ٹرمپ اور شی کے درمیان بیجنگ میں ہونے والی اہم ملاقات میں دونوں ممالک نے اسٹریٹجک استحکام، تجارتی تعاون اور عالمی تنازعات پر رابطے بڑھانے پر اتفاق کیا۔
اجلاس میں تائیوان، ایران، یوکرین، تجارت، ٹیکنالوجی اور زرعی شعبوں سمیت کئی حساس موضوعات زیر بحث آئے جبکہ امریکی کاروباری شخصیات کی بڑی تعداد بھی ٹرمپ کے ہمراہ موجود تھی۔
امریکا اور چین نے جمعرات کو بیجنگ میں ہونے والی سربراہی ملاقات کے دوران باہمی تعاون پر مبنی تعلقات کو مزید مضبوط بنانے پر اتفاق کیا۔
یہ ایک نہایت اہم اجلاس تھا، جس میں دونوں ممالک کے درمیان دوستانہ ماحول دیکھنے میں آیا، حالانکہ گزشتہ کئی برسوں سے دونوں طاقتیں کاپی رائٹ، انسانی حقوق، ٹیکنالوجی اور تجارت جیسے مختلف معاملات پر ایک دوسرے کے مقابل رہی ہیں۔
سربراہی ملاقات میں 5 اہم نکات زیر بحث آئے، جیسا کہ امریکی نشریاتی ادارے سی این بی سی نے رپورٹ کیا۔
مزید پڑھیں
1۔ اسٹریٹجک سمت کا تعین
شی جن پنگ اور امریکی صدر ڈونلڈ ٹرمپ نے اسٹریٹجک استحکام پر مبنی تعمیری چین، امریکا تعلقات” کو فروغ دینے پر اتفاق کیا۔
بیجنگ کی جانب سے جاری انگریزی بیان کے مطابق شی جن پنگ نے کہا کہ چین آئندہ 3 برسوں اور اس کے بعد بھی اسی فریم ورک کو اپنائے گا۔
شی نے واضح کیا کہ اسٹریٹجک سمت کا انحصار تعاون، محدود اور
حساب شدہ مقابلے اور قابلِ انتظام اختلافات پر ہوگا اور اس وژن کو عملی اقدامات میں تبدیل کرنا ضروری ہے۔
اکنامک انٹیلی جنس یونٹ کے چیف اکانومسٹ تیانچن شو نے کہا کہ یہ ایک ایسے دور کی نشاندہی کرتا ہے جسے ’منظم استحکام‘ کہا جا سکتا ہے اور یہ کچھ عرصہ جاری رہ سکتا ہے۔
ان کے مطابق کشیدگی مکمل طور پر ختم نہیں ہوگی لیکن دونوں ممالک معاملات کو 2025 جیسی خطرناک صورتحال تک نہیں جانے دیں گے۔
2۔ پری سمٹ اجلاس: متوازن اور مثبت
شی جن پنگ کے مطابق دونوں ممالک کے تجارتی نمائندوں نے بدھ کو جنوبی کوریا میں ہونے والے ابتدائی اجلاس میں مجموعی طور پر متوازن اور مثبت نتائج حاصل کیے۔
امریکی وفد کی قیادت وزیر خزانہ اسکاٹ بیسنٹ جبکہ چینی وفد کی قیادت نائب وزیراعظم ہی لی فنگ نے کی۔
شی نے کہا کہ دونوں ممالک کو بڑی مشکل سے حاصل ہونے والی اس مثبت رفتار کو برقرار رکھنے کے لیے مل کر کام کرنا چاہیے۔
انہوں نے مزید کہا کہ چین امریکی تجارتی تعاون کو مزید گہرا کرنے کا خیرمقدم کرتا ہے اور چین کے دروازے مکمل طور پر کھلیں گے۔
یہ بیانات ایسے وقت میں سامنے آئے جب ٹرمپ کے دورۂ چین میں امریکی کمپنیوں کے 12 بڑے کاروباری رہنما بھی شامل ہیں۔
3۔ تعاون کو مزید گہرا کرنا
شی جن پنگ نے کہا کہ دونوں ممالک کو سفارتی اور عسکری رابطوں کے چینلز سے بہتر فائدہ اٹھانا چاہئے۔
انہوں نے اقتصادی، تجارتی، زرعی اور سیاحتی شعبوں میں تعاون بڑھانے کی بھی اپیل کی۔
4۔ تائیوان: سب سے اہم مسئلہ
شی جن پنگ نے تائیوان کے معاملے پر انتہائی سخت مؤقف اختیار کرتے ہوئے اسے امریکا اور چین تعلقات کا سب سے اہم مسئلہ قرار دیا۔
انہوں نے خبردار کیا کہ اگر ہم نے اس مسئلے کو درست انداز میں سنبھالا تو تعلقات قائم رہیں گے لیکن اگر غلط انداز میں نمٹا گیا تو دونوں ممالک تصادم اور ٹکراؤ کے خطرے سے دوچار ہو سکتے ہیں۔
5۔ دیگر اہم معاملات
دونوں فریقوں نے مشرقِ وسطیٰ کی صورتحال، یوکرین بحران اور جزیرہ نما کوریا کے مسئلے پر بھی تبادلہ خیال کیا تاہم جاری بیان میں مزید تفصیلات فراہم نہیں کی گئیں۔
تجزیہ نگار اور ماہرین کا کہنا ہے کہ صدر ٹرمپ کا دورۂ چین، دونوں ممالک کے تعلقات کے حوالے سے مثبت اشارے رکھتا ہے۔
ان کے مطابق ماضی میں بھی ٹرمپ اور شی جن پنگ کی ملاقاتیں اکثر مثبت خبروں اور تجارتی کشیدگی میں کمی کا باعث بنتی رہی ہیں، خصوصاً تجارت اور شپنگ کے شعبے میں۔
انہوں نے مزید کہا کہ ’بڑی ڈیل‘ یا ’گرانڈ بارگین‘ کی توقعات محدود ہیں، کیونکہ دونوں ممالک کے درمیان اقتصادی اور سیاسی معاملات انتہائی پیچیدہ ہیں تاہم، جزوی کامیابیوں اور مرحلہ وار مفاہمت کے امکانات موجود ہیں۔
مبصرین کا کہنا ہے کہ دورے میں سیاسی پہلو، معاشی پہلو پر غالب دکھائی دیتا ہے کیونکہ امریکا کی توجہ ایران کے مسئلے اور مشرق وسطیٰ میں کشیدگی کم کرنے کے لیے چین کے ممکنہ کردار پر مرکوز ہے جبکہ چین اس موقع پر تائیوان کا مسئلہ بھی مؤثر انداز میں اٹھا سکتا ہے۔
انہوں نے کہا کہ معاشی معاملات مکمل طور پر پس منظر میں نہیں جائیں گے بلکہ دونوں ممالک کو اضافی اقتصادی فوائد حاصل ہوسکتے ہیں۔
عالمی منڈیاں اس بات کی منتظر ہیں کہ تجارتی پابندیوں میں نرمی اور باہمی تجارت میں بہتری کے لیے کیا اقدامات کیے جاتے ہیں، کیونکہ اس سے عالمی معیشت کو سہارا مل سکتا ہے۔
مبصرین نے مزید کہا کہ ٹرمپ کے ہمراہ جانے والے کاروباری رہنماؤں کا انتخاب انتہائی سوچ سمجھ کر کیا گیا ہے، کیونکہ وہ 4 اہم شعبوں — مالیاتی و بینکاری، ٹیکنالوجی، ہوابازی اور زراعت — کی نمائندگی کرتے ہیں۔