امریکہ اور ایران کے درمیان کشیدگی ایک بار پھر خطرناک مرحلے میں داخل ہوگئی ہے۔
امریکی صدر ڈونلڈ ٹرمپ نے ایران کو سخت ترین دھمکی دیتے ہوئے کہا ہے کہ اگر تہران نے جنگ بندی کی خلاف ورزیاں جاری رکھیں تو امریکہ ’مشن مکمل‘ کرے گا اور ایران کا وجود باقی نہیں رہے گا۔
دوسری جانب امریکی فوج نے ایران کے متعدد فوجی اہداف پر فضائی حملے کیے، جبکہ ایران کے جوابی حملوں کے بعد بحرین اور کویت نے اپنی فضائی دفاعی کارروائیوں اور شدید مذمت کا اعلان کیا۔
امریکی صدر ڈونلڈ ٹرمپ نے ایران کے خلاف اپنی سخت ترین وارننگ دہراتے ہوئے کہا ہے کہ امریکی فوج نے ایرانی میزائلوں، ڈرونز، ساحلی ریڈاروں اور دیگر فوجی تنصیبات پر فضائی حملے کیے ہیں، کیونکہ تہران نے ایک بار پھر جنگ بندی معاہدے کی خلاف ورزی کی۔
ٹرمپ نے اپنے سوشل میڈیا پلیٹ فارم ٹروتھ سوشل پر جاری بیان میں کہا کہ ایران نے سبق نہیں سیکھا۔
انہوں نے خبردار کیا کہ اگر ایران نے اشتعال انگیز کارروائیاں جاری رکھیں تو امریکہ مزید ضبط و تحمل کا مظاہرہ نہیں کرے گا اور ہم وہ مشن مکمل کریں گے جس کا آغاز ہم نے کامیاب فوجی کارروائی سے کیا تھا۔
انہوں نے مزید دھمکی دیتے ہوئے کہا کہ اگر ایسا ہوا تو ایران کا وجود باقی نہیں رہے گا۔
ادھر امریکی وزارتِ دفاع کے ایک سینئر عہدیدار نے بتایا کہ حالیہ فضائی حملوں میں ان فوجی تنصیبات کو نشانہ بنایا گیا جنہیں ایران نے 28 فروری کو جنگ شروع ہونے کے بعد دوبارہ تعمیر اور فعال کیا تھا۔
مزید پڑھیں
انہوں نے فوکس نیوز سے گفتگو کرتے ہوئے کہا کہ ایران نے آبنائے ہرمز کے اطراف اپنے فضائی دفاعی نظام، میزائل تنصیبات اور فوجی صلاحیتوں کو دوبارہ مضبوط کیا، جس کے بعد امریکہ نے جزیرہ قشم، سیرک اور دیگر مقامات پر نئے حملے کیے۔
عہدیدار کے مطابق یہ فضائی کارروائیاں گزشتہ رات کیے گئے حملوں سے کہیں زیادہ وسیع ہیں۔
انہوں نے دعویٰ کیا کہ امریکہ نے ایران کو جنگ بندی پر عمل درآمد کا موقع دیا تھا، مگر تہران نے ہفتے کی صبح آبنائے ہرمز سے گزرنے والے آئل ٹینکر MT Kiku پر ڈرون حملہ کر کے اسے ضائع کر دیا، جس کے جواب میں امریکی کارروائی کی گئی۔
امریکی مرکزی کمان ’سینٹکام‘ نے بیان میں کہا کہ فضائی حملے ایرانی پاسدارانِ انقلاب کی جانب سے MT Kiku آئل ٹینکر پر کیے گئے ڈرون حملے کے جواب میں کیے گئے، جو دو ملین سے زائد بیرل خام تیل لے کر آبنائے ہرمز سے گزر رہا تھا۔
سینٹکام کے مطابق امریکی لڑاکا طیاروں نے فوجی نگرانی کے مراکز، مواصلاتی نظام، فضائی دفاعی تنصیبات، ڈرون گوداموں اور بارودی سرنگیں بچھانے کی صلاحیت رکھنے والے مراکز کو نشانہ بنایا۔
بیان میں کہا گیا کہ ایران کو جنگ بندی پر عمل کرنے کا موقع دیا گیا تھا، مگر اس نے اسے مسترد کر دیا۔
امریکی صدر نے ایک اور بیان میں واضح کیا کہ ایران کو کبھی بھی جوہری ہتھیار حاصل کرنے کی اجازت نہیں دی جائے گی۔
انہوں نے اپنی پوسٹ میں اس حوالے سے گردش کرنے والی خبروں کو مسترد کرتے ہوئے کہا کہ ایران کے ایٹمی پروگرام کے بارے میں امریکی مؤقف میں کوئی تبدیلی نہیں آئی۔
اسی دوران ٹرمپ نے ایک بار پھر فوجی کارروائی کا اشارہ دیتے ہوئے کہا کہ اگر ایران نے اشتعال انگیزی جاری رکھی تو امریکہ مزید سخت اقدامات کرے گا۔
دوسری جانب ایرانی پاسدارانِ انقلاب نے بحرین اور کویت پر حملوں کا اعلان کرتے ہوئے امریکہ کے ساتھ جاری تکنیکی مذاکرات معطل کرنے کی دھمکی دی۔
یہ پیش رفت ایسے وقت میں سامنے آئی ہے جب 30 جون کو دونوں ممالک کے درمیان جوہری پروگرام، پابندیوں کے خاتمے اور آبنائے ہرمز کے انتظام سے متعلق تکنیکی مذاکرات کا نیا دور متوقع ہے۔
بحرین کی دفاعی فورس نے اعلان کیا کہ اس کے فضائی دفاعی نظام نے متعدد ایرانی میزائلوں اور ڈرونز کو کامیابی سے تباہ کر دیا۔
بحرینی وزارت داخلہ نے بتایا کہ حملے کے نتیجے میں المحرق میں ایک رہائشی عمارت کو نقصان پہنچا، تاہم کسی جانی نقصان کی اطلاع نہیں ملی۔
بحرین نے ایران کے حملوں کی شدید مذمت کرتے ہوئے کہا کہ تہران نے 17 جون 2026 کو دستخط ہونے والی اسلام آباد مفاہمتی یادداشت کی کھلی خلاف ورزی کی ہے، جس میں خطے میں مستقل جنگ بندی اور خودمختاری کے احترام کا وعدہ کیا گیا تھا۔
کویت نے بھی ایرانی حملوں کو اپنی خودمختاری اور سلامتی پر براہِ راست حملہ قرار دیتے ہوئے سخت مذمت کی۔
کویتی فوج کے مطابق فضائی دفاعی نظام نے متعدد میزائلوں اور ڈرونز کو تباہ کر دیا، جبکہ سنے جانے والے دھماکے انہی دفاعی کارروائیوں کا نتیجہ تھے۔
امریکہ اور ایران کے درمیان گزشتہ دو روز کے دوران ہونے والے حملوں کے تبادلے نے خطے میں کشیدگی کو نئی سطح پر پہنچا دیا ہے۔
ان واقعات نے نہ صرف آبنائے ہرمز جیسے اہم عالمی بحری راستے کے تحفظ پر سوالات کھڑے کر دیے ہیں بلکہ عالمی توانائی کی منڈیوں اور جاری سفارتی مذاکرات پر بھی سنگین خدشات پیدا کر دیے ہیں۔