اوبیک پلس کے 7 رکن ممالک نے جولائی 2026 سے تیل کی پیداوار میں 188 ہزار بیرل یومیہ اضافے کا فیصلہ کیا ہے۔
یہ اقدام آبنائے ہرمز بحران اور عالمی رسد کے خدشات کے باوجود توانائی منڈیوں میں استحکام برقرار رکھنے کی کوشش قرار دیا جا رہا ہے۔
ماہرین کے مطابق اضافہ محدود ہے، تاہم اس کا مقصد مارکیٹ کے اعتماد کو بحال رکھنا اور طلب و رسد میں توازن قائم کرنا ہے۔
تیل پیدا کرنے والے ممالک کے اتحاد اوبیک پلس نے عالمی توانائی منڈیوں میں استحکام برقرار رکھنے کے لیے اہم فیصلہ کرتے ہوئے جولائی 2026 سے خام تیل کی پیداوار میں 188 ہزار بیرل یومیہ اضافے کا اعلان کر دیا ہے۔
اس فیصلے پر سعودی عرب، روس، عراق، کویت، قازقستان، الجزائر اور سلطنت عمان سمیت 7 بڑے پیداواری ممالک متفق ہوئے ہیں۔
اوبیک پلس کی جانب سے جاری بیان میں کہا گیا ہے کہ پیداوار میں اضافہ مارکیٹ کی صورتحال کا محتاط جائزہ لینے کے بعد کیا گیا ہے اور اتحاد مستقبل میں طلب و رسد کے حالات کے مطابق پیداوار بڑھانے، روکنے یا رضاکارانہ کٹوتیوں کو بحال کرنے کی مکمل لچک برقرار رکھے گا۔
مزید پڑھیں
اتحاد نے اعلان کیا کہ رکن ممالک 5 جولائی کو دوبارہ اجلاس منعقد کریں گے، جس میں عالمی منڈی کی صورتحال کا جائزہ لے کر آئندہ حکمت عملی طے کی جائے گی۔
یہ فیصلہ ایسے وقت میں سامنے آیا ہے جب عالمی تیل منڈی کو رسد کے حوالے سے غیر معمولی چیلنجز کا سامنا ہے۔
بلومبرگ کے سروے کے مطابق مئی کے دوران اوپیک کے رکن ممالک کی
مجموعی پیداوار تقریباً 37 سال کی کم ترین سطح پر پہنچ گئی۔
تنظیم کے 11 اراکین کی پیداوار 1.22 ملین بیرل یومیہ کم ہو کر 16.33 ملین بیرل یومیہ رہ گئی۔
اعداد و شمار کے مطابق ایران میں سب سے زیادہ کمی ریکارڈ کی گئی، جہاں پیداوار 710 ہزار بیرل یومیہ گھٹ کر 2.34 ملین بیرل یومیہ رہ گئی، جو گزشتہ 5 برسوں کی کم ترین سطح ہے۔
ماہرین کے مطابق فروری 2026 میں شروع ہونے والی ایران جنگ اور اس کے نتیجے میں آبنائے ہرمز کی بندش نے خطے سے تیل کی ترسیل کو شدید متاثر کیا۔
اس صورتحال نے اوبیک پلس کے متعدد اراکین کی برآمدات کو محدود کیا اور عالمی توانائی منڈیوں میں بے یقینی کو بڑھا دیا۔
العربیہ کے مطابق سابق ڈائریکٹر جنرل مارکیٹنگ، وزارت توانائی عمان، علی الریامی کا کہنا ہے کہ اوبیک پلس کی حالیہ پیداوار میں اضافہ عملی اعتبار سے محدود اور زیادہ تر علامتی نوعیت کا ہے۔
ان کے مطابق اتحاد دراصل ممکنہ جغرافیائی سیاسی کشیدگی کے خاتمے کے بعد پیداوار کی بحالی کے لیے مارکیٹ کو تیار کر رہا ہے۔
دوسری جانب روسی صدر ولادیمیر پوٹن نے سعودی عرب اور دیگر شراکت داروں کے ساتھ طویل المدتی تعاون کے عزم کا اعادہ کرتے ہوئے کہا کہ اوبیک پلس عالمی توانائی منڈی میں توازن برقرار رکھنے کے لیے کلیدی کردار ادا کر رہا ہے۔
ان کا کہنا تھا کہ رسد میں کمی یا غیر متوقع رکاوٹیں نہ صرف توانائی کی قیمتوں بلکہ عالمی افراطِ زر پر بھی براہِ راست اثر انداز ہوتی ہیں۔
ادھر اوپیک کے سیکریٹری جنرل ہیثم الغیص نے واضح کیا ہے کہ موجودہ جغرافیائی سیاسی کشیدگی کے باوجود تنظیم نے عالمی تیل طلب کے حوالے سے اپنا مثبت مؤقف برقرار رکھا ہوا ہے۔
ان کے مطابق اوپیک کو توقع ہے کہ 2026 کے دوران عالمی تیل طلب میں تقریباً 1.2 ملین بیرل یومیہ اضافہ ہوگا، جبکہ 2027 تک یہ اضافہ مزید 5 ملین بیرل یومیہ تک پہنچ سکتا ہے۔
ہیثم الغیص نے کہا کہ بڑھتی آبادی، شہری توسیع اور بنیادی ڈھانچے کے منصوبے آنے والی دہائیوں میں توانائی کی طلب کو مسلسل بڑھاتے رہیں گے۔
اوپیک کے طویل المدتی تخمینوں کے مطابق 2050 تک عالمی تیل طلب 123 ملین بیرل یومیہ تک پہنچ سکتی ہے، جبکہ مستقبل قریب میں تیل کی طلب اپنے عروج پر پہنچنے کے امکانات نظر نہیں آتے۔