خلیج میں کشیدگی ایک بار پھر خطرناک موڑ پر پہنچ گئی ہے۔
ایران کی جانب سے میزائل اور ڈرون حملوں کے بعد کویت انٹرنیشنل ایئرپورٹ کا ٹرمینل ون متاثر ہوا اور فضائی آپریشن معطل کر دیے گئے۔
دوسری جانب امریکا نے جوابی کارروائی کرتے ہوئے جزیرہ قشم میں ایرانی فوجی کنٹرول اسٹیشن پر حملہ کیا، جبکہ کئی ایرانی میزائل اور ڈرون بھی مار گرانے کا دعویٰ کیا ہے۔
امریکی سینٹرل کمانڈ ’سینٹکام‘ نے آج بدھ کے روز اعلان کیا کہ اس نے ایران کے جزیرہ قشم میں ایک فوجی مقام پر دفاعی فضائی حملے کیے ہیں۔
امریکی حکام کے مطابق یہ کارروائی ایران کی جانب سے مشرقِ وسطیٰ میں امریکی اور اتحادی مفادات کو نشانہ بنانے کی کوششوں کے جواب میں کی گئی جبکہ متعدد ایرانی بیلسٹک میزائلوں اور ڈرونز کو بھی تباہ کر دیا گیا۔
سینٹکام نے ایکس پر جاری بیان میں کہا ہے کہ امریکی اور اتحادی افواج نے 2 جون کو ہونے والی کارروائیوں کے دوران ایران سے داغے گئے کئی میزائلوں اور ڈرونز کو کامیابی سے روکا اور مار گرایا، جبکہ جزیرہ قشم میں ایک فوجی زمینی کنٹرول اسٹیشن پر محدود دفاعی حملہ بھی کیا گیا۔
مزید پڑھیں
دوسری جانب ایرانی میڈیا نے دعویٰ کیا کہ پاسدارانِ انقلاب نے امریکی کارروائیوں کے جواب میں خطے میں امریکی اہداف پر میزائل اور ڈرون حملے کیے۔
ایرانی ذرائع کے مطابق یہ کارروائیاں قشم کے جنوب میں واقع ایک مواصلاتی ٹاور پر امریکی حملے کے ردعمل میں کی گئیں۔
پاسدارانِ انقلاب نے یہ بھی دعویٰ کیا کہ اس نے ’بانیا‘ نامی ایک بحری
جہاز کو میزائلوں سے نشانہ بنایا، جسے ایرانی آئل ٹینکر پر مبینہ امریکی حملے کا جواب قرار دیا گیا۔
تاہم سینٹکام نے ان دعوؤں کو مسترد کرتے ہوئے کہا کہ امریکی افواج پر کیے گئے تمام ایرانی حملے ناکام رہے اور کوئی بھی اپنے ہدف تک نہیں پہنچ سکا۔
امریکی فوج نے واضح کیا کہ اس کی افواج ہر ممکن خطرے سے نمٹنے کے لیے مکمل طور پر تیار ہیں۔
امریکی بیان کے مطابق ایران نے کئی پڑوسی ممالک کی جانب میزائل داغے، جن میں سے دو میزائل کویت کی طرف جا رہے تھے مگر ہدف تک پہنچنے سے پہلے ہی تباہ یا گر گئے، جبکہ بحرین کی جانب فائر کیے گئے 3 میزائل امریکی اور بحرینی فضائی دفاعی نظام نے فضا ہی میں تباہ کر دیے۔
اسی طرح امریکی افواج نے تین حملہ آور ایرانی ڈرونز بھی مار گرائے جو علاقائی پانیوں میں شہری اہداف کو نشانہ بنانے کی کوشش کر رہے تھے۔
بعد ازاں امریکی فوج نے مزید دعویٰ کیا کہ ایرانی ڈرونز کی ایک اور لہر نے کویت میں امریکی افواج کو نشانہ بنانے کی کوشش کی، تاہم فضائی دفاعی نظام نے انہیں بھی ناکام بنا دیا اور کسی قسم کا جانی یا مالی نقصان نہیں ہوا۔
کویت ایئرپورٹ پر حملہ، ہنگامی پلان نافذ
دوسری جانب کویت کی جنرل سول ایوی ایشن اتھارٹی نے اعلان کیا کہ ایرانی حملے کے بعد کویت انٹرنیشنل ایئرپورٹ میں ہنگامی پلان نافذ کر دیا گیا ہے۔
اتھارٹی کے مطابق ڈرونز اور میزائلوں کے حملے میں ایئرپورٹ کے مرکزی ٹرمینل T1 کو نشانہ بنایا گیا، جس کے نتیجے میں متعدد تنصیبات کو شدید نقصان پہنچا جبکہ کئی افراد زخمی بھی ہوئے۔
حکام نے فوری طور پر تمام پروازیں معطل کرتے ہوئے انہیں متبادل ہوائی اڈوں کی جانب منتقل کرنے کا فیصلہ کیا، اور کہا کہ آئندہ اطلاع تک فضائی آپریشن بند رہیں گے۔
کویتی وزارتِ دفاع کے ترجمان کرنل سعود عبدالعزیز العطوان نے بتایا کہ دشمن ڈرونز نے ٹرمینل T1 کو براہِ راست نشانہ بنایا، جس سے عمارت کو بھاری نقصان پہنچا اور متعدد افراد زخمی ہوئے، جنہیں فوری طبی امداد فراہم کی گئی۔
انہوں نے کہا کہ کویتی مسلح افواج تمام متعلقہ اداروں کے ساتھ مسلسل رابطے میں ہیں اور ملک کے امن و استحکام کے تحفظ کے لیے مکمل الرٹ ہیں۔
وزارتِ دفاع نے شہریوں اور رہائشیوں کو خبردار کیا کہ وہ کسی بھی گرے ہوئے ملبے، شیل کے ٹکڑوں یا مشتبہ اشیا کے قریب نہ جائیں اور ایسی کسی چیز کی فوری اطلاع متعلقہ اداروں کو دیں۔
یہ حملہ ایسے وقت میں ہوا ہے جب صرف دو روز قبل ہی کویت نے اعلان کیا تھا کہ کویت انٹرنیشنل ایئرپورٹ مکمل طور پر دوبارہ فعال ہو چکا ہے اور عرب و غیرملکی ایئرلائنز کی پروازیں بحال کر دی گئی ہیں، جبکہ ایئرپورٹ کی تمام آپریشنل اور فنی سہولیات کو بھی مکمل طور پر تیار کر لیا گیا تھا۔