مضمون میں سوال اٹھایا گیا ہے کہ کیا موجودہ آئی پی اوز واقعی سرمایہ کاری کا سنہری موقع ہیں یا پھر وہ زیادہ تر بڑے شیئر ہولڈرز کو فائدہ اور چھوٹے سرمایہ کاروں کو نقصان پہنچا رہے ہیں۔ مصنف کا مؤقف ہے کہ مضبوط نگرانی، شفافیت اور سرمایہ کاروں کے تحفظ کے بغیر سرمایہ مارکیٹ پر اعتماد کمزور ہوتا جائے گا۔
اسٹاک مارکیٹ میں ابتدائی عوامی پیشکش IPO کو طویل عرصے تک سرمایہ کاری کا بہترین موقع قرار دیا جاتا رہا ہے لیکن حالیہ برسوں میں متعدد آئی پی اوز نے ایک اہم سوال کھڑا کر دیا ہے:
اصل فائدہ کس کو ہوتا ہے؟ کمپنی کے بڑے مالکان کو یا عام سرمایہ کار کو؟
بظاہر آئی پی او کا مقصد کمپنی کے لیے سرمایہ جمع کرنا، کاروبار کو وسعت دینا اور سرمایہ کاروں کو ترقی میں شریک کرنا ہوتا ہے، مگر حقیقت یہ ہے کہ کئی کمپنیوں کے حصص فہرست ہونے کے چند ہی ماہ بعد اپنی ابتدائی قیمت سے نیچے آ جاتے ہیں، جس کا سب سے زیادہ نقصان وہ چھوٹے سرمایہ کار اٹھاتے ہیں جنہوں نے مستقبل کے روشن خواب دیکھ کر سرمایہ لگایا تھا۔
مزید پڑھیں
جب کوئی کمپنی اپنے حصص عوام کے لیے پیش کرتی ہے تو اس کے بڑے شیئر ہولڈرز کی دولت کی مارکیٹ ویلیو بڑھ جاتی ہے، بعض اوقات وہ اپنی ملکیت کا حصہ فروخت کر کے نقد سرمایہ حاصل کرتے ہیں یا آئندہ توسیعی منصوبوں کے لیے فنڈ اکٹھا کرتے ہیں۔
لیکن دوسری طرف وہ عام سرمایہ کار، جس نے پراسپیکٹس، مالی تخمینوں اور مستقبل کے وعدوں پر اعتماد کرتے ہوئے سرمایہ کاری
کی، اگر لسٹنگ کے بعد حصص مسلسل گرتے رہیں تو اس کے نقصان کا ذمہ دار کون ہے؟
سعودی مارکیٹ میں ایسی کئی مثالیں موجود ہیں جنہوں نے سرمایہ کاروں کو سخت مالی نقصان پہنچایا۔
بعض کمپنیوں کے حصص ابتدائی قیمت سے کافی نیچے آ گئے اور ہزاروں سرمایہ کار طویل عرصے تک خسارے میں پھنسے رہے۔
ان واقعات نے صرف انفرادی سرمایہ کاروں کو ہی متاثر نہیں کیا بلکہ مارکیٹ پر مجموعی اعتماد کو بھی کمزور کیا۔
مسلسل آنے والے آئی پی اوز مارکیٹ سے اربوں ریال کی لیکویڈیٹی جذب کر لیتے ہیں۔
اگر نئی لسٹ ہونے والی کمپنیوں کے حصص بعد میں گرنا شروع ہو جائیں تو یہی سرمایہ منجمد ہو جاتا ہے، ٹریڈنگ کی سرگرمیاں سست پڑ جاتی ہیں اور سرمایہ کار نئے مواقع سے بھی محتاط ہو جاتے ہیں۔
یوں پورا بازار اعتماد اور سرمایہ دونوں کے بحران سے دوچار ہو سکتا ہے۔
اسی لیے ایک اہم سوال جنم لیتا ہے کہ اگر کسی کمپنی کی انتظامیہ اپنے اعلانات، کاروباری منصوبوں یا مالی اہداف پورے نہ کر سکے اور اس کے نتیجے میں حصص کی قیمت آئی پی او سے نیچے آ جائے تو کیا صرف چھوٹے سرمایہ کار ہی نقصان برداشت کریں؟ کیا بڑے مالکان اور بورڈ آف ڈائریکٹرز کی بھی کوئی ذمہ داری نہیں ہونی چاہیے؟
یقیناً ہر آئی پی او ناکام نہیں ہوتا۔ بہت سی مضبوط کمپنیاں ایسی بھی ہیں جنہیں ترقی اور توسیع کے لیے سرمایہ درکار ہوتا ہے اور وہ سرمایہ کاروں کے لیے طویل المدت منافع کا ذریعہ بنتی ہیں۔
لیکن کامیاب آئی پی او صرف اچھی کمپنی سے نہیں بنتا بلکہ اس کا وقت بھی انتہائی اہم ہوتا ہے۔
اگر مارکیٹ میں لیکویڈیٹی کم ہو یا سرمایہ کاروں کا اعتماد متزلزل ہو تو مضبوط کمپنی بھی توقعات پر پوری نہیں اتر پاتی۔
اسی لیے کمپنیوں کو صرف جلدی لسٹنگ کی دوڑ میں شامل ہونے کے بجائے مارکیٹ کی صورتحال، سرمایہ کاروں کی دلچسپی اور معاشی ماحول کا باریک بینی سے جائزہ لینا چاہیے، تاکہ حصص کی مناسب قیمت برقرار رہے اور سرمایہ کاروں کے مفادات محفوظ رہیں۔
ایک اور رجحان بھی تشویش کا باعث ہے۔ بعض کمپنیاں آئی پی او سے قبل بہترین مالی نتائج پیش کرتی ہیں، لیکن لسٹنگ کے فوراً بعد ان کے منافع میں نمایاں کمی آ جاتی ہے یا کمپنی خسارے میں چلی جاتی ہے۔
متعدد آئی پی اوز لسٹنگ کے بعد قیمتِ اجرا سے نیچے گر گئے
ایسے حالات میں سرمایہ کار کا یہ سوال بالکل جائز ہے کہ کیا کمپنی کی اصل مالی تصویر مکمل طور پر پیش کی گئی تھی؟ کیا حصص کی قیمت کا تعین حقیقت پسندانہ تھا؟
کسی بھی مالیاتی منڈی کی کامیابی کا معیار صرف نئے آئی پی اوز کی تعداد نہیں بلکہ سرمایہ کاروں کا اعتماد، شفافیت، مضبوط نگرانی اور طویل المدت سرمایہ کاری کا فروغ ہوتا ہے۔
اگر نئے آئی پی اوز مسلسل چھوٹے سرمایہ کاروں کے خوابوں کو خساروں میں بدلتے رہے تو نقصان صرف سرمایہ کاروں تک محدود نہیں رہے گا بلکہ پوری مارکیٹ کی ساکھ متاثر ہوگی۔
مالیاتی منڈیوں کو ایسی کمپنیوں کی ضرورت ہے جو سرمایہ کاروں کے لیے حقیقی دولت پیدا کریں، نہ کہ ایسے آئی پی اوز جو امیدیں بیچ کر بعد میں مایوسی اور خسارے کا سبب بن جائیں۔