امریکہ اور ایران کے درمیان جاری کشیدگی کے باوجود سفارتی محاذ پر اہم پیش رفت سامنے آئی ہے، جہاں حالیہ دنوں میں دونوں ممالک کے درمیان مذاکرات میں نمایاں بہتری کے اشارے ملے ہیں۔
امریکی ایلچی وٹکوف نے تصدیق کی ہے کہ واشنگٹن اور تہران کے درمیان بات چیت جاری ہے، جبکہ باخبر ذرائع کے مطابق ان مذاکرات میں حالیہ عرصے کے دوران قابلِ ذکر پیش رفت ہوئی ہے۔
پاکستانی میڈیا کے حوالے سے بتایا گیا ہے کہ سفارتی سطح پر حقیقی موقع پیدا ہو رہا ہے، جو ممکنہ طور پر تعطل کے خاتمے اور کسی بڑے بریک تھرو کا سبب بن سکتا ہے۔
مزید پڑھیں
ذرائع کا کہنا ہے کہ آنے والے چند دن مذاکرات کے مستقبل کے لیے نہایت اہم ہوں گے کیونکہ اسی دوران حتمی سمت کا تعین متوقع ہے۔
تاہم اس پیش رفت کے باوجود اختلافات بدستور موجود ہیں۔ امریکی صدر ڈونلڈ ٹرمپ نے حال ہی میں ایران کی جانب سے پیش کئے گئے
نظرثانی شدہ منصوبے کو مسترد کرتے ہوئے اسے اپنی حکومت کے لیے ’غیر تسلی بخش‘ قرار دیا۔ ایک انٹرویو میں انہوں نے کہا کہ مذاکرات اس وقت تعطل کا شکار ہیں اور ایرانی پیشکش قابل قبول نہیں۔
دوسری جانب ایران نے تصدیق کی ہے کہ اسے اپنے 14 نکاتی منصوبے پر امریکی ردعمل موصول ہو چکا ہے، جس کا فی الوقت جائزہ لیا جا رہا ہے۔
ایرانی وزارت خارجہ کے ترجمان اسماعیل بقائی کے مطابق اس مرحلے پر جوہری پروگرام سے متعلق براہِ راست مذاکرات نہیں ہو رہے۔
پاکستان فعال
ثالث کے طور پر
کردار ادا
کر رہا ہے
ایرانی تجویز میں کئی اہم نکات شامل ہیں، جن میں خطے سے امریکی افواج کا انخلا، ایران پر عائد بحری محاصرہ ختم کرنا، منجمد اثاثوں کی رہائی، پابندیوں کا خاتمہ اور جنگ کا مکمل اختتام شامل ہے۔
تاہم جوہری پروگرام پر بات چیت کو مؤخر کرنے کی ایرانی شرط، واشنگٹن کے اس مطالبے سے متصادم ہے جس میں وہ فوری اور سخت پابندیوں کا خواہاں ہے۔
ادھر پاکستان مسلسل ثالثی کا کردار ادا کر رہا ہے اور اپریل 2026 سے دونوں ممالک کے درمیان فاصلے کم کرنے کی کوششیں جاری رکھے ہوئے ہے۔
پاکستانی وزیر خارجہ اسحاق ڈار نے اپنے ایرانی ہم منصب عباس عراقچی سے ٹیلیفونک رابطہ کیا، جس میں خطے کی صورتحال اور سفارتی کوششوں پر تبادلہ خیال کیا گیا۔
Deputy Prime Minister / Foreign Minister Senator Mohammad Ishaq Dar @MIshaqDar50 held a telephonic conversation late last night with the Foreign Minister of Iran, Seyed Abbas Araqchi @Araghchi.
— Ministry of Foreign Affairs - Pakistan (@ForeignOfficePk) May 4, 2026
Discussion focused on regional situation and Pakistan’s ongoing diplomatic efforts… pic.twitter.com/B5PN7DhnEN
پاکستان نے ایک بار پھر اس عزم کا اعادہ کیا ہے کہ خطے میں دیرپا امن کے لیے مکالمہ اور سفارتکاری ہی واحد قابلِ عمل راستہ ہے۔
ایرانی وزیر خارجہ نے بھی پاکستان کی کوششوں کو سراہتے ہوئے اسے ایک مثبت اور تعمیری کردار قرار دیا۔
اگرچہ صدر ڈونلڈ ٹرمپ نے ایرانی تجویز پر تنقید کی تاہم انہوں نے حالیہ بیانات میں مذاکرات کو ’انتہائی مثبت‘ بھی قرار دیا اور عندیہ دیا کہ یہ بات چیت بالآخر سب کے لیے بہتر نتائج لا سکتی ہے۔
ذرائع کے مطابق ایران کی جانب سے حالیہ ترمیم شدہ تجویز میں کچھ لچک دکھائی گئی ہے، جس سے اس بات کی امید پیدا ہوئی ہے کہ 28 فروری کو شروع ہونے والی جنگ کے خاتمے کے لیے کوئی درمیانی راستہ نکل سکتا ہے۔