امریکی صدر ڈونلڈ ٹرمپ کی جانب سے ایران پر عائد بحری محاصرے کے خاتمے کے اعلان نے خطے میں نئی بحث چھیڑ دی ہے۔
واشنگٹن اسے کشیدگی میں کمی اور وسیع تر معاہدے کی جانب پیش رفت قرار دے رہا ہے، جبکہ تہران کا اصرار ہے کہ ابھی کوئی حتمی معاہدہ طے نہیں پایا اور کئی بنیادی تنازعات بدستور حل طلب ہیں۔
امریکی صدر ڈونلڈ ٹرمپ کی جانب سے ایران پر عائد بحری محاصرہ ختم کرنے کے اعلان نے عالمی سفارتی حلقوں میں کئی سوالات کو جنم دے دیا ہے۔
مبصرین یہ جاننے کی کوشش کر رہے ہیں کہ آیا یہ اقدام امریکا اور ایران کے درمیان ممکنہ سیاسی سمجھوتے کی شروعات ہے یا پھر جاری مذاکرات کے دوران اعتماد سازی کی ایک عارضی کوشش۔
اس اعلان کے بعد ابہام اس وقت مزید بڑھ گیا جب واشنگٹن اور تہران نے اس معاملے پر مختلف مؤقف اختیار کئے۔
امریکی انتظامیہ اسے آبنائے ہرمز میں بحری آمدورفت کی بحالی، علاقائی کشیدگی میں کمی اور جوہری تنازع کے حل کی جانب ایک اہم قدم قرار دے رہی ہے، جبکہ ایران کا کہنا ہے کہ ابھی تک کوئی حتمی معاہدہ طے نہیں پایا اور کئی بنیادی اختلافات برقرار ہیں۔
مزید پڑھیں
بحری محاصرہ دراصل امریکا کی جانب سے ایران پر اقتصادی دباؤ بڑھانے کا ایک اہم ذریعہ تھا، جس کے ذریعے ایرانی بندرگاہوں کی جانب جانے اور وہاں سے آنے والے بحری جہازوں کی نقل و حرکت محدود کی گئی تھی۔
ایسے میں محاصرے کے خاتمے کا مطلب ایران کی بحری تجارت اور نقل و حمل کے لیے جزوی ریلیف تصور کیا جا رہا ہے۔
صدر ٹرمپ نے اپنے اعلان میں آبنائے ہرمز کو فوری طور پر تمام تجارتی جہازوں کے لیے بلا رکاوٹ کھولنے، سمندری بارودی سرنگوں کے خاتمے اور پھنسی ہوئی کشتیوں کی واپسی کا بھی ذکر کیا، جس سے ظاہر ہوتا ہے کہ واشنگٹن اس معاملے کو صرف سیاسی نہیں بلکہ براہِ راست سکیورٹی اور عسکری انتظامات سے بھی جوڑ کر دیکھ رہا ہے۔
سیاسی مبصرین کے مطابق یہ اقدام کسی حتمی معاہدے کا حصہ نہیں بلکہ اعتماد سازی کے ابتدائی مرحلے سے زیادہ مشابہت رکھتا ہے۔
خاص طور پر اس لیے کہ خود ٹرمپ نے بھی حتمی فیصلے کو مؤخر قرار دیا ہے اور مذاکراتی عمل کو جاری بتایا ہے۔
دوسری جانب ایران اس امریکی اقدام کو ناکافی قرار دے رہا ہے۔
تہران کا مؤقف ہے کہ پابندیوں کے خاتمے، منجمد ایرانی اثاثوں کی واپسی اور مستقبل کے کسی بھی معاہدے پر عملدرآمد کی ضمانتوں کے بغیر صرف بحری محاصرہ ختم کرنا کسی بڑی پیش رفت کی علامت نہیں۔
ایرانی ذرائع کے مطابق امریکی صدر کے حالیہ بیانات یکطرفہ نوعیت کے ہیں اور جوہری پروگرام یا دیگر حساس معاملات پر ابھی تک کوئی جامع اتفاق رائے نہیں ہوا۔
ایران کا یہ بھی کہنا ہے کہ منجمد اثاثوں کے مسئلے کو حل کیے بغیر کسی ابتدائی مفاہمت کی بنیاد بھی نہیں رکھی جا سکتی۔
ایران کی جانب سے شکوک و شبہات کی ایک بڑی وجہ مشترکہ اعلامیے کا فقدان بھی ہے۔
اب تک دونوں ممالک نے کسی مشترکہ معاہدے یا واضح فریم ورک کا اعلان نہیں کیا، جس کے باعث تہران امریکی اعلانات کو حتمی پیش رفت تسلیم کرنے سے گریز کر رہا ہے۔
تاہم موجودہ صورتحال سے یہ تاثر ضرور ملتا ہے کہ ٹرمپ انتظامیہ ’قدم بہ قدم‘ حکمت عملی پر عمل پیرا ہے، جس کے تحت دونوں فریق محدود اقدامات کے ذریعے ایک دوسرے کے طرزِ عمل کا جائزہ لے رہے ہیں۔
اگر یہ مرحلہ کامیاب رہا تو وسیع تر سیاسی معاہدے کی راہ ہموار ہو سکتی ہے، بصورت دیگر کشیدگی دوبارہ بڑھنے کا امکان برقرار رہے گا۔
سیاسی تجزیہ کاروں کے مطابق بحری محاصرے کا خاتمہ جنگ کے اختتام کے مترادف نہیں۔
جنگوں کا خاتمہ عام طور پر جامع سیاسی اور عسکری معاہدوں، سکیورٹی ضمانتوں اور نگرانی کے واضح نظام کے ذریعے ہوتا ہے، جبکہ موجودہ صورتحال زیادہ تر ایک مذاکراتی وقفے یا کشیدگی میں عارضی کمی سے مشابہ دکھائی دیتی ہے۔
اسی لیے آبنائے ہرمز اور خلیجی خطے میں جاری تناؤ کے پیشِ نظر یہ کہنا قبل از وقت ہوگا کہ امریکا اور ایران کے درمیان تنازع اپنے اختتام کے قریب پہنچ چکا ہے۔