تیل کی قیمتوں نے آج پیر کے روز اپنی بڑھوتری کا سلسلہ جاری رکھا، جہاں تقریباً 2 فیصد اضافہ دیکھا گیا۔
اس کی وجہ امریکا اور ایران کے درمیان امن مذاکرات میں تعطل اور آبنائے ہرمز سے محدود بحری آمدورفت ہے، جس کے باعث عالمی تیل کی سپلائی دباؤ کا شکار ہے۔
گرینچ وقت کے مطابق صبح 07:45 بجے، برینٹ خام تیل کے فیوچرز 2.64 ڈالر یا 2.51 فیصد اضافے کے ساتھ 108 ڈالر فی بیرل تک پہنچ گئے، جبکہ امریکی ویسٹ ٹیکساس انٹرمیڈیٹ (WTI) 2.25 ڈالر یا 2.38 فیصد اضافے کے بعد 96.65 ڈالر فی بیرل پر پہنچ گیا۔
مزید پڑھیں
گزشتہ ہفتے کے دوران، برینٹ اور WTI میں بالترتیب تقریباً 17 فیصد اور 13 فیصد اضافہ ہوا، جو جنگ کے آغاز کے بعد سب سے بڑی ہفتہ وار بڑھوتری ہے۔
ہفتے کے آغاز پر امن کی امیدوں کو اس وقت دھچکا لگا جب امریکی صدر ڈونلڈ نے اپنے نمائندوں کا اسلام آباد کا طے شدہ دورہ منسوخ کر دیا حالانکہ ایرانی وزیر خارجہ عباس عراقچی پاکستان پہنچ چکے تھے۔
آئی جی IG کے مارکیٹ تجزیہ کار ٹونی سِیکامور کے مطابق، اس فیصلے کے بعد گیند براہِ راست ایران کے کورٹ میں آ گئی ہے اور وقت تیزی سے گزر رہا ہے۔
انہوں نے خبردار کیا کہ اگر ذخیرہ کرنے کی گنجائش ختم ہو گئی تو تہران کو اپنے پرانے تیل کے میدانوں میں پیداوار روکنا پڑ سکتی ہے۔
تہران نے آبنائے ہرمز کو بڑی حد تک بند کر رکھا ہے جبکہ واشنگٹن نے ایرانی بندرگاہوں پر ناکہ بندی نافذ کر دی ہے۔
ڈیٹا کمپنی کیپلر کے مطابق اتوار کے روز صرف ایک آئل پروڈکٹ ٹینکر آبنائے ہرمز سے خلیج کی جانب گزر سکا۔
ایک ہفتے میں 17 فیصد تک بڑا اضافہ، جنگ کے بعد سب سے بڑی چھلانگ
دوسری جانب Goldman Sachs نے تیل کی قیمتوں کے اپنے اندازے بڑھاتے ہوئے چوتھی سہ ماہی کے لیے برینٹ کی قیمت 90 ڈالر اور WTI کی 83 ڈالر فی بیرل مقرر کی ہے، جس کی وجہ مشرق وسطیٰ میں پیداوار میں کمی بتائی گئی ہے۔
بینک کے تجزیہ کاروں کا کہنا ہے کہ معاشی خطرات توقعات سے زیادہ ہیں، کیونکہ تیل کی قیمتوں میں اضافے، ریفائنڈ مصنوعات کی غیر معمولی مہنگائی اور ممکنہ قلت جیسے عوامل عالمی معیشت پر دباؤ بڑھا سکتے ہیں۔
اسی دوران ایکسیوس کے مطابق ایران نے امریکا کو ایک نئی تجویز پیش کی ہے، جس میں آبنائے ہرمز کو دوبارہ کھولنے اور فوجی کشیدگی ختم کرنے کے بدلے جوہری مذاکرات کو مؤخر کرنے کی بات کی گئی ہے۔
یہ تجویز پاکستانی ثالثوں کے ذریعے پہنچائی گئی، جس میں موجودہ جنگ بندی کو توسیع دے کر مستقل معاہدے کی راہ ہموار کرنے کا عندیہ دیا گیا ہے جبکہ جوہری مذاکرات امریکی پابندیاں ہٹنے کے بعد شروع کیے جائیں گے۔
امریکی حکام کے مطابق اس تجویز کا جائزہ سفارتی سطح پر لیا جا رہا ہے تاہم کسی بھی ممکنہ معاہدے میں امریکی اسٹریٹجک مفادات کو مدنظر رکھا جائے گا۔