سعودی شوریٰ کونسل نے پریمیم ریذیڈنسی ’اقامہ ممیزہ‘ مرکز کی سالانہ رپورٹ پر غور کرتے ہوئے پروگرام کی عالمی مسابقت بڑھانے، فیسوں اور طریقہ کار کا ازسرِنو جائزہ لینے اور پریمیم اقامہ رکھنے والے سرمایہ کاروں کو مختلف علاقوں میں سرمایہ کاری کے لیے خصوصی مراعات دینے کی سفارش کی ہے۔
یہ اقدامات سعودی وژن 2030 کے تحت غیرملکی سرمایہ کاری اور معاشی تنوع کو فروغ دینے کی کوششوں کا حصہ ہیں۔
سعودی شوری کونسل نے پریمیم اقامہ مرکز کی مالی سال 1446-1447 ہجری کی سالانہ رپورٹ پر غور کرتے ہوئے متعدد اہم سفارشات اور فیصلے جاری کئے ہیں، جن کا مقصد سعودی عرب میں غیر ملکی سرمایہ کاری کے ماحول کو مزید مؤثر، مسابقتی اور پرکشش بنانا ہے۔
یہ سفارشات شوریٰ کونسل کے اجلاس کے دوران پیش کی گئیں، جس کی صدارت نائب چیئرمین ڈاکٹر مشعل السلمی نے کی۔
اجلاس میں پریمیم اقامہ پروگرام کی کارکردگی، سرمایہ کاروں کی دلچسپی اور عالمی سطح پر اس پروگرام کی مسابقتی حیثیت کا تفصیلی جائزہ لیا گیا۔
مزید پڑھیں
سعودی پریس ایجنسی کے مطابق کونسل نے اپنے فیصلے میں ممتاز اقامہ مرکز پر زور دیا کہ وہ دنیا کے دیگر ممالک میں موجود سرمایہ کاری اور مستقل یا طویل مدتی رہائشی پروگراموں کے مقابلے میں اپنے پروگراموں کی فیسوں، شرائط اور انتظامی طریقہ کار کا ازسرِ نو جائزہ لے۔
شوریٰ کونسل کا مؤقف تھا کہ عالمی سرمایہ کاروں کو متوجہ کرنے کے
لیے ضروری ہے کہ سعودی عرب کا پریمیم اقامہ پروگرام نہ صرف تیز، آسان اور شفاف ہو بلکہ عالمی معیار کے مطابق زیادہ مسابقتی بھی بنایا جائے۔
کونسل نے یہ بھی سفارش کی کہ ممتاز اقامہ رکھنے والے غیرملکی سرمایہ کاروں کو سعودی عرب کے مختلف علاقوں اور گورنریٹس میں سرمایہ کاری کے لیے خصوصی مراعات، سہولتیں اور ترغیبات فراہم کی جائیں۔
ان مراعات میں کاروباری سہولتوں میں آسانی، مخصوص سرمایہ کاری مواقع، اور مختلف شعبوں میں رعایتیں شامل ہو سکتی ہیں تاکہ سرمایہ کاری صرف بڑے شہروں تک محدود نہ رہے بلکہ مملکت کے دیگر علاقوں میں بھی معاشی ترقی کو فروغ مل سکے۔
اجلاس کے دوران اس بات پر بھی زور دیا گیا کہ پریمیم اقامہ پروگرام سعودی وژن 2030 کے اہم اہداف میں سے ایک ہے، جس کا مقصد معیشت کو متنوع بنانا، غیرملکی سرمایہ کاری میں اضافہ کرنا، اور سعودی عرب کو عالمی کاروباری و سرمایہ کاری مرکز کے طور پر مستحکم کرنا ہے۔
واضح رہے کہ پریمیم اقامہ پروگرام غیر ملکی افراد، سرمایہ کاروں، کاروباری شخصیات اور ماہرین کو سعودی عرب میں طویل مدتی رہائش، کاروبار، جائیداد کی ملکیت اور متعدد معاشی سہولتیں فراہم کرتا ہے، جس کے ذریعے مملکت عالمی ٹیلنٹ اور سرمایہ کو اپنی جانب متوجہ کرنے کی کوشش کر رہی ہے۔