ایران اور اسرائیل کے درمیان کشیدگی خطرناک مرحلے میں داخل ہوگئی ہے۔
ایران نے اسرائیل پر میزائل حملے کیے جن کے جواب میں اسرائیل نے ایران کے فوجی اور پیٹروکیمیکل اہداف پر فضائی کارروائیاں کیں۔
دونوں ممالک نے ایک دوسرے کے خلاف سخت بیانات جاری کیے ہیں، جبکہ امریکہ بھی صورتحال پر گہری نظر رکھے ہوئے ہے۔ خطے میں وسیع جنگ کے خدشات بڑھ گئے ہیں اور دونوں جانب ہائی الرٹ نافذ کر دیا گیا ہے۔
ایران اور اسرائیل کے درمیان جاری کشیدگی ایک نئے اور خطرناک مرحلے میں داخل ہوگئی ہے۔ پیر کی صبح دونوں ممالک نے ایک دوسرے پر میزائل اور فضائی حملے کیے، جس کے بعد خطے میں وسیع جنگ کے خدشات مزید بڑھ گئے ہیں۔
اسرائیلی فوج کے مطابق ایران کی جانب سے داغے گئے تمام میزائل یا تو فضائی دفاعی نظام نے تباہ کر دیے یا وہ کھلے علاقوں میں جا گرے۔
فوج کا کہنا ہے کہ نابلس کے جنوب مشرق میں واقع ایتمار بستی کے قریب ہونے والا دھماکا میزائلوں کے ملبے کے باعث ہوا، جبکہ کسی جانی نقصان کی اطلاع موصول نہیں ہوئی۔
اس سے قبل اسرائیلی فوج نے ایران کی جانب سے میزائل حملوں کی تصدیق کی تھی، جس کے بعد یروشلم سمیت مختلف علاقوں میں خطرے کے سائرن بج اٹھے۔
اسرائیلی حکام نے شہریوں کو فوری طور پر پناہ گاہوں میں جانے کی ہدایت جاری کی، جبکہ امدادی اداروں نے کسی زخمی کی اطلاع نہ ملنے کی تصدیق کی۔
مزید پڑھیں
دوسری جانب اسرائیل نے ایران کے مغربی اور وسطی علاقوں میں متعدد فضائی حملے کیے۔
ایرانی سرکاری میڈیا کے مطابق تہران، تبریز اور اصفہان سمیت کئی شہروں میں زور دار دھماکوں کی آوازیں سنی گئیں۔
اسرائیلی فوج نے دعویٰ کیا کہ ان کارروائیوں میں ایرانی فوجی اہداف کو نشانہ بنایا گیا۔
کشیدگی میں مزید اضافہ اس وقت ہوا جب اسرائیل نے ایران کے جنوب مغربی شہر بندر ماہشہر میں واقع ایک بڑے پیٹروکیمیکل کمپلیکس پر حملہ کیا۔
اسرائیلی فوج کے مطابق کارروائی انٹیلی جنس معلومات کی بنیاد پر کی گئی، جبکہ ایرانی حکام نے بھی ’قارون پیٹروکیمیکل پلانٹ‘ کو نقصان پہنچنے کی تصدیق کر دی۔
حملے کے بعد علاقے کی خصوصی اقتصادی زون کو خالی کرا لیا گیا۔
ادھر ایرانی پاسدارانِ انقلاب نے اسرائیل پر میزائل حملوں کی ذمہ داری قبول کرتے ہوئے کہا کہ یہ کارروائی اسرائیلی حملوں کے جواب میں کی گئی۔
ایرانی بیان کے مطابق اسرائیل کی ’نیواتیم‘ اور ’تل نوف‘ فضائی اڈوں کو نشانہ بنایا گیا۔ پاسدارانِ انقلاب نے خبردار کیا کہ اگر اسرائیل نے حملے جاری رکھے تو ایران تمام محاذوں پر مزید وسیع کارروائیاں کرنے کے لیے تیار ہے۔
یہ تازہ تصادم اتوار کو بیروت کے جنوبی مضافاتی علاقے الضاحیہ پر اسرائیلی فضائی حملے کے بعد شروع ہوا، جہاں دو افراد ہلاک ہوئے تھے۔
ایران نے اپنے میزائل حملوں کو اسی کارروائی کا جواب قرار دیتے ہوئے مزید سخت ردعمل کی دھمکی دی ہے۔
اسرائیل میں وزیرِاعظم کی زیر صدارت سکیورٹی کابینہ کا ہنگامی اجلاس طلب کر لیا گیا ہے، جبکہ فوج کو ہائی الرٹ پر رکھا گیا ہے۔
اسرائیلی میڈیا کے مطابق ملک اضافی ایرانی حملوں کے خدشے کے پیش نظر مکمل جنگی تیاریوں میں مصروف ہے۔
اسرائیلی ذرائع نے دعویٰ کیا ہے کہ ایران پر حالیہ حملے امریکہ کے ساتھ مکمل رابطے اور ہم آہنگی کے تحت کیے گئے۔
اسرائیلی حکام کا کہنا ہے کہ آنے والے دنوں میں ایران اور اس کے اتحادیوں کے ساتھ مزید جھڑپوں کا امکان موجود ہے۔
سیاسی سطح پر بھی سرگرمیاں تیز ہوگئی ہیں۔ امریکی صدر ڈونلڈ ٹرمپ نے صورتحال پر تشویش کا اظہار کرتے ہوئے کہا کہ ایرانی حملے جاری مذاکراتی عمل کے لیے نقصان دہ ثابت ہوں گے۔
امریکی میڈیا رپورٹس کے مطابق ٹرمپ اسرائیلی قیادت سے رابطہ کر کے کشیدگی کم کرنے کی کوشش کر رہے ہیں۔
یہ تمام پیش رفت ایسے وقت میں سامنے آئی ہے جب امریکہ اور ایران کے درمیان جاری بالواسطہ مذاکرات پہلے ہی تعطل کا شکار ہیں۔
ماہرین کا کہنا ہے کہ حالیہ میزائل اور فضائی حملے 8 اپریل کے جنگ بندی معاہدے کے بعد دونوں ممالک کے درمیان سب سے خطرناک براہِ راست تصادم ہیں، جو پورے مشرقِ وسطیٰ کو ایک بڑی علاقائی جنگ کی طرف دھکیل سکتے ہیں۔