سعودی وزارت صحت کے مطابق حج 1447 ہجری کے آغاز سے تیسرے ذوالحجہ تک حجاج کو ایک لاکھ 82 ہزار 700 سے زائد طبی خدمات فراہم کی جا چکی ہیں۔
ہزاروں افراد نے طبی مراکز، ایمرجنسی اور بیرونی کلینکس سے فائدہ اٹھایا جبکہ دل کے آپریشنز اور ہیٹ اسٹروک کے کیسز سے بھی مؤثر انداز میں نمٹا گیا۔
حج 1447 ہجری کے آغاز سے سعودی عرب کا طبی نظام حجاج کو اعلیٰ معیار کی طبی سہولیات فراہم کرنے کے لیے پوری استعداد کے ساتھ متحرک ہے۔
سعودی وزارتِ صحت کے مطابق یکم ذوالحجہ سے 3 ذوالحجہ تک حجاج کرام کو ایک لاکھ 82 ہزار 700 سے زائد طبی خدمات فراہم کی جا چکی ہیں، جو عازمینِ حج کی صحت، حفاظت اور فوری علاج کے لیے قائم مربوط طبی نظام کی عکاسی کرتی ہیں۔
مزید پڑھیں
وزارتِ صحت کی جانب سے جاری اعداد و شمار کے مطابق مختلف صحت مراکز اور فوری طبی نگہداشت کے مراکز سے مجموعی طور پر 32 ہزار 700 سے زائد افراد مستفید ہوئے، جبکہ ایمرجنسی وارڈز میں 20 ہزار 800 سے زیادہ کیسز کا فوری علاج کیا گیا۔
اس کے علاوہ بیرونی کلینکس میں 2 ہزار 868 عازمین کو طبی مشاورت، معائنہ اور علاج کی سہولیات فراہم کی گئیں۔
حج سیزن کے دوران اسپتالوں میں 2 ہزار 887 مریضوں کو داخل کیا گیا، جن میں ایسے مریض بھی شامل تھے جنہیں مسلسل طبی نگرانی یا خصوصی علاج کی ضرورت تھی۔
طبی نظام کے تحت اب تک 190 مختلف سرجریاں بھی کی جا چکی ہیں، جن میں 135 دل کی شریانوں سے متعلق آپریشن (کارڈیک کیتھیٹرائزیشن) اور 7 اوپن ہارٹ سرجریاں شامل ہیں، جو سعودی طبی نظام کی جدید صلاحیتوں اور فوری ردعمل کی عکاسی کرتی ہیں۔
شدید گرمی کے پیشِ نظر طبی ٹیمیں ہیٹ اسٹروک اور گرمی سے متعلق بیماریوں کی روک تھام کے لیے بھی مسلسل سرگرم ہیں۔
ایمرجنسی شعبوں
میں 20 ہزار 800
سے زائد مریضوں
کا علاج کیا گیا
وزارتِ صحت کے مطابق اب تک 12 ایسے کیسز رپورٹ ہوئے جن میں گرمی کی شدت یا سورج کی تپش سے متاثر ہونے والے افراد کو فوری طبی امداد فراہم کی گئی۔
دوسری جانب وزارتِ صحت کے متحدہ کال سینٹر 937 نے بھی حجاج کی رہنمائی اور طبی معاونت میں اہم کردار ادا کیا، جہاں 12 ہزار 600 سے زائد کالز موصول ہوئیں، جن کے ذریعے طبی مشورے، ہنگامی رہنمائی اور مختلف صحت خدمات سے متعلق معلومات فراہم کی گئیں۔
سعودی حکام کا کہنا ہے کہ حج سیزن کے دوران طبی خدمات کے معیار کو مزید بہتر بنانے کے لیے جدید طبی ٹیکنالوجی، پیشگی منصوبہ بندی، ہنگامی ردعمل کے مربوط نظام اور تربیت یافتہ طبی عملے کو استعمال میں لایا جا رہا ہے، تاکہ لاکھوں عازمینِ حج کو محفوظ، مؤثر اور عالمی معیار کی طبی سہولیات میسر آ سکیں۔
یہ تمام اقدامات ’ہیلتھ سیکٹر ٹرانسفارمیشن پروگرام‘ اور ’ضیوفِ رحمان سروس پروگرام‘ کے تحت کیے جا رہے ہیں، جو سعودی وژن 2030 کے اہم اہداف میں شامل ہیں تاکہ حجاج کرام کو بہترین طبی اور خدماتی ماحول فراہم کیا جا سکے۔