آبنائے ہرمز میں امریکی صدر ڈونلڈ ٹرمپ کی جانب سے شروع کئے گئے ’پروجیکٹ فریڈم‘ کے پہلے دن کے اختتام پر صورتحال غیر واضح رہی کیونکہ اعلان کردہ مقصد—پھنسے ہوئے جہازوں کو آزاد کرانا—ابھی تک عملی طور پر حاصل ہوتا نظر نہیں آیا۔
اندازوں کے مطابق، امریکہ، اسرائیل جنگ کے آغاز کے 66 دن بعد بھی تقریباً دو ہزار جہاز اس اہم آبی گزرگاہ اور اس کے اطراف میں پھنسے ہوئے ہیں۔
پیر کے روز شروع ہونے والے اس منصوبے کو مبصرین نے ’غیر واضح حکمت عملی‘ قرار دیا جبکہ امریکہ اور ایران کے درمیان کشیدگی مزید بڑھ گئی۔
مزید پڑھیں
ایران نے دعویٰ کیا کہ اس نے ایک امریکی جنگی جہاز کو روکنے کے لیے انتباہی فائرنگ کی تاہم واشنگٹن نے اس کی تردید کر دی۔
صدر ٹرمپ نے کہا کہ امریکی افواج نے 7 ایرانی کشتیاں غرق کر دیں۔
انہوں نے سوشل میڈیا پلیٹ فارم ٹروتھ سوشل پر دعویٰ کیا کہ آبنائے ہرمز میں جہازوں کے گزرنے کے دوران کوئی بڑا نقصان نہیں ہوا، سوائے ایک جنوبی کوریائی جہاز کے۔
ٹرمپ نے فاکس کو انٹرویو دیتے ہوئے ایران کو خبردار کیا کہ اگر اس نے امریکی جہازوں پر حملہ کیا تو اسے صفحۂ ہستی سے مٹا دیا جائے گا۔
انہوں نے یہ بھی کہا کہ امریکی فوجی تعیناتی مسلسل جاری ہے اور ضرورت پڑنے پر جدید ہتھیار استعمال کیے جائیں گے۔
امریکی مرکزی کمان ’سینٹکام‘ نے بتایا کہ اس نے آبنائے ہرمز میں 50 تجارتی جہازوں کا راستہ تبدیل کیا تاکہ ایران پر عائد پابندیوں پر عمل درآمد یقینی بنایا جا سکے۔
کمانڈر بریڈ کوپر کے مطابق خلیج میں موجود جہاز دنیا کے 87 ممالک کی نمائندگی کرتے ہیں، اور شپنگ کمپنیوں سے رابطے جاری ہیں تاکہ جہازوں کی آمد و رفت بحال کی جا سکے۔
تقریباً 2000 جہاز
اب بھی ہرمز
کے اطراف
پھنسے ہوئے
تاہم آبنائے سے گزرنے والے جہازوں کی تعداد کے حوالے سے شدید تضاد سامنے آیا۔
امریکی حکام نے دو امریکی تجارتی جہازوں کے کامیاب گزرنے کا دعویٰ کیا، جبکہ بحری ڈیٹا کے مطابق صرف محدود تعداد میں جہاز ہی گزر سکے۔
ایران نے ان دعوؤں کی مکمل تردید کرتے ہوئے کہا کہ کوئی بھی جہاز آبنائے سے نہیں گزرا اور امریکی بیانات بے بنیاد ہیں۔
ایرانی پاسداران انقلاب نے خبردار کیا کہ ان کی پالیسیوں کے خلاف کسی بھی بحری سرگرمی کو سخت ردعمل کا سامنا کرنا پڑے گا، اور خلاف ورزی کرنے والے جہازوں کو طاقت کے ذریعے روکا جائے گا۔
اس صورتحال نے عالمی شپنگ کمپنیوں میں شدید خوف پیدا کر دیا ہے۔
جرمن کمپنی Hapag-Lloyd نے کہا کہ غیر یقینی سکیورٹی حالات کے باعث اس کے جہازوں کا گزرنا فی الحال ممکن نہیں۔
بین الاقوامی شپنگ تنظیم بيمکو نے بھی کہا کہ اسے امریکی آپریشن کے بارے میں واضح ہدایات نہیں ملیں، جبکہ سکیورٹی صورتحال اب بھی خطرناک ہے۔
ایک یورپی جہاز مالک کے مطابق، مستقل جنگ بندی کے بغیر جہازوں کی نقل و حرکت شروع نہیں ہو سکتی۔
اس بحران کے نتیجے میں دو ماہ سے زائد عرصے سے ہزاروں جہاز پھنسے ہوئے ہیں، جن پر 20 ہزار سے زائد ملاح موجود ہیں، جو شدید دباؤ کا شکار ہیں۔
اقوام متحدہ کے مطابق یہ صورتحال دوسری جنگ عظیم کے بعد بڑی سمندری رکاوٹ ہے۔
اعداد و شمار کے مطابق جہاں پہلے روزانہ تقریباً 100 جہاز گزرتے تھے، اب جنگ کے بعد صرف 342 جہاز ہی گزر سکے ہیں جس سے عالمی توانائی اور تجارت متاثر ہوئی ہے۔
پاسداران کا انتباہ:
خلاف ورزی پر
طاقت کا
استعمال ہوگا
پہلے دن کے دوران کشیدگی میں عملی اضافہ بھی دیکھا گیا۔
امریکی جنگی جہاز خلیج میں داخل ہوئے، جبکہ ایران نے ان کے قریب انتباہی میزائل فائر کئے۔ اسی دوران ایک اماراتی آئل ٹینکر پر ڈرون حملہ اور ایک جنوبی کوریائی جہاز پر دھماکے کی اطلاعات بھی سامنے آئیں۔
امریکی حکام کے مطابق فوج کو اختیار دیا گیا ہے کہ وہ کسی بھی براہ راست خطرے کو نشانہ بنائے، جبکہ ایران نے کہا کہ آبنائے ہرمز میں کسی بھی نقل و حرکت کے لیے اس کی اجازت ضروری ہوگی۔
ماہرین کے مطابق پروجیکٹ فریڈم امریکی حکمت عملی میں تبدیلی کی عکاسی کرتا ہے، جہاں اب توجہ فوجی اہداف سے ہٹ کر اقتصادی پہلو، خاص طور پر آبنائے ہرمز، پر مرکوز ہو گئی ہے۔
انہوں نے خبردار کیا کہ سمندر میں کسی بھی جھڑپ کے بڑے تصادم میں بدلنے کا خطرہ موجود ہے، جبکہ امریکہ کے پاس محدود وسائل ہیں۔
دوسری جانب امریکہ اور ایران کے درمیان پاکستان کی ثالثی میں مذاکرات جاری ہیں تاہم اب تک کوئی حتمی معاہدہ نہیں ہو سکا۔
ایران مستقل جنگ بندی چاہتا ہے، جبکہ امریکہ پہلے آبنائے ہرمز کی بندش ختم کرنے کا مطالبہ کر رہا ہے۔
مجموعی طور پر، صورتحال بدستور کشیدہ ہے اور آبنائے ہرمز عالمی توجہ کا مرکز بنا ہوا ہے۔ یہ واضح نہیں کہ یہ بحران کسی بڑی ڈیل پر ختم ہوگا یا ایک وسیع علاقائی تصادم میں تبدیل ہو جائے گا۔