کسی بھی مسلح تصادم کے آغاز ہی سے بحث شروع ہو جاتی ہے کہ کیا کسی جنگ کا فیصلہ صرف جدید ترین ٹیکنالوجی کے ہتھیار آزمانے کے لیے کیا جاتا ہے یا اس کے پیچھے کوئی جنگی حکمتِ عملی کارفرما ہوتی ہے؟
مزید پڑھیں
27 مارچ 1999 کی سرد شام، جب نیٹو کے فضائی حملوں کے دوران سربیا کی فضاؤں میں امریکی اسٹیلتھ لڑاکا طیارہ F-117 نائٹ ہاک اُڑ رہا تھا، تو کاغذی منصوبے پر اس کی کامیابی یقینی تھی۔
یہ دنیا کا پہلا آپریشنل اسٹیلتھ طیارہ تھا جو امریکی تکنیکی برتری کا منہ بولتا ثبوت تھا۔
دوسری طرف بلغراد کے قریب سربیا کی فوج کے پاس 1960 کی دہائی کا
پرانا سوویت دفاعی نظام S-125 نیوا (جسے نیٹو سام-3 کہتا ہے) موجود تھا۔
کاغذی پلان پر یہ مقابلہ انتہائی یکطرفہ تھا، لیکن حیران کن طور پر اُس رات امریکی اسٹیلتھ طیارہ مار گرایا گیا۔
یہ تاریخی واقعہ اس بات کی بہترین مثال ہے کہ جنگ کے میدان میں نظریاتی حساب کتاب ہمیشہ حقیقت سے مطابقت نہیں رکھتے۔
اس طیارے کی تباہی نہ تو امریکی ٹیکنالوجی کی مکمل ناکامی تھی اور نہ ہی پرانے سوویت نظام کی برتری، بلکہ یہ ایک ایسے تجربہ کار فوجی افسر کی حکمتِ عملی کا نتیجہ تھا جس نے اپنے ریڈار کو مسلسل آن رکھنے کے بجائے صرف چند سیکنڈ کے لیے چلا کر اپنی پوزیشن خفیہ رکھی۔
آج کے دور میں جب روسی یا چینی ساختہ ہتھیاروں کی ناکامی کو مغربی ٹیکنالوجی کے مقابلے میں حتمی شکست قرار دیا جاتا ہے، تو اس کے پیچھے کارفرما کئی اہم حقائق اور دفاعی صنعت کے پوشیدہ پہلوؤں کو نظر انداز کر دیا جاتا ہے۔
شکست ٹیکنالوجی کی ناکامی کا ثبوت نہیں
پچھلی چند دہائیوں میں امریکی قیادت میں مغربی طاقتوں نے روسی اور چینی ہتھیاروں سے لیس ممالک کے خلاف بڑی کامیابیاں حاصل کیں، جیسے 1991 کی دوسری جنگِ خلیج میں عراقی فوج کے سوویت ساختہ T-72 ٹینکوں اور فضائی دفاعی نیٹ ورک کی تباہی۔
اسی طرح حال ہی میں جنوری 2026 میں وینزویلا کے صدر نکولس مادورو کے اغوا کے آپریشن کے دوران وینزویلا کے چینی ریڈارز کا امریکی فضائی اہداف کو ٹریس نہ کر پانا۔
ان تمام واقعات نے عالمی سطح پر یہ تاثر پختہ کیا کہ مغربی ہتھیار مشرقی ہتھیاروں سے کہیں زیادہ برتر ہیں، تاہم اس یکطرفہ بیانیے میں جنگی حالات اور آپریٹنگ ماحول کے فرق کو نظر انداز کر دیا جاتا ہے۔
اکثر اوقات مسئلہ ہتھیار میں نہیں بلکہ اسے استعمال کرنے والی فوج کے آپریشنل پلان میں ہوتا ہے۔
آپریشنل پلان سے مراد یہ ہے کہ کوئی فوج فضائیہ، ٹینکوں، فضائی دفاعی نظام اور انٹیلی جنس کو ایک مربوط منصوبے کے تحت کس طرح استعمال کرتی ہے۔
جب مربوط کمانڈ اینڈ کنٹرول اور مناسب تربیت کا فقدان ہو تو دنیا کا بہترین ہتھیار بھی ایک الگ تھلگ اور ناکارہ پرزہ بن کر رہ جاتا ہے۔
مزید برآں ہتھیار برآمد کرنے والے ممالک (جیسے روس اور چین) کبھی اپنے خریداروں کو وہ اصل اور مکمل ورژن فراہم نہیں کرتے جو وہ خود استعمال کرتے ہیں، بلکہ وہ ان کا ایک مخصوص ایکسپورٹ ورژن تیار کرتے ہیں جس کی صلاحیتیں اصل سے بہت کم ہوتی ہیں۔
اس کا مقصد اپنی تکنیکی برتری کو برقرار رکھنا اور حساس ٹیکنالوجی کو دشمن کے ہاتھ لگنے سے بچانا ہوتا ہے۔
مثال کے طور پر 1990 کی دہائی کے وسط میں سوویت یونین کے خاتمے کے بعد امریکہ نے بیلاروس سے سوویت فضائی دفاعی نظام کے مکمل اجزا صرف تجربات اور جانچ کے لیے حاصل کر لیے تھے۔
سوویت یونین کا ’منکی ماڈل‘ اور جدید برآمدی ہتھیار
سوویت یونین کے فوجی انٹیلی جنس کے سابق افسر وکٹر سوووروف نے اپنی کتاب ’انسائیڈ دی سوویت آرمی‘میں اس پالیسی کو تفصیل سے بیان کیا ہے۔
انہوں نے اس کے لیے غیر سرکاری طور پر استعمال ہونے والی اصطلاح ’منکی ماڈل‘کا ذکر کیا۔
اس پالیسی کے تحت اتحادی ممالک کو جان بوجھ کر ہتھیاروں کے ایسے سادہ اور محدود ورژن بیچے جاتے تھے تاکہ اگر جنگ کے دوران یہ دشمن کے قبضے میں آ بھی جائیں تو جدید سوویت ٹیکنالوجی افشا نہ ہو۔
- جنگی گاڑی (BMP-1): سوووروف کے مطابق سوویت فوج کے زیرِ استعمال اصل ماڈل اور برآمدی ماڈل میں کم از کم 63 تکنیکی تبدیلیاں کی گئی تھیں، جس کی وجہ سے مغربی تجزیہ کاروں نے سوویت فوجی طاقت کا غلط اندازہ لگایا۔
- میزائل نظام: روس کا جدید ترین شارٹ رینج بیلسٹک میزائل ’اسکندر‘ بھی اسی فارمولے کے تحت کام کرتا ہے۔ روسی فوج کے پاس موجود اسکندر-ایم (Iskander-M) کی رینج 500 کلومیٹر ہے اور یہ جدید ترین دفاعی یعنی ریڈار کو دھوکہ دینے کی صلاحیت رکھتا ہے، جبکہ اس کا برآمدی ورژن اسکندر-ای (Iskander-E) صرف 280 کلومیٹر کی رینج اور کم وزنی وار ہیڈ کے ساتھ فراہم کیا جاتا ہے۔
دفاعی محقق رچرڈسن ایچیپونگ کے مطابق ترقی پذیر ممالک روسی یا چینی ہتھیار ہمیشہ خالص فوجی کارکردگی کے لیے نہیں خریدتے، بلکہ اس کے پیچھے سیاسی و سفارتی مقاصد اور بڑی طاقتوں کے ساتھ الحاق کا مظاہرہ کرنا ہوتا ہے۔
وینزویلا کی جانب سے روسی S-300 فضائی دفاعی نظام کی خریداری کا مقصد امریکہ کو روکنا نہیں بلکہ ماسکو کے ساتھ گہرے سیاسی روابط کا اظہار تھا۔
چونکہ وینزویلا نے ان سسٹمز کو مستقل اور غیر متحرک مقامات پر نصب کیا، اس لیے امریکی انٹیلی جنس کو برسوں تک ان کا تجزیہ کرنے کا موقع ملا۔
یہی وجہ ہے کہ جنوری 2026 کے آپریشن کے دوران ایک مختصر اور انتہائی تیز رفتار فضائی مداخلت کے ذریعے اس نیٹ ورک کو غیرمؤثر کر دیا گیا تھا۔
لندن کے ’رائل یونائیٹڈ سروسز انسٹی ٹیوٹ‘ (RUSI) کے تجزیوں کے مطابق روس کا دفاعی نظام S-400 جب خود روس کے اندر کام کرتا ہے تو وہ ایک کثیر السطحی مربوط دفاعی نیٹ ورک کا حصہ ہوتا ہے۔
اس میں شارٹ، میڈیم اور لانگ رینج سسٹمز اور ریڈار ایک دوسرے سے منسلک ہوتے ہیں۔ لیکن جب یہی نظام برآمد کیا جاتا ہے تو خریدار ملک کے پاس وہ وسیع نیٹ ورکنگ موجود نہیں ہوتی، جس کی وجہ سے اس کی کارکردگی انتہائی محدود ہو جاتی ہے۔
پاکستان اور انڈیا فضائی معرکہ (مئی 2025) اور ’جے-10 سی‘ کی حقیقت
اگر ہم یہ دیکھنا چاہیں کہ جب روسی یا چینی ہتھیار ایک مربوط اور تربیت یافتہ فوج کے ہاتھ میں ہوں تو وہ کیسا پرفارم کرتے ہیں تو مئی 2025 میں انڈیا اور پاکستان کے درمیان ہونے والا فضائی ٹکراؤ ایک بہترین کیس اسٹڈی ہے۔
یہ معرکہ کسی سپر پاور اور کمزور ملک کے درمیان نہیں بلکہ دو مساوی اور انتہائی تربیت یافتہ فضائی افواج کے درمیان تھا۔
اس معرکے میں پاکستان کے جے۔10 سی (چینی ساختہ) جو ایکٹو الیکٹرانیکلی اسکینڈ ایرے (AESA) ریڈار، جدید الیکٹرانک وارفیئر، نیٹ ورک ڈیٹا لنک کا حامل ہے، نے مغربی دفاعی بیانیے کے برعکس انتہائی مؤثر اور جارحانہ فضائی دفاع کا مظاہرہ کیا۔
اسی طرح بھارت کے پاس فرانسیسی ساختہ رافیل تھا، جو میٹیور (Meteor) لانگ رینج میزائل، جدید ترین یورپی سنسرز اور فریم ورک کا حامل ہے، تاہم مانیٹرنگ اور تکنیکی برتری کے باوجود معرکے کے دوران کم از کم ایک طیارے کی تباہی کی اطلاعات موصول ہوئیں۔
ایسے ہی چینی میزائل پی ایل۔15 جو ایکٹو ریڈار گائیڈڈ سنسر، رینج 200 کلومیٹر سے زائد، بی وی آر (Beyond Visual Range) صلاحیت کا حامل ہے، نے دشمن کے لیے ’نو اسکیپ زون‘ (No-Escape Zone) قائم کیا، جس نے یورپی ’میٹیور‘ اور امریکی ’امرام‘ کو براہِ راست چیلنج کیا۔
اس معرکے میں چینی ساختہ ’پی ایل۔15‘ میزائل نے انتہائی اہم کردار ادا کیا۔ اس میزائل کی مدد سے پاکستانی طیاروں نے دشمن کو نظروں سے اوجھل فاصلے (Beyond Visual Range) ہی پر نشانہ بنانے کی صلاحیت حاصل کی، جہاں ہوا باز کی ذاتی مہارت سے زیادہ ریڈار کی رینج اور میزائل کی رفتار فیصلہ کن ہوتی ہے۔
اس معرکے کے نتائج نے ثابت کیا کہ چینی ساختہ جدید جنگی پلیٹ فارمز اب مغربی متبادل ہتھیاروں کے مقابلے میں کسی طور پر بھی دوسرے درجے کے ہتھیار نہیں رہے ہیں۔
یوکرین جنگ کے کثیر الجہتی اسباق
2022 سے جاری یوکرین جنگ بھی اس نظریے کو پرکھنے کا ایک اہم ماڈل ہے۔
یوکرینی فوج کو امریکہ اور یورپی ممالک کی جانب سے جدید ترین راکٹ سسٹمز، طویل فاصلے تک مار کرنے والے میزائل، جدید ترین ٹینک، فضائی دفاعی نظام اور انتہائی درست سیٹلائٹ انٹیلی جنس فراہم کی گئی۔
اس کے باوجود یوکرین کے خلاف روسی عسکری مشینری مکمل طور پر مفلوج نہیں ہوئی، کیونکہ روس کی دفاعی صنعت نے خود کو جنگی حالات کے مطابق تیزی سے ڈھالا ہے۔
انہوں نے بڑے پیمانے پر سستے ڈرونز اور گائیڈڈ گلائیڈ بموں کا استعمال شروع کیا اور اپنے کثیر الجہتی فضائی دفاعی نظام کو نیٹ ورک کے ذریعے مزید مربوط کیا۔
یوکرین میں مغربی ہتھیاروں کو روسی توپ خانے کی کثرت، فضائی دفاع اور طویل جنگی حکمتِ عملی کے باعث شدید نقصانات کا سامنا کرنا پڑا۔
یہ صورتحال واضح کرتی ہے کہ جنگ کا رُخ کسی ایک ہتھیار کے ماڈل سے نہیں بلکہ مجموعی عسکری صلاحیت، لاجسٹکس اور افرادی قوت سے طے ہوتا ہے۔