صرف 40 دنوں پر محیط ایران، امریکا اور اسرائیل کے مابین جنگ نے ایرانی بنیادی ڈھانچے کو تباہی کے دہانے پر پہنچا دیا ہے۔
مزید پڑھیں
العربیہ کے مطابق اس مختصر مدت میں تہران کو وسیع پیمانے پر جانی، مالی اور صنعتی نقصانات کا سامنا کرنا پڑا ہے، جس کے اثرات طویل عرصے تک برقرار رہیں گے۔
145 ارب ڈالر کے معاشی نقصانات
ایک رپورٹ کے مطابق ایران کو اس جنگ میں 140 سے 145 ارب ڈالر کے بھاری معاشی نقصانات اٹھانا پڑے ہیں۔
ہلال احمر کے صدر پیر حسین کولیوند کے مطابق جنگ میں ایک لاکھ 25 ہزار سے زائد غیر عسکری تنصیبات متاثر ہوئیں، جن میں ایک لاکھ رہائشی مکانات شامل ہیں۔
تعلیمی اور طبی مراکز پر کاری ضرب
جنگ کے دوران 339 طبی مراکز بشمول اسپتال اور لیبارٹریز شدید متاثر ہوئی ہیں۔
اسی طرح 32 جامعات اور 857 تعلیمی ادارے و اسکول بھی نشانہ بنے ہیں۔ ہلال احمر کے 20 مراکز کو براہ راست حملوں کا سامنا کرنا پڑا، جبکہ امدادی گاڑیوں اور ایمبولینسوں کو بھی بھاری نقصان پہنچا۔
توانائی اور نقل و حمل کے شعبوں کو نقصان
ایران کے بنیادی ڈھانچے کے 15 اہم مراکز اور 5 بڑے فیول ٹینک جنگ کے دوران تباہ کر دیے گئے۔
اس کے علاوہ ہوائی اڈوں اور سول ایوی ایشن کے طیاروں کو بھی شدید نقصان پہنچا۔ امدادی کارروائیوں کے دوران 49 ریسکیو گاڑیاں اور 43 ایمبولینسیں بھی تباہ ہوئیں، جس سے انسانی ہمدردی کا کام شدید متاثر ہوا۔
عسکری صلاحیتوں کا خاتمہ
امریکی سینٹ کام کے کمانڈر ایڈمرل بریڈ کوپر نے ایران کی شکست کو تاریخی قرار دیا ہے۔
واشنگٹن پوسٹ کے مطابق ایران کے اہم میزائل مراکز خوجیر، پارشین، حکیمیہ اور شاہرود سمیت 29 لانچ سائٹس کو شدید نقصان پہنچا، جس سے ایران کی بیلسٹک میزائل تیار کرنے کی صلاحیت مفلوج ہو کر رہ گئی ہے۔
مستقبل کے امکانات اور جنگ بندی
سیٹلائٹ تصاویر سے واضح ہے کہ ایران کے زیر زمین ذخائر تک رسائی عارضی طور پر رک گئی ہے اور میزائل پیداوار معطل ہے۔
40 دن کے مسلسل حملوں کے بعد امریکی صدر ڈونلڈ ٹرمپ کے اعلان سے جنگ بندی عمل میں آئی، تاہم ایران کو بحالی کے لیے طویل عمل درکار ہوگا۔
اس 40 روزہ جنگ نے ایران کی دفاعی اور معاشی ریڑھ کی ہڈی کو بری طرح توڑ دیا ہے۔
اب تہران کے لیے سب سے بڑا چیلنج تباہ شدہ بنیادی ڈھانچے کی بحالی اور اپنی دفاعی صلاحیتوں کو دوبارہ منظم کرنا ہے۔ خطے میں اس کے طویل المدتی سیاسی اور عسکری اثرات نمایاں ہوں گے۔