پاکستان نے ایران اور امریکا کے درمیان بڑھتی کشیدگی کے دوران سفارتی سرگرمیاں مزید تیز کر دی ہیں۔
وزیر داخلہ محسن نقوی تہران میں اعلیٰ ایرانی قیادت سے ملاقاتیں کی ہیں، جبکہ اطلاعات ہیں کہ وہ آرمی چیف جنرل عاصم منیر کا خصوصی پیغام بھی ایرانی قیادت تک پہنچایا ہے۔
اسلام آباد خطے میں کشیدگی کم کرنے اور آبنائے ہرمز کی بحالی کے لیے ثالثی کا کردار ادا کر رہا ہے۔
ایرانی سرکاری ذرائع ابلاغ کے مطابق پاکستان کے وزیر داخلہ محسن نقوی نے ہفتہ کی شام اپنے ایرانی ہم منصب اسکندر مومنی سے ملاقات کی جبکہ آج اتوار کی صبح انہوں نے ایرانی وزیر خارجہ عباس عراقچی کے ساتھ بھی اہم مذاکرات کیے ہیں۔
محسن نقوی گزشتہ روز تہران پہنچے تھے۔
ان کا یہ دورہ ایسے وقت میں ہو رہا ہے جب اسلام آباد ایران اور امریکا کے درمیان جاری کشیدگی میں کمی اور مذاکراتی عمل کو آگے بڑھانے کے لیے سفارتی کوششیں تیز کر رہا ہے، جبکہ خطے میں نئی جھڑپوں اور حملوں نے صورتحال کو مزید پیچیدہ بنا دیا ہے۔
مزید پڑھیں
پاکستانی سکیورٹی اور سفارتی ذرائع نے جرمن خبر رساں ایجنسی ڈی پی اے کو بتایا کہ ایرانی حکام کے ساتھ اعلیٰ سطحی ملاقاتوں کا مقصد ایران اور امریکا کے درمیان مکالمے کو فروغ دینا اور اختلافات کم کرنے کے امکانات کا جائزہ لینا ہے۔
ایرانی سرکاری نشریاتی ادارے کے مطابق محسن نقوی کی تہران آمد کے بعد ان کی ملاقات ایرانی صدر مسعود پزکشیان سے بھی طے کی گئی
جبکہ ایرانی خبر رساں ایجنسی ایسنا نے رپورٹ کیا کہ پاکستانی وزیر داخلہ اپنے دورے کے دوران پاکستان کے آرمی چیف عاصم منیر کا خصوصی پیغام ایرانی رہنما مجتبی خامنہ ای تک پہنچایا تاہم اس پیغام کے مندرجات ظاہر نہیں کیے گئے۔
پاکستانی حکام کے مطابق اسلام آباد قطر، ترکی اور مصر سمیت کئی علاقائی ممالک کے تعاون سے ایران اور امریکا کے درمیان فاصلے کم کرنے، خطے میں کشیدگی گھٹانے اور آبنائے ہرمز کی مکمل بحالی کے لیے سرگرم کردار ادا کر رہا ہے۔
محسن نقوی کو آرمی چیف عاصم منیر کا قریبی ساتھی تصور کیا جاتا ہے، جبکہ عاصم منیر خود بھی ماضی میں ایران کا دورہ کر چکے ہیں تاکہ متحارب فریقوں کے درمیان ثالثی کی پاکستانی کوششوں کو آگے بڑھایا جا سکے۔
وزیر داخلہ ایران اور امریکا کے درمیان براہ راست مذاکرات کے آغاز سے ہی تہران اور اسلام آباد کے درمیان مسلسل سفارتی رابطوں میں مصروف ہیں۔
یہ دورہ اس ملاقات کے بعد سامنے آیا ہے جو محسن نقوی اور اسکندر مومنی کے درمیان گزشتہ ہفتے کرغیزستان میں وزرائے داخلہ اجلاس کے موقع پر ہوئی تھی۔
پاکستانی وزارت داخلہ کے مطابق دونوں وزرا نے اس بات پر اتفاق کیا کہ خطے میں پائیدار امن کے قیام کے لیے سفارتی کوششوں کو مستقل مزاجی کے ساتھ جاری رکھنا ناگزیر ہے۔
یاد رہے کہ تقریباً دو ماہ قبل جنگ بندی کے باوجود حالیہ دنوں میں خلیجی خطے میں امریکا اور ایران کے درمیان ایک بار پھر حملوں کا تبادلہ دیکھنے میں آیا ہے، جس سے خطے میں کشیدگی اور غیر یقینی صورتحال میں اضافہ ہوا ہے۔