امریکا اور ایران کے درمیان متوقع امن معاہدے کے حوالے سے امیدیں بڑھ گئی ہیں، تاہم دونوں ممالک کے درمیان کئی بنیادی نکات پر اختلافات اب بھی موجود ہیں۔
ایران نے اتوار کو دستخط کی تصدیق نہیں کی، جبکہ آبنائے ہرمز، جوہری پروگرام، منجمد اثاثوں اور لبنان سے متعلق معاملات اب بھی مذاکرات کے اہم اور متنازع موضوعات ہیں۔
امریکا اور ایران کے درمیان جاری کشیدگی کے خاتمے کے لیے متوقع معاہدے کے حوالے سے امید افزا ماحول کے باوجود کئی اہم نکات اب بھی غیر واضح ہیں، جبکہ معاہدے پر دستخط کے وقت اور شرائط پر دونوں ممالک کے بیانات میں واضح تضادات سامنے آ رہے ہیں۔
امریکی صدر ڈونلڈ ٹرمپ اور پاکستان کے وزیرِاعظم شہباز شریف نے امید ظاہر کی ہے کہ امریکا اور ایران کے درمیان جنگ بندی اور امن کے لیے طویل عرصے سے زیرِ غور فریم ورک معاہدہ اتوار کے روز طے پا سکتا ہے۔
صدر ٹرمپ نے ہفتے کے روز ٹروتھ سوشل پر جاری بیان میں کہا کہ معاہدے پر دستخط اتوار کو متوقع ہیں، جو ان کی 80 ویں سالگرہ کا دن بھی ہے۔
مزید پڑھیں
دوسری جانب وزیرِاعظم شہباز شریف نے بتایا کہ دونوں فریق ایک ابتدائی امن فریم ورک پر متفق ہو چکے ہیں اور اسلام آباد اس معاہدے پر الیکٹرانک دستخط کے انتظامات کر رہا ہے، جس کے بعد آئندہ چند روز میں تکنیکی سطح کے مذاکرات شروع ہوں گے۔
تاہم ایران نے معاہدے کے اعلان کردہ وقت پر شکوک و شبہات کا اظہار کیا ہے۔
تہران کی جانب سے تاحال اتوار کو دستخط کی باضابطہ تصدیق نہیں کی گئی، جبکہ ملک کے اندر بعض سخت گیر حلقوں نے بھی اس مجوزہ سمجھوتے کی مخالفت کی ہے۔
ایرانی وزارت خارجہ کے ترجمان اسماعیل بقائی نے پہلے ہی واضح کر دیا تھا کہ معاہدے پر دستخط کل نہیں ہوں گے، البتہ یہ عمل آئندہ چند دنوں میں مکمل ہو سکتا ہے۔
ایرانی ذرائع کے مطابق تہران اتوار کو کسی بھی معاہدے پر دستخط نہیں کرنا چاہتا کیونکہ یہ دن صدر ٹرمپ کی سالگرہ کے ساتھ منسلک ہے اور ایرانی قیادت کو خدشہ ہے کہ امریکی صدر اس موقع کو سیاسی اور میڈیا تشہیر کے لیے استعمال کر سکتے ہیں۔
ذرائع کے مطابق بعض مبصرین کا خیال ہے کہ ٹرمپ کی جانب سے دستخط کی تاریخ پر اصرار کا مقصد اس پیش رفت کو اپنی ذاتی اور سیاسی کامیابی کے طور پر پیش کرنا ہے۔
ایرانی سیاسی ذرائع کا کہنا ہے کہ معاہدہ ابھی مکمل طور پر تیار نہیں ہوا اور اس کی حتمی قانونی و سیاسی تفصیلات طے ہونا باقی ہیں، اس لیے فوری دستخط ممکن نہیں۔
ان کا کہنا تھا کہ ایرانی مذاکراتی ٹیم اس معاملے کے علامتی اور میڈیا پہلوؤں سے آگاہ ہے اور مذاکرات کو کسی سیاسی یا تشہیری تقریب میں تبدیل نہیں ہونے دے گی۔
دریں اثنا، آبنائے ہرمز کا معاملہ بھی فریقین کے درمیان سب سے پیچیدہ موضوعات میں شامل ہے۔
صدر ٹرمپ نے دعویٰ کیا ہے کہ معاہدے پر دستخط کے فوراً بعد آبنائے ہرمز تمام ممالک کے لیے کھول دی جائے گی۔
معاہدہ قریب، اختلافات برقرار
واشنگٹن اور تہران کے درمیان مجوزہ امن فریم ورک کے اہم نکات
📅 متوقع دستخط
امریکی اور پاکستانی قیادت کے مطابق اتوار کو ممکن
ایران: چند روز مزید لگ سکتے ہیں
🚢 آبنائے ہرمز
امریکا: فوری کھولی جائے
ایران: نگرانی اور انتظام ہمارے پاس رہے گا
☢️ جوہری پروگرام
امریکا: افزودہ یورینیم ہٹایا جائے
ایران: فیصلہ 60 روزہ مذاکرات میں ہوگا
💰 منجمد اثاثے
ایران رہائی کا مطالبہ کر رہا ہے
امریکا شرائط پوری ہونے سے مشروط قرار دیتا ہے
🕊️ جنگ بندی
60 روزہ جنگ بندی میں توسیع زیر غور
علاقائی کشیدگی کم کرنے پر اتفاق کی کوشش
⚠️ اہم رکاوٹیں
جوہری فائل
ہرمز کا انتظام
پابندیوں کا خاتمہ
لبنان اور علاقائی تنازعات
ایک امریکی عہدیدار نے بھی اس بات کی تصدیق کی کہ ایران آبنائے ہرمز کھولنے پر آمادہ ہے اور یہ معاہدے کی بنیادی شرط ہے۔
ان کے مطابق آبنائے ہرمز کھلنے کے بعد امریکا ایرانی بندرگاہوں پر عائد محاصرہ ختم کر دے گا، جبکہ سمندری بارودی سرنگوں کی صفائی اگلے مرحلے کا حصہ ہوگی۔
تاہم اس حوالے سے بھی اختلافات موجود ہیں۔
امریکی موقف ہے کہ آبنائے ہرمز میں کسی قسم کی ایرانی اجارہ داری یا ٹرانزٹ فیس قابل قبول نہیں ہوگی، جبکہ ایرانی ذرائع ابلاغ کے مطابق آبی گزرگاہ کی نگرانی اور انتظام ایران کے پاس ہی رہے گا۔
جوہری پروگرام بھی ایک اور بڑا متنازع نکتہ ہے۔
امریکی انتظامیہ کے ایک اعلیٰ عہدیدار کے مطابق ایران کا جوہری پروگرام مکمل طور پر ختم کیا جائے گا اور افزودہ یورینیم سمیت حساس جوہری مواد کو تباہ یا ملک سے باہر منتقل کیا جائے گا۔
اس کے برعکس ایران بارہا واضح کر چکا ہے کہ جوہری پروگرام اور افزودہ یورینیم کے مستقبل پر دستخط کے بعد 60 روزہ مذاکراتی عمل کے دوران بات چیت ہوگی۔
تہران یورینیم کی افزودگی کے حق سے دستبردار ہونے یا اپنے ذخائر بیرونِ ملک منتقل کرنے کے لیے بھی تیار نہیں۔
اسی طرح بیرونِ ملک منجمد ایرانی اثاثوں کے حوالے سے بھی اختلافات برقرار ہیں۔
امریکی حکام کا کہنا ہے کہ ایران کو اس وقت تک کوئی رقم جاری نہیں کی جائے گی جب تک وہ معاہدے کی تمام شرائط پوری نہیں کرتا، جبکہ پابندیوں میں نرمی بھی ایرانی اقدامات سے مشروط ہوگی۔
دوسری جانب ایرانی وزارت خارجہ کا اصرار ہے کہ منجمد اثاثوں کی رہائی معاہدے کا بنیادی حصہ ہے اور اس کے بغیر پیش رفت ممکن نہیں۔
علاقائی معاملات خصوصاً لبنان بھی مذاکراتی ایجنڈے کا حصہ بن چکے ہیں۔
ایرانی ذرائع کے مطابق لبنان سے متعلق امور مفاہمتی یادداشت میں شامل ہیں، جبکہ اسرائیل مسلسل اس بات پر زور دیتا آیا ہے کہ ایرانی اور لبنانی معاملات کو الگ رکھا جائے۔
اسرائیلی وزیر دفاع یسرائیل کاٹس نے ایک بار پھر واضح کیا ہے کہ اسرائیل لبنان، شام اور غزہ میں اپنے سکیورٹی مفادات سے دستبردار نہیں ہوگا اور ضرورت پڑنے پر کارروائیاں جاری رکھے گا۔
العربیہ اور الحدث کے ذرائع کے مطابق امریکا اور ایران کے وفود کے درمیان اتوار کو ایک ورچوئل اجلاس متوقع ہے، جس میں امن معاہدے پر دستخط کیے جا سکتے ہیں۔
ذرائع کا کہنا ہے کہ تقریب میں امریکی نائب صدر جے ڈی وینس، ایرانی پارلیمنٹ کے اسپیکر محمد باقر قالیباف اور دیگر اعلیٰ حکام شریک ہوں گے۔
اطلاعات کے مطابق اگر معاہدہ طے پا جاتا ہے تو آبنائے ہرمز فوری طور پر بحری آمدورفت کے لیے کھول دی جائے گی، تجارتی جہازوں سے ٹرانزٹ فیس وصول نہیں کی جائے گی اور ایرانی بندرگاہوں پر عائد امریکی محاصرہ بھی ختم کر دیا جائے گا۔