سعودی عرب میں 2025 کے دوران فضائی سفر نے ریکارڈ ترقی کی، جہاں مجموعی مسافروں کی تعداد 140.9 ملین تک پہنچ گئی۔
بین الاقوامی اور اندرونِ ملک پروازوں دونوں میں نمایاں اضافہ ریکارڈ کیا گیا جبکہ طیاروں کے بیڑے، فضائی رابطوں اور عالمی ایوی ایشن انڈیکس میں بھی مملکت نے اپنی پوزیشن مستحکم کی۔
2025 کے دوران سعودی عرب کے ہوائی اڈوں سے سفر کرنے والے مسافروں کی مجموعی تعداد میں نمایاں اضافہ ریکارڈ کیا گیا۔
مسافروں کی تعداد 140.9 ملین تک پہنچ گئی، جو 2024 کے مقابلے میں 9.6 فیصد زیادہ ہے۔
ان میں 75.8 ملین مسافر بین الاقوامی پروازوں کے ذریعے سفر کرنے والے تھے، جن میں سالانہ 9.4 فیصد اضافہ ہوا، جبکہ اندرونِ ملک پروازوں کے مسافروں کی تعداد 65.1 ملین رہی، جو 2024 کے مقابلے میں 9.8 فیصد زیادہ ہے۔
سعودی محکمہ شماریات کی جانب سے آج پیر کو جاری کردہ اعداد و شمار کے مطابق جدہ کا کنگ عبد العزیز انٹرنیشنل ایئرپورٹ آنے اور جانے والے مسافروں کی تعداد کے لحاظ سے مملکت کا سب سے بڑا ہوائی اڈہ رہا، جہاں 53.5 ملین مسافروں نے سفر کیا، جو سالانہ 9 فیصد اضافے کو ظاہر کرتا ہے۔
مزید پڑھیں
اس کے بعد ریاض کا کنگ خالد انٹرنیشنل ایئرپورٹ رہا، جہاں 40.8 ملین مسافر ریکارڈ کئے گئے جبکہ دمام کا کنگ فہد انٹرنیشنل ایئرپورٹ 13.7 ملین مسافروں کے ساتھ تیسرے نمبر پر رہا۔
اعداد و شمار کے مطابق سعودی عرب کے تمام ہوائی اڈوں پر اندرونِ ملک پروازوں کے ذریعے روزانہ آنے اور جانے والے مسافروں کی اوسط تعداد 178.6 ہزار رہی۔
جبکہ بین الاقوامی پروازوں کے مسافروں کی یومیہ اوسط 207.7 ہزار تک پہنچ گئی۔
2025 کے دوران مملکت کے ہوائی اڈوں پر آنے اور جانے والی پروازوں کی مجموعی تعداد 979.8 ہزار رہی، جو 2024 کے مقابلے میں 8.3 فیصد زیادہ ہے۔
ان میں 506.3 ہزار داخلی پروازیں شامل تھیں، جن میں 6.8 فیصد اضافہ ہوا، جبکہ بین الاقوامی پروازوں کی تعداد 473.5 ہزار رہی، جو 10 فیصد اضافے کی عکاس ہے۔
پروازوں کی تعداد کے اعتبار سے بھی جدہ کا کنگ عبد العزیز انٹرنیشنل ایئرپورٹ 314.4 ہزار پروازوں کے ساتھ پہلے نمبر پر رہا، جبکہ ریاض کا کنگ خالد انٹرنیشنل ایئرپورٹ 296.8 ہزار پروازوں کے ساتھ دوسرے نمبر پر اور دمام کا کنگ فہد انٹرنیشنل ایئرپورٹ 108.5 ہزار پروازوں کے ساتھ تیسرے نمبر پر رہا۔
اعداد و شمار کے مطابق سعودی عرب کے تمام ہوائی اڈوں پر داخلی پروازوں کی روزانہ اوسط 1,387 پروازیں رہی، جبکہ بین الاقوامی پروازوں کی یومیہ اوسط 1,297 پروازیں ریکارڈ کی گئی۔
طیاروں کے بیڑے میں 33.8 فیصد اضافہ
اسی تناظر میں 2025 کے دوران سعودی عرب میں تجارتی اور نجی فضائی نقل و حمل کے طیاروں کا مجموعی بیڑا 483 طیاروں تک پہنچ گیا، جو 2024 کے مقابلے میں 33.8 فیصد زیادہ ہے۔ ان میں 266 طیارے تجارتی فضائی کمپنیوں کے تھے۔
تجارتی طیاروں میں سب سے زیادہ تعداد 151 سے 250 نشستوں والے طیاروں کی رہی، جن کی تعداد 120 تھی، جبکہ عمر کے اعتبار سے پانچ سال سے کم پرانے تجارتی طیاروں کی تعداد 99 ریکارڈ کی گئی۔
سعودی فضائی شعبہ تیزی سے آگے
بڑھنے لگا
14 کروڑ مسافر
176 عالمی منزلوں سے فضائی رابطہ
سعودی عرب کا دنیا بھر کے 66 ممالک کے ساتھ فضائی رابطہ قائم رہا جو 2024 کے مقابلے میں 1.5 فیصد زیادہ ہے جبکہ منزلوں کی تعداد بڑھ کر 176 ہوگئی، جس میں 2.3 فیصد اضافہ ہوا۔2025 کے دوران سعودی فضائی حدود سب سے زیادہ سعودی ایئرلائن نے استعمال کیں، جس کا حصہ مجموعی پروازوں میں 25.5 فیصد رہا۔
اس کے بعد فلائی ناس 13.3 فیصد اور فلائی ادیل 8.6 فیصد کے ساتھ نمایاں رہیں۔
عالمی فضائی رابطہ انڈیکس 2025 میں سعودی عرب 18ویں نمبر پر رہا، جبکہ 2024 میں مملکت 17ویں پوزیشن پر تھی۔
فضائی کارگو 1.18 ملین ٹن سے تجاوز
2025 کے دوران سعودی عرب کے ہوائی اڈوں پر فضائی کارگو کی مجموعی مقدار 1.18 ملین ٹن ریکارڈ کی گئی، جبکہ 2024 میں یہ 1.19 ملین ٹن تھی۔
درآمدی کارگو 695.6 ہزار ٹن، برآمدی کارگو 69.7 ہزار ٹن سے زائد، جبکہ ٹرانزٹ کارگو تقریباً 420.1 ہزار ٹن ریکارڈ کیا گیا۔
مارچ کا مہینہ فضائی کارگو کے لحاظ سے سب سے مصروف رہا، جب 113.4 ہزار ٹن سے زائد سامان منتقل کیا گیا۔