دنیا کے امیر ترین شخص ایلون مسک اپنی کمپنی ’اسپیس ایکس‘ کے تاریخی آئی پی او کے بعد دنیا کے پہلے ایک ٹریلین ڈالر دولت رکھنے والے انسان بننے کے قریب پہنچ گئے ہیں۔
کمپنی کی متوقع مارکیٹ ویلیو میں اضافے سے مسک کی دولت نئی بلندیوں کو چھو سکتی ہے۔
ایلون مسک، جو اس وقت دنیا کے امیر ترین شخص ہیں، ایک ایسے تاریخی مرحلے کے قریب دکھائی دیتے ہیں جو دولت کے تصور کو ہی بدل سکتا ہے۔
ان کی کمپنیوں کی مالیت میں برسوں سے جاری غیرمعمولی اضافے کے بعد اب ایک کھرب ڈالر (ٹریلین ڈالر) کی دولت تک پہنچنا محض ایک خواب یا اندازہ نہیں رہا بلکہ اسپیس ایکس کے باضابطہ عوامی شیئر فروخت ’آئی پی او‘ کے اعلان کے بعد یہ ہدف حقیقت کے بہت قریب آ گیا ہے۔
ایلون مسک کی دولت کا بڑا حصہ ان کی کمپنیوں میں موجود حصص سے جڑا ہوا ہے، جن میں نمایاں نام ’ٹیسلا‘ اور ’اسپیس ایکس‘ ہیں، جو خود عالمی معیشت میں بڑی طاقت بن چکی ہیں۔
مزید پڑھیں
ٹیسلا اب صرف ایک الیکٹرک گاڑیاں بنانے والی کمپنی نہیں رہی، بلکہ صاف توانائی اور جدید ٹیکنالوجی کے شعبے میں تبدیلی کی قیادت کرنے والا ایک بڑا پلیٹ فارم بن چکی ہے۔
دوسری جانب مسک اسپیس ایکس کو اپنی کاروباری سلطنت کا سب سے قیمتی اثاثہ تصور کرتے ہیں، خاص طور پر حالیہ عرصے میں مصنوعی ذہانت کی کمپنی ایکس اے آئی کے انضمام کے بعد، جس کے نتیجے میں
کمپنی کی مجموعی مالیت تقریباً 1.25 کھرب ڈالر تک پہنچ گئی ہے۔
اسپیس ایکس سیٹلائٹ لانچنگ کے شعبے میں تقریباً اجارہ داری کی حیثیت رکھتی ہے، جبکہ اسٹارلنک منصوبے کے ذریعے خلائی انٹرنیٹ کے میدان میں بھی اس کے بڑے عزائم ہیں۔
بلوم برگ بلینیئرز انڈیکس کے مطابق اس وقت ایلون مسک کی مجموعی دولت تقریباً 676 ارب ڈالر ہے۔
اس میں سب سے بڑا حصہ اسپیس ایکس کا ہے، جس کی مالیت تقریباً 430 ارب ڈالر بتائی جا رہی ہے، جبکہ باقی دولت ٹیسلا، بورنگ کمپنی اور دیگر اداروں میں ان کے حصص سے وابستہ ہے۔
اسپیس ایکس میں
ایلون مسک کی
ملکیت تقریباً
44 فیصد ہے
رپورٹ کے مطابق اسپیس ایکس میں ایلون مسک کی ملکیت تقریباً 44 فیصد ہے۔
حالیہ انضمام سے پہلے کمپنی کی حقیقی مالیت 1.03 کھرب ڈالر کے قریب تھی، جبکہ انضمام کے بعد اس کی مجموعی مالیت 1.25 کھرب ڈالر تک پہنچ گئی۔
اب ناسڈاک میں تاریخ کے ممکنہ سب سے بڑے آئی پی او کے اعلان کے بعد اندازہ لگایا جا رہا ہے کہ اسپیس ایکس کی مارکیٹ ویلیو 1.75 کھرب ڈالر تک پہنچ سکتی ہے۔
اگر ایسا ہوا تو اسپیس ایکس میں ایلون مسک کے حصص کی مالیت تقریباً 770 ارب ڈالر ہو جائے گی، اور ان کی مجموعی دولت میں تقریباً 340 ارب ڈالر کا مزید اضافہ ہو سکتا ہے۔
ایسی صورت میں ایلون مسک دنیا کی تاریخ کے پہلے ایسے انسان بن سکتے ہیں جن کی مجموعی دولت ایک کھرب ڈالر ’ایک ٹریلین ڈالر‘ سے تجاوز کر جائے گی۔