ترکی کے صوبہ بیلہ جک میں ایک بھکاری کی گرفتاری کے واقعے نے ملک بھر میں شدید بحث اور غصے کو جنم دیا، جب بلدیاتی پولیس کو اس کے پاس سے بڑی رقم ملی حالانکہ وہ سڑک پر خود کو محتاج ظاہر کر کے لوگوں سے پیسے مانگ رہا تھا۔
یہ واقعہ شہر کے وسط میں واقع اتاترک بولوار میں پیش آیا، جہاں بلدیہ کی ٹیموں نے ایک شخص کو مصروف ترین سڑک پر بھیک مانگتے دیکھا، جس کے بعد اسے حراست میں لے کر بلدیہ کے دفتر منتقل کیا گیا تاکہ اس کی صورتحال کی جانچ کی جا سکے۔
مزید پڑھیں
تلاشی کے دوران حکام اس وقت حیران رہ گئے جب اس کے پاس سے تقریباً 32 ہزار ترک لیرہ برآمد ہوئے۔
یہ رقم وہاں موجود افراد کے لیے چونکا دینے والی تھی، خاص طور پر اس وقت جب ایک ویڈیو منظر عام پر آئی جس میں رقم کو کیمرے کے سامنے گنا اور ترتیب دیا جا رہا تھا۔
موجودہ شرح مبادلہ کے مطابق یہ رقم تقریباً 820 امریکی ڈالر بنتی ہے،
جسے لوگوں نے حیران کن قرار دیا کیونکہ وہ شخص خود کو غریب ظاہر کر کے ایک ہی دن میں یہ رقم جمع کر رہا تھا جیسا کہ ویب سائٹ Habertürk نے رپورٹ کیا ہے۔
ابتدائی تحقیقات سے معلوم ہوا کہ یہ شخص مقامی نہیں بلکہ صوبہ نيغدہ سے آیا تھا اور مختلف ترک شہروں میں منظم انداز میں بھیک مانگتا تھا۔
مزید یہ بھی سامنے آیا کہ تقریباً دو ہفتے قبل اسے صوبہ اسکی شہر میں بھی اسی طریقے سے پکڑا گیا تھا، جہاں اس نے 30 ہزار لیرہ سے زائد رقم جمع کی تھی، جس سے اس کے منظم انداز میں بھیک مانگنے کے شبہات مزید مضبوط ہو گئے۔
ملزم مختلف شہروں میں منظم انداز میں
بھیک مانگتا رہا
بلدیاتی پولیس کے سربراہ مجاہد اوندارسيف نے بتایا کہ ضبط شدہ رقم ممکنہ طور پر چند ہی دنوں میں جمع کی گئی تھی۔
انہوں نے کہا کہ بعض بھکاری اب زیادہ منظم طریقے اختیار کر رہے ہیں، جیسے کہ رقم کو فوری طور پر اے ٹی ایم مشینوں میں جمع کرانا تاکہ اپنے پاس بڑی رقم رکھنے سے بچ سکیں۔
انہوں نے مزید بتایا کہ گرفتار شخص نے اعتراف کیا کہ وہ روزانہ 2 ہزار سے 3 ہزار ترک لیرہ خرچ کرتا ہے اور اپنی ضروریات پوری کرنے کے لیے بھیک مانگنے پر انحصار کرتا ہے۔
ترک حکام کے مطابق یہ معاملہ صرف لوگوں کے جذبات سے کھیلنے یا دھوکہ دینے تک محدود نہیں بلکہ اس سے عوامی نظم و ضبط اور صحتِ عامہ سے متعلق خدشات بھی جڑے ہیں۔
حکام نے بتایا کہ مذکورہ شخص کی ٹانگ پر کھلا زخم تھا اور وہ اسی حالت میں پبلک ٹرانسپورٹ استعمال کر رہا تھا، جس سے صحت کے مسائل بھی پیدا ہو سکتے تھے۔
کارروائی کے اختتام پر حکام نے اس بھکاری پر جرمانہ عائد کیا، اس کے پاس موجود رقم ضبط کر لی اور اس بات کا اعادہ کیا کہ بھیک مانگنے کے خلاف کارروائیاں جاری رہیں گی، خصوصاً ایسے کیسز میں جہاں اسے ایک منظم اور منافع بخش سرگرمی کے طور پر استعمال کیا جا رہا ہو۔