مراکش کے ہیڈ کوچ محمد وہبی نے ورلڈ کپ 2026 میں برازیل کے خلاف پہلے میچ سے قبل اعتماد سے بھرپور پیغام دیتے ہوئے کہا ہے کہ ان کی ٹیم برازیل کے نام یا تاریخ سے مرعوب نہیں۔
ان کے مطابق مراکش صرف شرکت کے لیے نہیں بلکہ مثبت نتائج اور بڑی کامیابیوں کے لیے میدان میں اتر رہا ہے۔
فیفا ورلڈ کپ 2026 میں مراکش کو اپنے گروپ مرحلے کے سب سے سخت امتحان کا سامنا اس وقت ہوگا جب وہ 13 جون کو اپنے پہلے میچ میں پانچ مرتبہ کی عالمی چیمپئن برازیل کے مدمقابل آئے گا۔
اگرچہ برازیل عالمی فٹبال کی تاریخ کی کامیاب ترین ٹیموں میں شمار ہوتا ہے، تاہم مراکشی ٹیم کے ہیڈ کوچ محمد وہبی نے واضح کر دیا ہے کہ ان کی ٹیم برازیل کے شاندار ماضی یا عالمی شہرت سے مرعوب نہیں۔
مزید پڑھیں
مراکش اس بار بھی بلند حوصلوں کے ساتھ میدان میں اتر رہا ہے۔
قطر میں منعقدہ 2022 ورلڈ کپ میں مراکش نے تاریخ رقم کرتے ہوئے سیمی فائنل تک رسائی حاصل کی تھی اور ورلڈ کپ کے آخری 4 مرحلے میں پہنچنے والی پہلی افریقی ٹیم بن گئی تھی۔
اسی کارکردگی کے بعد مراکش کو رواں ٹورنامنٹ میں بھی ایک مضبوط اور خطرناک ٹیم تصور کیا جا رہا ہے۔
ہسپانوی اخبار مارکا کے مطابق 49 سالہ محمد وہبی نے کہا کہ ان کے کھلاڑی جسمانی، تکنیکی اور ذہنی طور پر مکمل طور پر تیار ہیں اور انہیں اپنی صلاحیتوں پر بھرپور اعتماد ہے۔
انہوں نے کہا کہ ہم برازیل کی تاریخ، روایات اور کامیابیوں کا احترام کرتے ہیں، لیکن ہمیں اپنی صلاحیتوں پر مکمل یقین ہے۔
مراکش
برازیل
محمد وہبی کے مطابق ورلڈ کپ سے قبل منعقد کیے گئے سخت تربیتی کیمپ نے ٹیم کو ہر لحاظ سے تیار کر دیا ہے۔
ان کا کہنا تھا کہ کھلاڑی افتتاحی میچ کی اہمیت سے بخوبی آگاہ ہیں اور ٹیم میں ایسے باصلاحیت اور تجربہ کار کھلاڑی موجود ہیں جو دنیا کی بڑی ٹیموں کا مقابلہ کر سکتے ہیں۔
انہوں نے مزید کہا کہ ہم برازیل کے خلاف احترام کے ساتھ میدان میں اتریں گے، لیکن ہماری سوچ صرف جیت کی ہے۔
مراکشی کوچ نے واضح کیا کہ ان کی ٹیم صرف عالمی کپ میں شرکت کے لیے نہیں آئی بلکہ مثبت نتائج حاصل کرنے اور ٹورنامنٹ میں اپنی صلاحیتوں کا بھرپور اظہار کرنے کے لیے میدان میں اتر رہی ہے۔
انہوں نے کہا کہ ہم یہاں صرف حصہ لینے نہیں آئے، ہمارا مقصد کامیاب نتائج حاصل کرنا اور اس تاریخی ایونٹ میں اپنی مضبوط موجودگی ثابت کرنا ہے۔
اپنے پیغام کے اختتام پر محمد وہبی نے مراکشی شائقین کا شکریہ ادا کرتے ہوئے کہا کہ فٹبال کا فیصلہ میدان میں ہوتا ہے۔
ہم اپنی قوم اور دنیا بھر میں موجود مراکشی شائقین کو خوش کرنے کے لیے پوری قوت کے ساتھ کھیلیں گے اور مراکشی فٹبال کا نام روشن کرنے کی کوشش کریں گے۔
واضح رہے کہ مراکش گروپ سی میں شامل ہے، جہاں وہ 13 جون کو برازیل کے خلاف مہم کا آغاز کرے گا، 19 جون کو ہیٹی کا سامنا کرے گا، جبکہ 5 روز بعد گروپ مرحلے کے اپنے آخری میچ میں اسکاٹ لینڈ کے مدمقابل آئے گا۔