سعودی عرب میں کار رینٹل سیکٹر نے 2025 کے دوران غیر معمولی ترقی ریکارڈ کی، جہاں مجموعی معاہدوں کی تعداد 66 لاکھ سے بڑھ گئی۔
رپورٹ کے مطابق روزانہ 18 ہزار سے زائد جبکہ ہر گھنٹے 753 گاڑیوں کے کرایہ معاہدے کیے گئے۔
ریاض، مکہ اور مشرقی ریجن سب سے زیادہ سرگرم رہے۔
سعودی عرب میں گاڑیوں کے کرایے کا شعبہ تیزی سے ترقی کی نئی بلندیوں کو چھو رہا ہے، جہاں جنرل ٹرانسپورٹ اتھارٹی کے تازہ اعداد و شمار کے مطابق سال 2025 کے دوران کار رینٹل معاہدوں کی تعداد 66 لاکھ سے تجاوز کر گئی۔
یہ اعداد و شمار مملکت میں بڑھتی ہوئی اقتصادی سرگرمیوں، سیاحت، کاروباری سفر اور اندرونِ ملک نقل و حرکت میں اضافے کی واضح علامت سمجھے جا رہے ہیں۔
رپورٹ کے مطابق روزانہ اوسطاً 18 ہزار سے زائد گاڑیوں کے کرایے کے معاہدے کئے گئے، جبکہ ہر گھنٹے میں تقریباً 753 نئے معاہدے ریکارڈ ہوئے۔
مزید پڑھیں
حکام کے مطابق یہ اضافہ سعودی وژن 2030 کے تحت ٹرانسپورٹ، سیاحت اور خدمات کے شعبوں میں ہونے والی وسیع سرمایہ کاری کا نتیجہ ہے۔
اعداد و شمار سے یہ بھی ظاہر ہوا کہ 2025 میں گاڑیوں کے کرایے کے معاہدوں میں گزشتہ سال کے مقابلے میں 15 فیصد اضافہ ہوا، جس سے واضح ہوتا ہے کہ سعودی عرب میں شہریوں، مقیم غیر ملکیوں اور
سیاحوں کی جانب سے کار رینٹل سروسز کی طلب مسلسل بڑھ رہی ہے۔
ادھر 2026 کی پہلی سہ ماہی کے دوران بھی یہ شعبہ تیزی سے آگے بڑھتا رہا۔
رپورٹ کے مطابق صرف پہلے 3 ماہ میں 16 لاکھ سے زائد کار رینٹل معاہدے جاری کئے گئے، جو گزشتہ سال کی اسی مدت کے مقابلے میں 7 فیصد زیادہ ہیں۔
ماہرین کا کہنا ہے کہ حج، عمرہ، سیاحتی سرگرمیوں اور بڑے اقتصادی منصوبوں نے اس شعبے کی ترقی میں اہم کردار ادا کیا ہے۔
کار رینٹل
مارکیٹ میں
سالانہ 15 فیصد
اضافہ ریکارڈ
علاقائی سطح پر رياض سب سے بڑا مرکز بن کر سامنے آیا، جہاں مجموعی معاہدوں کا 31.9 فیصد ریکارڈ کیا گیا۔
ماہرین کے مطابق دار الحکومت میں کاروباری سرگرمیوں، بین الاقوامی کمپنیوں کی موجودگی اور بڑھتی ہوئی آبادی نے گاڑیوں کی طلب میں نمایاں اضافہ کیا۔
اس کے بعد مكہ مكرمہ ریجن 25.5 فیصد کے ساتھ دوسرے نمبر پر رہا، جہاں حج اور عمرہ زائرین کی بڑی تعداد کار رینٹل مارکیٹ کو مسلسل متحرک رکھتی ہے۔
جبکہ مشرقی ریجن 14.1 فیصد کے ساتھ تیسرے نمبر پر رہا، جہاں صنعتی اور تیل سے وابستہ سرگرمیوں نے اس شعبے کو فروغ دیا۔
اسی طرح مدينہ منورہ، عسير، قصيم اور جازان سمیت دیگر ریجنوں میں بھی نمایاں سرگرمی دیکھی گئی، جو اس بات کی نشاندہی کرتی ہے کہ کار رینٹل کا شعبہ اب صرف بڑے شہروں تک محدود نہیں رہا بلکہ پورے ملک میں تیزی سے پھیل رہا ہے۔
ٹرانسپورٹ ماہرین کا کہنا ہے کہ ڈیجیٹل ایپس، آن لائن بکنگ، مختصر مدتی کرایہ سروسز اور سیاحتی منصوبوں نے بھی اس شعبے کی ترقی میں اہم کردار ادا کیا ہے جبکہ مستقبل میں الیکٹرک گاڑیوں اور اسمارٹ ٹرانسپورٹ سسٹمز کے فروغ سے یہ مارکیٹ مزید وسعت اختیار کر سکتی ہے۔