امریکا اور ایران کے درمیان متوقع مفاہمتی یادداشت پر دستخط کے لیے جنیوا کا نام سب سے مضبوط امیدوار کے طور پر سامنے آیا ہے۔
اطلاعات کے مطابق معاہدے میں 60 روزہ جنگ بندی، آبنائے ہرمز کو دوبارہ کھولنے، ایرانی جوہری پروگرام پر مذاکرات اور منجمد اثاثوں کی رہائی جیسے اہم نکات شامل ہیں۔
بعض ذرائع کے مطابق اس معاہدے کو ’اعلانِ اسلام آباد‘ کا نام بھی دیا جا سکتا ہے، جو پاکستان کے اہم ثالثی کردار کا اعتراف ہوگا۔
واشنگٹن اور تہران کے درمیان متوقع معاہدے پر دنیا بھر کی نظریں جمی ہوئی ہیں، جبکہ امریکی اور بین الاقوامی ذرائع ابلاغ کے مطابق سوئٹزرلینڈ کا شہر جنیوا اس اہم مفاہمتی یادداشت پر دستخط کی تقریب کی میزبانی کے لیے سب سے مضبوط امیدوار بن کر سامنے آیا ہے۔
امریکی نشریاتی ادارے سی این این کے مطابق امریکہ اور ایران کے درمیان زیرِ غور مفاہمتی یادداشت پر دستخط غالباً جنیوا میں ہوں گے، جبکہ بلومبرگ نے بھی اپنی رپورٹ میں امکان ظاہر کیا ہے کہ یہ معاہدہ شاید آئندہ اتوار کو طے پا جائے۔
مزید پڑھیں
یہ پیش رفت اس اعلان کے بعد سامنے آئی ہے جس میں امریکی صدر ڈونلڈ ٹرمپ نے ایران کے ساتھ جنگ کے خاتمے کے لیے ’بڑی مفاہمت‘ کا دعویٰ کیا تھا۔
ٹرمپ کا کہنا تھا کہ معاہدے پر دستخط آئندہ چند روز میں ہو سکتے ہیں اور تقریب میں امریکی نائب صدر جے ڈی وینس بھی شریک ہوں گے، تاہم ایرانی حکام نے تاحال کسی حتمی اتفاق کی تصدیق نہیں کی۔
سفارتی ذرائع کے مطابق معاہدے کی آخری دستاویز کو حتمی شکل دینے کا عمل جاری ہے، جبکہ ایرانی ذرائع ابلاغ کا کہنا ہے کہ مسودے کو نافذ العمل بنانے سے قبل متعلقہ حکام کی باضابطہ منظوری درکار ہوگی۔
العربیہ کے کئی ذرائع کے مطابق اس مفاہمتی یادداشت کو ’اعلانِ اسلام آباد‘ کا نام دیے جانے پر بھی غور کیا جا رہا ہے، جو گزشتہ کئی ماہ کے دوران پاکستان کی جانب سے ادا کیے گئے اہم سفارتی اور ثالثی کردار کے اعتراف کے طور پر دیکھا جا رہا ہے، اگرچہ اس نام کی ابھی سرکاری توثیق نہیں ہوئی۔
اطلاعات کے مطابق معاہدے کے مسودے میں 60 روزہ جنگ بندی میں توسیع، آبنائے ہرمز کی دوبارہ بحالی اور یورینیم کی بلند سطح کی افزودگی سے متعلق مذاکرات کا آغاز شامل ہے۔
اسی عرصے کے دوران فریقین ایرانی جوہری پروگرام کے مختلف پہلوؤں پر بھی بات چیت کریں گے۔
مجوزہ معاہدے میں ایران پر عائد امریکی پابندیوں میں نرمی اور محاصرے کے خاتمے کی شقیں بھی شامل ہیں، جبکہ کسی بھی ممکنہ خلاف ورزی کی نگرانی کے لیے ایک بین الاقوامی ثالث یا نگران فریق مقرر کرنے کی تجویز بھی زیر غور ہے۔
رپورٹس کے مطابق یہ مفاہمتی یادداشت صرف ایران اور امریکہ تک محدود نہیں بلکہ خطے کے دیگر تنازعات کو بھی محیط ہے۔
اس میں لبنان سمیت تمام محاذوں پر فوری اور مستقل جنگ بندی کی شق شامل ہے، جہاں اسرائیل اور حزب اللہ کے درمیان کشیدگی جاری ہے۔
جوہری معاملے کے حوالے سے مسودہ 60 روزہ مذاکراتی مدت تجویز کرتا ہے، جس کے دوران ایران کے جوہری پروگرام اور امریکی پابندیوں کے مکمل خاتمے سے متعلق حتمی معاہدے کی کوشش کی جائے گی۔
اس کے علاوہ مسودے میں ایران کے منجمد اثاثوں میں سے 24 ارب ڈالر جاری کرنے کی تجویز بھی شامل ہے۔
اطلاعات کے مطابق اس رقم کا نصف حصہ باضابطہ مذاکرات شروع ہونے سے قبل ایران کو دستیاب کرایا جا سکتا ہے۔
دوسری جانب ایرانی سرکاری ذرائع نے واضح کیا ہے کہ تہران کسی بھی معاہدے کے تحت آبنائے ہرمز پر اپنا انتظامی یا خودمختار کنٹرول ترک نہیں کرے گا اور نہ ہی وہ خطے میں فوجی کشیدگی سے قبل کی صورتحال کی طرف واپس جانے کا کوئی وعدہ کرے گا۔
سفارتی سرگرمیوں میں تیزی کے ساتھ اب تمام نظریں آنے والے چند دنوں پر مرکوز ہیں، جہاں یہ طے ہوگا کہ آیا یہ ابتدائی مفاہمت ایک تاریخی معاہدے کی شکل اختیار کرتی ہے یا خطے میں جاری غیر یقینی صورتحال برقرار رہتی ہے۔