امریکی بحری محاصرے کے شدت اختیار کرنے کے ساتھ ہی ایران نے اپنی معیشت کو زندہ رکھنے کے لیے متبادل راستوں کی تلاش شروع کر دی ہے اور اسی تناظر میں چین اور ایران کے درمیان قائم ریلوے لائن اب بڑھتے ہوئے امریکی دباؤ کے مقابلے میں ایک اہم ’اقتصادی لائف لائن‘ بن کر سامنے آ رہی ہے۔
باخبر ذرائع نے بلومبرگ کو بتایا کہ 13 اپریل سے امریکی محاصرے کے آغاز کے بعد سے ایران اور چین نے چینی شہر شی آن اور ایرانی دارالحکومت تہران کے درمیان مال بردار ٹرینوں کی آمد و رفت میں نمایاں اضافہ کر دیا ہے۔
مزید پڑھیں
العربیہ کے مطابق بحران سے پہلے ہر ہفتے صرف ایک کارگو ٹرین چلتی تھی مگر اب ہر 3 یا 4 دن بعد مختلف اشیا پر مشتمل ایک نئی مال بردار ٹرین روانہ کی جا رہی ہے۔
اس پیش رفت کو ایران کی جانب سے سمندری پابندیوں کے متبادل کے طور پر زمینی نقل و حمل پر بڑھتے ہوئے انحصار کی واضح علامت قرار دیا جا رہا ہے۔
ذرائع نے وضاحت کی کہ تہران اس ریلوے راستے کے ذریعے امریکی بحری محاصرے کے اثرات کم کرنے کی کوشش کر رہا ہے کیونکہ امریکی افواج خلیج اور بحیرہ عرب میں ایرانی بندرگاہوں کی جانب آنے اور جانے والے تجارتی جہازوں کی تلاشی اور ان کے راستے تبدیل کر رہی ہیں، جس سے سمندری تجارت شدید متاثر ہوئی ہے۔
یہ ریلوے لائن وسطی ایشیا سے گزرتی ہے اور چین کے عالمی ’بیلٹ اینڈ روڈ‘ منصوبے کا حصہ ہے، جس کے ذریعے بیجنگ چین، یورپ اور مشرقِ وسطیٰ کے درمیان زمینی تجارتی روابط مضبوط بنانا چاہتا ہے۔
کچھ اندازوں کے مطابق یہ راستہ ایران کو معاشی طور پر کچھ حد تک سہارا فراہم کر سکتا ہے، خاص طور پر ایسے وقت میں جب آبنائے ہرمز میں بڑھتی ہوئی عسکری کشیدگی نے سمندری تجارت کے خطرات میں اضافہ کر دیا ہے۔
امریکا نے سمندر
بند کیا تو ایران نے
زمین کھول دی
چین ایران ریل
رابطہ تیز
چین پر بڑا انحصار
چین، ایران کا سب سے بڑا تجارتی شراکت دار ہے اور امریکی پابندیوں کے باوجود ایرانی تیل خریدنے والے نمایاں ممالک میں شامل ہے۔
گزشتہ برسوں کے دوران دونوں ممالک نے توانائی، انفراسٹرکچر اور نقل و حمل سمیت مختلف شعبوں میں طویل المدتی شراکت داری کو مضبوط بنایا ہے۔
تاہم ماہرین کے مطابق ریلوے کے ذریعے تجارت سمندری راستوں کا مکمل متبادل نہیں بن سکتی، کیونکہ ٹرینوں کے ذریعے منتقل ہونے والے سامان کی مقدار بحری جہازوں کے مقابلے میں کہیں کم ہوتی ہے۔
ریلوے لائن کی اہمیت کے باوجود ایران کو کئی لاجسٹک مشکلات کا سامنا ہے، جن میں طویل راستہ، مختلف ممالک سے گزرنے کی پیچیدگیاں اور ریلوے نظام و انفراسٹرکچر میں فرق شامل ہیں۔
اس کے علاوہ ٹرین کے ذریعے سامان کی ترسیل سمندری نقل و حمل کے مقابلے میں زیادہ مہنگی بھی سمجھی جاتی ہے، خصوصاً بھاری سامان اور خام مال کے لیے۔
اس کے باوجود تہران اس راستے کو امریکی دباؤ کم کرنے کے لیے ایک عملی حل کے طور پر دیکھ رہا ہے تاکہ اپنے اتحادیوں اور تجارتی شراکت داروں کے ساتھ تجارت کا سلسلہ برقرار رکھا جا سکے۔
دباؤ میں ایرانی معیشت
یہ تبدیلی ایسے وقت میں سامنے آئی ہے جب ایرانی معیشت مغربی پابندیوں، بحری محاصرے اور خلیجی عسکری کشیدگی کے باعث شدید دباؤ کا شکار ہے۔
جہاں واشنگٹن کا مؤقف ہے کہ اس محاصرے کا مقصد ایرانی معیشت کو ’گھٹنوں پر لانا‘ اور تہران کو رعایتیں دینے پر مجبور کرنا ہے، وہیں ایران متبادل تجارتی راستے تیار کرنے کی کوشش کر رہا ہے تاکہ اسے عالمی منڈیوں سے مکمل طور پر الگ نہ کیا جا سکے۔