امریکی میڈیا کے مطابق صدر ڈونلڈ ٹرمپ نے ایران سے مطالبہ کیا ہے کہ وہ جوہری پروگرام سے متعلق مخصوص رعایتوں اور وعدوں کو تحریری شکل میں پیش کرے۔
واشنگٹن کا مؤقف ہے کہ زبانی یقین دہانیاں کافی نہیں، جبکہ خطے میں کشیدگی اور ایران کے مبینہ حملوں کے باعث مذاکراتی عمل مزید پیچیدہ ہو گیا ہے۔
امریکی نشریاتی ادارے اے بی سی نیوز نے بدھ کے روز امریکی حکام کے حوالے سے رپورٹ کیا کہ صدر ڈونلڈ ٹرمپ تہران سے مطالبہ کر رہے ہیں کہ وہ ابتدائی معاہدے کے حصے کے طور پر اپنے جوہری پروگرام سے متعلق مخصوص ضمانتیں تحریری شکل میں فراہم کرے۔
امریکی حکام کے مطابق ایرانی مذاکرات کار ماضی میں زبانی یقین دہانیاں دیتے رہے ہیں کہ ایرانی حکومت بالآخر جوہری پروگرام سے متعلق بعض شرائط کو قبول کر لے گی، تاہم ٹرمپ نے حالیہ اجلاس میں یہ مؤقف اختیار کیا کہ ایرانی وعدے مطلوبہ حد تک مضبوط اور قابلِ اعتماد نہیں ہیں۔
مزید پڑھیں
دوسری جانب امریکی وزیر خارجہ مارکو روبیو نے کل منگل کو ایوانِ نمائندگان اور سینیٹ میں سماعتوں کے دوران واضح کیا کہ اگر ایران آبنائے ہرمز کھول بھی دے تو واشنگٹن اس پر عائد پابندیاں ختم نہیں کرے گا، کیونکہ یہ پابندیاں ایران کے جوہری پروگرام سے متعلق ہیں، نہ کہ آبنائے ہرمز کے معاملے سے۔
روبیو نے یہ بھی کہا کہ ایرانی فریق جوہری پروگرام ترک کرنے سے متعلق
مذاکرات پر آمادہ ہو چکا ہے۔
العربیہ کے مطابق ادھر خلیج میں تازہ پیش رفت کے تحت کویت کی جنرل اتھارٹی آف سول ایوی ایشن نے اعلان کیا کہ ایرانی ڈرونز نے کویت انٹرنیشنل ایئرپورٹ کے ٹرمینل ون کو نشانہ بنایا گیا، جس کے نتیجے میں متعدد افراد زخمی ہوئے جبکہ ہوائی اڈے کی کئی تنصیبات کو شدید نقصان پہنچا۔
کویتی سول ایوی ایشن کے بیان کے مطابق تمام پروازیں عارضی طور پر معطل کر دی گئی ہیں اور آنے والی پروازوں کو متبادل ہوائی اڈوں کی جانب موڑ دیا گیا ہے۔
اس سے قبل کویتی فوج نے اعلان کیا تھا کہ دشمن کے میزائلوں اور ڈرون حملوں کا مقابلہ کرنے کے لیے فضائی دفاعی نظام فعال کر دیا گیا ہے۔
فوج کے مطابق سنے جانے والے دھماکوں کی آوازیں فضائی دفاعی نظام کی جانب سے حملوں کو ناکام بنانے کے دوران پیدا ہوئیں۔
ادھر بحرین کی وزارت داخلہ نے ہنگامی سائرن بجانے کا اعلان کرتے ہوئے شہریوں اور مقیم افراد کو قریبی محفوظ مقامات پر منتقل ہونے کی ہدایت کی۔
امریکی فوج نے بھی دعویٰ کیا ہے کہ گزشتہ چند گھنٹوں کے دوران ایران کی جانب سے مختلف اہداف پر کیے گئے متعدد حملے ناکام بنا دیے گئے۔
امریکی سینٹرل کمانڈ ’سینٹکام‘ نے بتایا کہ کویت اور بحرین کی جانب داغے گئے میزائلوں اور ڈرونز کو کامیابی سے روکا گیا۔
بیان کے مطابق ایران کی جانب سے علاقائی پانیوں سے گزرنے والے شہری ملاحوں کی طرف بھیجے گئے 3 ڈرونز بھی مار گرائے گئے۔
سینٹکام نے مزید کہا کہ ایرانی حملوں کے جواب میں جزیرہ قشم میں واقع ایک فوجی زمینی کنٹرول اسٹیشن پر دفاعی نوعیت کی کارروائی کی گئی۔
امریکی فوج نے ایرانی دعوؤں کو مسترد کرتے ہوئے کہا کہ بحرین میں امریکی ففتھ فلیٹ کے ہیڈکوارٹر یا کسی فضائی اڈے کو نشانہ نہیں بنایا گیا۔
دوسری طرف سپاہِ پاسداران انقلاب نے دعویٰ کیا کہ اس نے ’بانایا‘ نامی ایک امریکی جہاز پر میزائل حملہ کیا ہے، اور کہا کہ یہ کارروائی قشم جزیرے کے جنوب میں اس کے مواصلاتی ٹاور پر امریکی حملے کے جواب میں کی گئی۔