محمد مبشر انوار
سینئر تجزیہ نگار
اسرائیلی انتخابات کے بعد نیتن یاہو کا سیاسی مستقبل ایک بار پھر غیر یقینی صورتِ حال سے دوچار ہے۔
پارلیمان میں واضح اکثریت کا فقدان، اتحادی حکومت کی تشکیل میں مشکلات، ایران کے خلاف جنگی حکمتِ عملی اور ملکی و بین الاقوامی قانونی مقدمات ان کے لیے بڑے چیلنج بن چکے ہیں۔
محمد مبشر انوار اپنے کالم میں ان حالات کا جائزہ لیتے ہوئے سوال اٹھاتے ہیں کہ کیا نیتن یاہو اقتدار برقرار رکھ سکیں گے یا انہیں قانونی کارروائیوں کا سامنا کرنا پڑے گا؟
تادمِ تحریر اسرائیل میں عام انتخابات کے لیے ووٹنگ مکمل ہو چکی ہے اور نتائج کا انتظار کیا جا رہا ہے، جو اگلے چند گھنٹوں میں منظرِ عام پر آ جائیں گے۔
انتخابات کے حوالے سے کیے گئے سروے کے مطابق اسرائیلی پارلیمان کی 120 نشستوں میں سے نیتن یاہو اور ان کے اتحادیوں کو 50، ان کے مخالف گادی آئزنکوٹ کے اتحاد کو 53 سے 54، جبکہ عرب جماعتوں کو 17 سے 18 نشستیں ملنے کی توقع ظاہر کی گئی ہے۔
یوں ان انتخابات کے نتیجے میں جو اسمبلی وجود میں آتی دکھائی دے رہی ہے، اس میں کسی بھی سیاسی اتحاد کے لیے سادہ اکثریت حاصل کرنا ممکن نظر نہیں آتا۔
ایسی صورت میں عرب جماعتوں کی حمایت سے ہی اتحادی حکومت تشکیل دی جا سکے گی، بشرطیکہ انتخابی نتائج سروے کے مطابق سامنے آئیں۔
دوسری صورت یہ بھی ہو سکتی ہے کہ جب تک حکومت سازی ممکن نہیں ہوتی، نیتن یاہو ہی عبوری حکومت کے سربراہ رہیں اور اپنی مرضی کے مطابق وہ تمام اقدامات کریں جو ممکنہ طور پر نئی حکومت کے قیام کے بعد ممکن نہ ہوتے، یا جن پر عمل درآمد میں کچھ وقت لگتا۔
یہ بھی ممکن ہے کہ نئی حکومت ان اقدامات پر نیتن یاہو سے زیادہ تیزی کے ساتھ عمل درآمد کرے۔
مزید پڑھیں
آخرالذکر امکان کے حوالے سے میری ذاتی رائے اور گمان یہی ہے کہ اس وقت صہیونی دنیا میں بالخصوص جو سوچ پائی جاتی ہے، اس کے پیشِ نظر یہ بہت حد تک ممکن ہے کہ کوئی بھی حکمران منتخب ہو، وہ صہیونی فکر کے بنیادی دائرے سے باہر نہیں جا سکتا۔
تو سوال یہ پیدا ہوتا ہے کہ پھر اس صورت میں نیتن یاہو میں کیا برائی ہے؟
اس بات میں وزن اپنی جگہ، مگر اسے دوسرے زاویے سے دیکھا جائے تو یہ حقیقت بھی سامنے آتی ہے کہ نیتن یاہو کو جتنا وقت ملا اور ان کی حکومت نے جس نوعیت کی جارحیت اور درندگی کا مظاہرہ کیا، اس کے باوجود اگر صہیونی عزائم حاصل نہیں ہو سکے تو پھر ان کی جگہ زیادہ
سخت مزاج قیادت کو بھی سامنے لایا جا سکتا ہے۔
اس مفروضے کے بعد سوال اٹھتا ہے کہ اسرائیلی عوام کے انتخابی سروے بظاہر اس کی نفی کرتے دکھائی دیتے ہیں۔
عمومی تاثر یہی ہے کہ اسرائیلی عوام نیتن یاہو کی جنگی پالیسی سے نالاں اور ناراض ہیں اور ان کا ووٹ جنگ کے خلاف ہے۔
حتیٰ کہ بیرونِ ملک مقیم 68 ہزار اسرائیلی شہریوں کی اسرائیل واپسی اور ووٹ ڈالنے کی سرگرمی کو بھی اسی تناظر میں دیکھا جا رہا ہے کہ وہ نیتن یاہو کی پالیسیوں کے خلاف ہیں۔
لیکن سوال یہ ہے کہ کیا وہ صرف نیتن یاہو کی جنگی پالیسی کے خلاف ہیں یا واقعی جنگ کے خلاف ہیں؟
بظاہر عوام کے ووٹ کو جنگ کے خلاف رائے قرار دیا جا سکتا ہے، مگر سیاسی قیادت یا پسِ پردہ صہیونی فکر رکھنے والے حلقے اس کی تعبیر مختلف انداز میں بھی کر سکتے ہیں۔
وہ یہ مؤقف اختیار کر سکتے ہیں کہ چونکہ نیتن یاہو کی جنگی پالیسی مطلوبہ نتائج نہیں دے سکی، لہٰذا عوام نے نیتن یاہو کی جنگی حکمتِ عملی کو تو مسترد کیا ہے، مگر جنگ کو نہیں۔
ایسی صورت میں نئی حکومت کے ابتدائی اقدامات ہی اس مفروضے کی تصدیق یا تردید کر سکیں گے اور یہ واضح ہوگا کہ اسرائیلی قیادت کی حقیقی سوچ اور ترجیحات کیا ہیں۔
لہٰذا اس وقت تک انتظار کرنا ہوگا تاکہ صحیح معنوں میں اسرائیلی سیاسی سوچ کا اظہار ہو سکے۔
تاہم میری دانست میں حقیقت یہی ہے کہ صہیونی قیادت میں سے کوئی بھی برسرِ اقتدار آ جائے، بنیادی پالیسیوں میں کوئی نمایاں فرق پڑنے کا امکان کم ہے۔
میرے نزدیک اس کی بنیادی وجہ صہیونی سیاسی فکر میں مسلم دشمنی اور مسلم دنیا کے خلاف اختیار کی جانے والی پالیسیاں ہیں، جن میں کسی بڑی تبدیلی کی امید دکھائی نہیں دیتی۔
نیتن یاہو نے اپنے طور پر بہت سے داؤ پیچ آزمائے۔
ٹرمپ کو ایران کے خلاف جنگ میں دھکیل کر امریکی ساکھ کو ناقابلِ تلافی نقصان پہنچانے کی پوری کوشش کی، جس میں وہ کسی حد تک کامیاب بھی ہوئے۔
مگر افسوس کہ امریکہ اور اسرائیل، دونوں نے ایران کی مزاحمت کے متعلق غلط اندازے لگائے، جس کا خمیازہ انہیں میدانِ جنگ میں بھگتنا پڑا اور اب مذاکرات کی میز پر بھی اس کے اثرات سامنے آ رہے ہیں۔
نیتن یاہو کے لیے اپنے مقاصد کا حصول کس قدر اہم رہا ہے، اس کا اندازہ اس بات سے لگایا جا سکتا ہے کہ انتخابات سے قبل معاملات اس قدر کشیدہ ہو چکے تھے کہ صدر ٹرمپ کی جانب سے انتہائی اقدام اٹھائے جانے کے امکانات زیرِ بحث تھے۔
سکیورٹی اداروں کی جانب سے انہیں دی جانے والی بریفنگز میں مختلف ممکنہ آپشنز سے آگاہ کیے جانے کی اطلاعات بھی سامنے آ رہی تھیں۔
اسرائیلی انتخابات
میں کسی بڑے
سیاسی اتحاد کو
واضح اکثریت
حاصل ہوتی
دکھائی نہیں دیتی
انتخابات سے دو تین روز قبل دنیا بھر کے ماہرین ایک بھرپور حملے کے امکان یا خدشے کا اظہار کر رہے تھے۔
اس کی بنیادی وجہ صدر ٹرمپ کی جانب سے ایران کو دی جانے والی واضح دھمکی تھی کہ اگر ایران امریکی شرائط کے مطابق معاہدہ نہیں کرتا تو اس پر شدید حملہ کیا جا سکتا ہے۔
تاہم ایران نے اپنے اعصاب قابو میں رکھے اور ان دھمکیوں سے مرعوب ہونے کے بجائے سخت اور فیصلہ کن جوابی کارروائی کا عندیہ دیا۔
بظاہر اسی سخت ردِعمل اور ممکنہ نتائج کے خدشات نے امریکہ کو حملے سے باز رکھنے میں کردار ادا کیا۔
دوسری طرف پسِ پردہ روابط میں بھی کہیں مکمل تعطل نہیں آیا اور فریقین ثالثوں کے ذریعے ایک دوسرے کو پیغامات پہنچاتے رہے۔
یوں حالات ابھی تک کسی حد تک قابو میں رہے، البتہ نیتن یاہو کی خواہش ناتمام رہ گئی۔اگر امریکہ ایران پر حملہ کرتا تو قرائن کے مطابق اس مرتبہ اسرائیلی سرزمین استعمال ہونے کا امکان موجود تھا، کیونکہ خطے میں امریکی فوجی قوت کا ایک اہم مرکز اسرائیل بن چکا تھا۔
مشرقِ وسطیٰ میں موجود دیگر امریکی فوجی اڈوں کی صورتِ حال، میری رائے میں، اس حد تک متاثر ہو چکی تھی کہ وہاں سے ایران پر بڑے پیمانے پر حملہ کرنا آسان نہ رہتا۔
اس تناظر میں امریکہ کے پاس اسرائیلی سرزمین استعمال کرنے یا پھر یورپ اور برطانیہ سے کارروائی کرنے کے امکانات موجود تھے۔
اگر امریکہ یورپ یا برطانیہ کی سرزمین سے ایران کے خلاف حملہ کرتا تو ان علاقوں کے لیے بھی جوابی کارروائی کے خطرات پیدا ہو سکتے تھے۔
مزید یہ کہ یورپ کے بیشتر ممالک اپنی سرزمین ایران کے خلاف امریکی حملوں کے لیے استعمال کرنے کی اجازت دینے سے گریزاں دکھائی دے رہے تھے، جبکہ برطانیہ کی قیادت کے مؤقف میں بھی حالات کے مطابق تبدیلی نظر آ رہی تھی۔
ایسی صورت میں اگر امریکہ اسرائیلی سرزمین سے ایران پر حملہ کرتا تو ایران کی جوابی کارروائی کا ایک بڑا ہدف اسرائیل بن سکتا تھا، کیونکہ جنگ کے دوران ایران نے ان ممالک میں امریکی فوجی اڈوں کو نشانہ بنایا جہاں سے اس کے خلاف حملے کیے گئے تھے۔
یوں اسرائیل میں فوری طور پر حالات بگڑ سکتے تھے اور نیتن یاہو، جنہیں اپنی غیر مقبولیت کا ادراک تھا، اس جنگی صورتِ حال کا فائدہ اٹھاتے ہوئے انتخابات ملتوی کرنے کی کوشش بھی کر سکتے تھے، بشرطیکہ اسرائیلی قانون اس کی اجازت دیتا۔
بہرحال یہ امکان حقیقت کا روپ نہ دھار سکا اور اسرائیل میں انتخابات مقررہ وقت پر ہو چکے ہیں۔
نیتن یاہو کی جانب سے پولنگ مکمل ہونے اور غیر رسمی نتائج سامنے آنے کے بعد دھاندلی کے الزامات بھی عائد کیے گئے ہیں۔
میری نظر میں یہ طرزِ عمل اس بات کی نشاندہی کرتا ہے کہ نیتن یاہو کو اپنی سیاسی پوزیشن کمزور ہونے اور ممکنہ شکست کا خدشہ لاحق ہے۔
تاہم انتخابی سروے کی روشنی میں جو صورتِ حال سامنے آ رہی ہے، اس کے مطابق ممکن ہے کہ نیتن یاہو عبوری حکومت کی سربراہی جاری رکھیں۔
لیکن اصل سوال یہ ہے کہ کیا وہ اس عبوری دور میں بھی وہ تمام اقدامات کر سکیں گے جن کی تکمیل ان کی شدید خواہش رہی ہے؟
اب دیکھتے ہیں کہ انتخابات کے بعد نیتن یاہو کی قانونی اور سیاسی حیثیت کیا ہوگی۔
نیتن یاہو کو ایک طرف اسرائیل کے اندر بدعنوانی کے مقدمات کا سامنا ہے تو دوسری جانب بین الاقوامی فوجداری عدالت نے بھی مبینہ جنگی جرائم اور انسانیت کے خلاف جرائم کے الزامات کے سلسلے میں ان کے وارنٹِ گرفتاری جاری کر رکھے ہیں۔
اس صورتِ حال میں بعض ممالک کی جانب سے ان کی گرفتاری کا امکان بھی زیرِ بحث رہا ہے، تاہم نیتن یاہو کی موجودہ وزارتِ عظمیٰ اور بین الاقوامی سیاسی حالات ان کے خلاف قانونی اقدامات کو پیچیدہ بناتے ہیں۔
انتخابات میں شکست اور اقتدار سے الگ ہونے کے بعد ان کی سیاسی حیثیت یقیناً بدل جائے گی۔ ایسی صورت میں قانونی کارروائیوں کی رفتار اور ان کے نتائج کے حوالے سے نئے امکانات پیدا ہو سکتے ہیں۔
یہاں یہ بات بھی قابلِ ذکر ہے کہ اسرائیل میں نیتن یاہو کے خلاف قائم مقدمات بنیادی طور پر فوجداری نوعیت کے ہیں اور وزارتِ عظمیٰ کا منصب انہیں ان مقدمات سے مکمل قانونی استثنیٰ فراہم نہیں کرتا۔
تاہم اقتدار سے علیحدگی کے بعد ان مقدمات کی سماعت میں تیزی آنے کا امکان موجود ہے، خصوصاً اگر سیاسی حالات اور عدالتی کارروائیوں میں کوئی نئی رکاوٹ پیدا نہ ہو۔
یہ بھی ایک دلچسپ پہلو ہے کہ متعدد جمہوری ممالک نے اپنی قیادت کے انتخاب، احتساب اور قانونی جواب دہی کے لیے سخت اصول وضع کر رکھے ہیں۔
ان نظاموں میں محض اعلیٰ عہدے پر فائز رہنا کسی شخص کو تمام قانونی کارروائیوں سے مستقل تحفظ فراہم نہیں کرتا۔
مزید پڑھیں
عہدہ اور اس سے وابستہ مراعات ختم ہونے کے بعد سابق حکمران کو بھی عام شہری کی طرح قانون کا سامنا کرنا پڑ سکتا ہے۔
حیرت کی بات یہ ہے کہ عالمی طاقت کے صدر کی جانب سے اسرائیلی صدر سے نیتن یاہو کو معافی دینے کی درخواست بھی تاحال ان کے لیے مطلوبہ نتیجہ پیدا نہیں کر سکی۔
صدر ٹرمپ چاہتے تھے کہ اسرائیلی صدر اپنے آئینی اختیارات استعمال
کرتے ہوئے نیتن یاہو کو معافی دے دیں۔
اس طرح نہ صرف امریکی صدر کی خواہش پوری ہو سکتی تھی بلکہ نیتن یاہو کو بھی اپنے خلاف جاری قانونی کارروائیوں سے نجات کی امید مل سکتی تھی۔
مگر اسرائیلی نظام میں صدارتی معافی کے لیے بھی ایک قانونی طریقۂ کار موجود ہے، جسے نظرانداز کرنا آسان نہیں۔
اس تمام پس منظر میں نیتن یاہو کا سیاسی اور قانونی مستقبل غیر یقینی صورتِ حال سے دوچار ہے۔
اقتدار سے علیحدگی ان کے لیے مشکلات میں اضافہ کر سکتی ہے اور انہیں بیک وقت ملکی مقدمات اور بین الاقوامی قانونی دباؤ کا سامنا کرنا پڑ سکتا ہے۔
میری رائے میں اگر قانونی کارروائیاں اپنے منطقی انجام تک پہنچیں اور ان کے خلاف الزامات ثابت ہو جائیں تو نیتن یاہو کے لیے جیل کی سلاخوں کے پیچھے جانے کا امکان بھی خارج از بحث نہیں۔
یوں ایک طویل عرصے تک اسرائیلی سیاست پر غالب رہنے والے نیتن یاہو کے سامنے اب دو بڑے سوال موجود ہیں:
کیا وہ اپنی سیاسی طاقت برقرار رکھ سکیں گے، اور کیا وہ اپنے خلاف جاری قانونی کارروائیوں کے نتائج سے بچ پائیں گے؟
فی الحال نیتن یاہو کا مستقبل انہی دو سوالات کے گرد گھومتا دکھائی دیتا ہے۔