امریکہ، اسرائیل اور ایران کے درمیان کشیدگی کے باعث فضائی ایندھن مہنگا ہونے سے حج کے سفری اخراجات میں اضافہ ہوا تاہم انڈونیشیا نے اپنے حجاج کو ریلیف دیتے ہوئے اضافی لاگت خود برداشت کرنے کا فیصلہ کیا ہے۔
حکومت نے واضح کیا کہ حج پروازوں کے شیڈول معمول کے مطابق جاری ہیں اور کسی قسم کی تاخیر نہیں ہوئی۔
اس سال تقریباً 2 لاکھ 21 ہزار انڈونیشی حجاج نے پیچیدہ جغرافیائی اور معاشی حالات کے باوجود مقدس سرزمین کی جانب اپنے روحانی سفر کا آغاز کیا۔
امریکہ، اسرائیل اور ایران کے درمیان حالیہ کشیدگی اور جنگی صورتحال کے باعث پیدا ہونے والے خدشات کے باوجود حجاج کی پروازوں کے شیڈول معمول کے مطابق جاری رہے اور کسی بھی پرواز میں تاخیر ریکارڈ نہیں کی گئی، حالانکہ کئی ایئرلائنز نے اپنی پروازوں کے راستے تبدیل کیے۔
مزید پڑھیں
الجزیرہ کی رپورٹ کے مطابق خطے میں بڑھتی ہوئی کشیدگی کے سبب طیاروں کے ایندھن کی قیمتوں میں اضافہ ہوا، جس کے نتیجے میں سفری اخراجات بھی بڑھ گئے۔
اس معاشی چیلنج سے نمٹنے کے لیے انڈونیشیا کے نائب وزیر حج و عمرہ، داہنيل انزار نے اعلان کیا کہ صدرِ مملکت کی ہدایات کے مطابق حکومت اضافی اخراجات خود قومی بجٹ سے ادا کرے گی تاکہ حجاج
پر ایندھن کی بڑھتی قیمتوں کا اضافی بوجھ نہ پڑے۔
تاہم یہ حکومتی سہولت عمرہ زائرین کے لیے شامل نہیں کی گئی، جہاں توانائی بحران کے باعث فی شخص سفر کی لاگت میں سینکڑوں ڈالر کا اضافہ ریکارڈ کیا گیا۔
گزشتہ سال تقریباً 25 لاکھ انڈونیشی شہری عمرہ کی ادائیگی کے لیے سعودی عرب گئے تھے۔
یہ صورتحال ایسے وقت میں سامنے آئی ہے جب انڈونیشیا نے چند ماہ قبل حج اور عمرہ کے لیے الگ وزارت قائم کی ہے۔
اس سے قبل کئی دہائیوں تک یہ شعبہ وزارتِ مذہبی امور کے تحت چلایا جاتا تھا۔
نئی وزارت کا مقصد لاکھوں حجاج کی جمع شدہ رقوم اور سرمایہ کاری کے نظام پر نگرانی مزید مضبوط بنانا ہے، جنہیں ایک خودمختار ادارہ چلاتا ہے۔
اس حوالے سے انڈونیشی مذہبی امور کمیٹی کے نائب سربراہ نے کہا کہ حج فنڈز کے انتظام سے متعلق قانون میں تبدیلیوں کا مقصد ان رقوم کو محفوظ بنانا اور بہتر سرمایہ کاری کے ذریعے زیادہ منافع حاصل کرنا ہے تاکہ مستقبل میں حج کے اخراجات کم کیے جا سکیں۔
مغربی جاوا کے كيرتجاتی ایئرپورٹ پر موجود حاجی ييان سفيان، جنہوں نے 13 سال انتظار کے بعد حج کی سعادت حاصل کی، نے مشرقِ وسطیٰ کی صورتحال پر ابتدائی خدشات کا اظہار کیا، تاہم انہوں نے اس امید کا اظہار بھی کیا کہ مسائل حل ہو جائیں گے۔
انہوں نے اطمینان ظاہر کیا کہ حج سیزن کورونا وبا کے دور کی طرح متاثر یا منسوخ نہیں ہوا۔
انڈونیشیا کے لیے حج سیزن کا باقاعدگی سے جاری رہنا انتہائی اہم سمجھا جاتا ہے کیونکہ اگر کسی بھی وجہ سے حج مؤخر ہوا تو انتظار کی فہرست میں شامل تقریباً 60 لاکھ انڈونیشی شہریوں کا سفر مزید کئی برسوں کے لیے تاخیر کا شکار ہو سکتا ہے۔