جزائر فرسان میں سالانہ بنیادوں پر الحريد مچھلی کی ہجرت ایک ایسا قدرتی منظر ہے جو پورے علاقے کو ایک بڑے سیاحتی اور ماحولیاتی تھیٹر میں تبدیل کر دیتا ہے۔
مزید پڑھیں
مارچ کے اواخر سے اپریل کے اختتام تک یہ غیر معمولی منظر دیکھنے کے لیے ہزاروں سیاح یہاں کا رُخ کرتے ہیں۔
جازان ریجن قدرتی وسائل اور سمندری تنوع سے مالا مال ہے۔ یہاں بحیرہ احمر کی آبی حدود میں موجود مرجانی چٹانیں اور سمندری حیات کا تحفظ مقامی ماہی گیری کے شعبے کے لیے ایک مضبوط بنیاد فراہم کرتے ہیں۔
یہ خطہ خاص طور پر مقامی آبادی اور آنے والے مہمانوں کے لیے اقتصادی مواقع بھی پیدا کرتا ہے۔
الحريد مچھلی
الحريد (سائنسی نام: Calotomus zonarchus) اپنی منفرد خصوصیات کے باعث اہمیت رکھتی ہے۔
اس کے سامنے کے دانت طوطے کی چونچ سے مشابہ ہوتے ہیں جو اسے چٹانوں اور مرجان کو کھرچ کر خوراک حاصل کرنے میں مدد دیتے ہیں۔
دنیا بھر میں الحرید مچھلی کی 90 سے 95 اقسام پائی جاتی ہیں جن میں سے 17 بحیرہ احمر میں موجود ہیں۔
جسمانی ساخت اور کردار
اس مچھلی کی لمبائی 10 سینٹی میٹر تا 1.2 میٹر تک ہو سکتی ہے۔ یہ اپنے جسم کی مضبوطی اور شوخ رنگوں کے لیے مشہور ہے۔
یہ مچھلیاں نباتیات اور سمندری گھاس کھا کر مرجان کی صفائی کرتی ہیں، جس سے بحری نظام کا توازن برقرار رہتا ہے اور اضافی کائی کی افزائش پر قابو پایا جا سکتا ہے۔
موسمی ہجرت کا منظر
جزیرہ فرسان کا ساحل ’حصيص‘ اس ہجرت کا مرکزی مقام ہے۔
ہر سال مارچ اور اپریل کے درمیان رات کے وقت یہ مچھلیاں 7 سے 12 گروپس کی صورت میں یہاں آتی ہیں اور ہر گروپ میں 200 سے 500 مچھلیاں شامل ہوتی ہیں، جن کی مجموعی تعداد 3,000 سے 5,000 تک پہنچ جاتی ہے۔
ماہرین کی رائے اور حکومتی نگرانی
جازان میں وزارت ماحولیات، پانی و زراعت کے ڈائریکٹر جنرل انجینئر احمد بن محمد آل مجثل کے مطابق یہ ہجرت قمری کیلنڈر سے منسلک ہے۔
چودھویں کے بعد مچھلیاں انڈے دینے کے لیے کم گہرے اور نباتیات سے بھرپور پانی کا رخ کرتی ہیں۔ یہ انواع ذائقے اور رنگت کے اعتبار سے دنیا بھر میں بے مثال سمجھی جاتی ہیں۔
مقامی روایت اور ’مہرجان الحرید‘
یہاں کے مقامی باشندے اپنے آبائی تجربے کی بنیاد پر مچھلیوں کی آمد کا صحیح وقت جانتے ہیں۔
مغرب کے بعد پانی سے اٹھنے والی مخصوص مہک ان کی آمد کا پتا دیتی ہے۔ اسی تاریخی اور ثقافتی اہمیت کے پیش نظر 1426 ہجری میں پہلی بار ’مهرجان الحريد‘ فیسٹیول کا آغاز کیا گیا جو اب ایک باقاعدہ تہوار بن چکا ہے۔
سیاحت اور معیشت
سن 1444 ہجری سے وزارتِ ماحولیات اس فیسٹیول کا باقاعدہ انتظام سنبھال رہی ہے۔
جازان گورنریٹ کی زیرِ سرپرستی اس ایونٹ نے فرسان کی سیاحتی پہچان کو عالمی سطح پر اجاگر کیا ہے۔ یہ میلہ نہ صرف مقامی ثقافت کو زندہ رکھے ہوئے ہے بلکہ علاقے کی معیشت میں بھی کلیدی کردار ادا کر رہا ہے۔
