مشرقِ وسطیٰ میں بڑھتی ہوئی کشیدگی اور ایران کے خلاف امریکی اسرائیلی جنگ کے باعث عالمی تیل منڈیوں میں شدید بے چینی دیکھنے میں آ رہی ہے۔
برینٹ خام تیل 111 ڈالر فی بیرل سے اوپر پہنچ گیا جبکہ امریکی خام تیل نے بھی کئی ہفتوں کی بلند ترین سطح چھو لی۔
امارات کے براکہ جوہری پلانٹ پر ڈرون حملے، آبنائے ہرمز میں خطرات اور ایران کے خلاف ممکنہ امریکی فوجی کارروائی کی خبروں نے سرمایہ کاروں کو تشویش میں مبتلا کر دیا ہے۔
مشرقِ وسطیٰ میں بڑھتی ہوئی کشیدگی اور ایران کے خلاف جاری امریکی اسرائیلی جنگ کے خاتمے کی کوششوں میں تعطل کے باعث پیر کے روز تیل کی قیمتوں میں ایک بار پھر نمایاں اضافہ دیکھا گیا۔
خطے میں جنگ کے پھیلاؤ اور آبنائے ہرمز کے ذریعے عالمی توانائی سپلائی متاثر ہونے کے خدشات نے عالمی منڈیوں کو تشویش میں مبتلا کر دیا ہے۔
کاروباری سرگرمیوں کے دوران برینٹ خام تیل کے سودے 111 ڈالر فی بیرل کی سطح سے بھی اوپر چلے گئے تاہم بعد میں کچھ منافع کم ہو گیا۔
مارکیٹ میں بے چینی اس وقت مزید بڑھی جب اطلاعات سامنے آئیں کہ متحدہ عرب امارات کے ایک جوہری پلانٹ پر ڈرون حملہ کیا گیا ہے، جبکہ امریکی صدر ڈونلڈ ٹرمپ ایران کے خلاف ممکنہ فوجی آپشنز پر غور کے لیے قومی سلامتی کے اعلیٰ حکام سے ملاقات کرنے والے ہیں۔
مزید پڑھیں
گرینچ وقت کے مطابق صبح 09:50 بجے برینٹ خام تیل کی قیمت میں 0.83 فیصد اضافہ ہوا اور یہ 110.2 ڈالر فی بیرل تک پہنچ گیا، جبکہ سیشن کے دوران اس نے 5 مئی کے بعد بلند ترین سطح بھی چھو لی۔
دوسری جانب امریکی ویسٹ ٹیکساس انٹرمیڈیٹ WTI خام تیل 1.04 فیصد اضافے کے ساتھ 106.5 ڈالر فی بیرل پر ٹریڈ کرتا رہا، اور اس دوران اپریل کے اختتام کے بعد بلند ترین سطح تک پہنچا۔
گزشتہ ہفتے دونوں اہم خام تیلوں کی قیمتوں میں 7 فیصد سے زائد اضافہ ریکارڈ کیا گیا تھا، کیونکہ سرمایہ کاروں کی جانب سے اس امید میں کمی آئی کہ آبنائے ہرمز میں جہازوں پر حملے اور قبضے روکنے کے لیے کوئی سیاسی معاہدہ جلد طے پا جائے گا۔
یہ صورتحال اس وقت مزید سنگین ہو گئی جب گزشتہ ہفتے امریکی صدر ڈونلڈ ٹرمپ اور چینی صدر شی جن پنگ کے درمیان ہونے والی ملاقات کسی واضح پیش رفت کے بغیر ختم ہو گئی۔
دنیا میں تیل درآمد کرنے والے سب سے بڑے ملک چین کی جانب سے تنازع ختم کرانے میں کردار ادا کرنے کے کوئی آثار سامنے نہیں آئے۔
امارات کے
براکہ جوہری پلانٹ
پر ڈرون حملے کی
تحقیقات جاری
امارات کے اندر حساس تنصیبات پر حملوں اور واشنگٹن و تہران کے درمیان سخت بیانات کے تبادلے نے بھی منڈیوں میں بے چینی کو بڑھا دیا ہے۔
اماراتی حکام نے تصدیق کی کہ براکہ جوہری توانائی پلانٹ پر ہونے والے حملے کے ذرائع کی تحقیقات جاری ہیں، اور متحدہ عرب امارات کو ایسے دہشت گرد حملوں کا بھرپور جواب دینے کا مکمل حق حاصل ہے۔
العربیہ کے مطابق مارکیٹ تجزیہ کار ٹونی سیکامور نے کہا کہ ڈرون حملے دراصل ایک واضح انتباہ ہیں کہ اگر ایران پر دوبارہ امریکی یا اسرائیلی حملے کیے گئے تو خلیج میں توانائی کے مراکز اور اہم انفراسٹرکچر مزید حملوں کی زد میں آ سکتے ہیں، چاہے وہ ایران کی جانب سے ہوں یا اس کے اتحادی گروپوں کی طرف سے۔
اسی دوران ویب سائٹ ایکسیوس نے رپورٹ کیا کہ امریکی صدر ڈونلڈ ٹرمپ منگل کے روز قومی سلامتی کے سینئر حکام کے ساتھ اجلاس کریں گے، جس میں ایران کے خلاف ممکنہ فوجی کارروائی کے مختلف آپشنز پر غور کیا جائے گا۔
یہ پیش رفت آنے والے دنوں میں عالمی مارکیٹوں میں مزید اتار چڑھاؤ کا سبب بن سکتی ہے۔
دوسری جانب محفوظ سرمایہ کاری سمجھے جانے والے سونے کی قیمتوں میں بھی معمولی اضافہ ریکارڈ کیا گیا۔
اسپاٹ گولڈ 0.1 فیصد بڑھ کر 4543.4 ڈالر فی اونس تک پہنچ گیا جبکہ جون کے امریکی گولڈ فیوچر 0.4 فیصد کمی کے ساتھ 4544.5 ڈالر پر آ گئے۔
سرمایہ کار بڑھتے جغرافیائی سیاسی خطرات کے باعث محفوظ اثاثوں کا رخ کر رہے ہیں۔
اسپاٹ گولڈ نے مارکیٹ کھلتے ہی کم تر قیمت 4479 ڈالر تک پہنچ گیا جبکہ اس وقت جب یہ سطور تحریر کی جارہی تھیں، گولڈ 4545 ڈالر پر ٹریڈ ہو رہا ہے۔