جمع کرنے کی کوشش کر رہی ہے، جبکہ اس کی مارکیٹ ویلیو 2 کھرب ڈالر سے تجاوز کر سکتی ہے۔
اسپیس ایکس نے
ناسڈاک میں SPCX
علامت کے تحت
لسٹنگ کا
اعلان کیا
اگر یہ ہدف حاصل ہو جاتا ہے تو اسپیس ایکس 2019 میں سعودی آرامکو کے 29.4 ارب ڈالر کے تاریخی آئی پی او ریکارڈ کو بھی پیچھے چھوڑ دے گی۔
اسپیس ایکس خلائی نقل و حمل کے شعبے میں نمایاں حیثیت رکھتی ہے اور امریکی خلائی ادارے ناسا اور امریکی محکمہ دفاع پینٹاگون کے لیے راکٹ لانچنگ خدمات فراہم کرنے والی بڑی کمپنیوں میں شمار ہوتی ہے۔
کمپنی اپنی سیٹلائٹ انٹرنیٹ سروس اسٹارلنک کے ذریعے بھی اربوں ڈالر کی آمدنی حاصل کر رہی ہے۔
نجی سرمایہ کاروں کی توجہ کا مرکز بننے والی اسپیس ایکس کی مارکیٹ ویلیو تیزی سے بڑھ کر 1.25 کھرب ڈالر تک پہنچ چکی ہے، خاص طور پر رواں سال ایلون مسک کی مصنوعی ذہانت کی کمپنی ایکس اے آئی کے انضمام کے بعد۔
اس انضمام میں ایلون مسک کے زیرِ ملکیت سوشل میڈیا پلیٹ فارم ایکس بھی شامل ہے، جسے انہوں نے 2022 میں 44 ارب ڈالر کے معاہدے کے تحت خریدا تھا، جن میں 33.5 ارب ڈالر حصص کی صورت میں شامل تھے۔
اگر اسپیس ایکس 2 کھرب ڈالر کی مارکیٹ ویلیو حاصل کر لیتی ہے تو یہ ایس اینڈ پی 500 انڈیکس کی بیشتر کمپنیوں سے زیادہ مالیت والی کمپنی بن جائے گی، یہاں تک کہ ایلون مسک کی الیکٹرک گاڑیوں کی کمپنی ٹیسلا کی مارکیٹ ویلیو کو بھی پیچھے چھوڑ سکتی ہے۔
بلوم برگ بلینیئرز انڈیکس کے مطابق ایلون مسک کی موجودہ دولت تقریباً 680 ارب ڈالر ہے، اور اگر آئی پی او کامیاب ہو جاتا ہے تو ان کی دولت میں مزید نمایاں اضافہ متوقع ہے۔
دستاویزات کے مطابق ’گولڈمین ساکس‘ اور ’مورگن اسٹینلے‘ اس تاریخی آئی پی او کی قیادت کر رہے ہیں، جبکہ ’بینک آف امریکا‘، ’سٹی گروپ‘ اور ’جے پی مورگن‘ بھی اس عمل میں شامل ہیں۔