امریکا کے بڑے بینک مصنوعی ذہانت کو اپنی مالیاتی سرگرمیوں کا مرکزی حصہ بنا رہے ہیں، جس کے لیے بعض ادارے بیرونی ماہرین کو روزانہ 25 ہزار ڈالر تک معاوضہ ادا کر رہے ہیں۔
AI اب مالیاتی تجزیوں، سرمایہ کاری کے فیصلوں اور کمپنیوں کی کارکردگی کے جائزے جیسے پیچیدہ کام چند سیکنڈ میں انجام دے رہی ہے۔
ماہرین کا کہنا ہے کہ اس تبدیلی کے باعث بینکاری شعبے میں روایتی ملازمتوں کی نوعیت تیزی سے بدل رہی ہے۔
امریکا کے بڑے بینکوں میں کام کرنے کے انداز میں غیر معمولی تبدیلی رونما ہو رہی ہے، جہاں مصنوعی ذہانت پر انحصار تیزی سے بڑھ رہا ہے۔
صورتحال یہاں تک پہنچ چکی ہے کہ وال اسٹریٹ کے بعض مالیاتی ادارے ملازمین کو مصنوعی ذہانت کی جدید ٹیکنالوجی سکھانے کے لیے بیرونی ماہرین کو یومیہ 25 ہزار ڈالر تک معاوضہ ادا کر رہے ہیں۔
یہ رقم بعض اوقات ایک عام ملازم کی سال بھر کی تنخواہ کے برابر ہوتی ہے، جو اس بات کی عکاسی کرتی ہے کہ مالیاتی شعبے میں مصنوعی ذہانت کو تجزیاتی اور فیصلہ سازی کے عمل میں شامل کرنے کی دوڑ کتنی تیز ہو چکی ہے۔
اب AI محض ایک معاون ٹیکنالوجی نہیں بلکہ مسابقتی برتری برقرار رکھنے کا ایک بنیادی ذریعہ بنتی جا رہی ہے۔
مزید پڑھیں
مالیاتی شعبے میں گردش کرنے والی معلومات کے مطابق سافٹ بینک گروپ کے دو سابق امریکی نوجوان ماہرین اس وقت وال اسٹریٹ کے بڑے مالیاتی اداروں کی توجہ کا مرکز بن چکے ہیں، جنہوں نے بینکوں کے لیے مصنوعی ذہانت کی جدید تربیتی تکنیکیں تیار کی ہیں۔
انہوں نے ایسے جدید تربیتی طریقے متعارف کرائے ہیں جن کی مدد سے بینک مصنوعی ذہانت کے نظاموں کو پیشہ ور مالیاتی تجزیہ کاروں کی
طرح کام کرنے کے قابل بنا رہے ہیں۔
ان تربیتی پروگراموں میں جدید ایپلی کیشنز استعمال کی جا رہی ہیں، جن میں کاروباری شخصیات کی ویڈیوز کا تجزیہ، جسمانی حرکات اور چہرے کے تاثرات کو ممکنہ کاروباری خطرات سے جوڑنا شامل ہے۔
یہ طریقہ کار بعض انٹیلی جنس اداروں میں استعمال ہونے والی تجزیاتی تکنیکوں سے مماثلت رکھتا ہے۔
مصنوعی ذہانت کے جدید استعمالات میں کمپنیوں کی آمدنی سے متعلق کانفرنس کالز اور بیانات کا تجزیہ بھی شامل ہے۔
AI سسٹمز انتظامیہ کے بیانات کو چند سیکنڈ میں مالیاتی پیش گوئیوں اور عددی ماڈلز میں تبدیل کر دیتے ہیں، جبکہ یہی کام روایتی مالیاتی تجزیہ کاروں کو کئی دنوں میں مکمل کرنا پڑتا تھا۔
اس تیز رفتار تبدیلی نے بینکاری شعبے کی ملازمتوں پر بھی گہرا اثر ڈالا ہے۔
سٹی بینک آف امریکا اور ویلز فالگو سمیت کئی بڑے مالیاتی اداروں نے حالیہ مہینوں میں وسیع پیمانے پر ملازمین کی تعداد کم کی ہے، حالانکہ ان اداروں نے ریکارڈ منافع حاصل کیا ہے۔
ماہرین کے مطابق یہ اقدامات کسی مالی بحران کا نتیجہ نہیں بلکہ ایک بنیادی تنظیمِ نو کا حصہ ہیں، جس کا مقصد روایتی ملازمتوں پر انحصار کم کرکے مصنوعی ذہانت کے نظاموں کو زیادہ اہم کردار دینا ہے۔
AI اب پیچیدہ تجزیاتی کام انسانوں کے مقابلے میں زیادہ تیزی اور درستگی سے انجام دینے کی صلاحیت حاصل کر چکی ہے۔
ماہرین کا کہنا ہے کہ آج بینکوں کے لیے اصل چیلنج سرمایہ یا ڈیٹا کی دستیابی نہیں بلکہ ایسے ماہرین کی کمی ہے جو مصنوعی ذہانت کو مالیاتی نظام میں مؤثر انداز سے استعمال کرنے کی صلاحیت رکھتے ہوں۔
ان تیزی سے بدلتے حالات کو دیکھتے ہوئے واضح ہوتا جا رہا ہے کہ وال اسٹریٹ ایک نئے دور میں داخل ہو رہی ہے، جہاں مصنوعی ذہانت صرف معاون ٹیکنالوجی نہیں رہے گی بلکہ عالمی مالیاتی صنعت کی تشکیلِ نو کا مرکزی ستون بن جائے گی۔