امریکی صدر ڈونلڈ ٹرمپ نے 2024 کے انتخابات میں مہنگائی پر قابو پانے اور سستا ایندھن فراہم کرنے کے وعدوں کے ساتھ اقتدار حاصل کیا تھا، مگر اب بڑھتی مہنگائی، پٹرول کی بلند قیمتیں اور ایران کے ساتھ جاری کشیدگی ان کی سیاسی مقبولیت کے لیے بڑا خطرہ بنتی جا رہی ہیں۔
نومبر 2026 کے وسط مدتی انتخابات سے قبل معاشی صورتحال امریکی سیاست کا سب سے اہم موضوع بن چکی ہے۔
امریکی سیاست میں ایک مشہور مقولہ برسوں سے گونجتا رہا ہے: یہ معیشت ہے، بے وقوف!
یہ جملہ 1992 کے صدارتی انتخاب میں بل کلنٹن کے مشیر جیمز کارویل نے استعمال کیا تھا، اور وقت کے ساتھ امریکی انتخابات کا ایک غیرلکھا اصول بن گیا۔
ووٹرز جمہوریت، قومی سلامتی یا خارجہ پالیسی پر بحث ضرور کرتے ہیں مگر ووٹ ڈالنے سے پہلے وہ اپنی جیب، پٹرول پمپ کے نرخ اور کریڈٹ کارڈ کے بل کو زیادہ اہمیت دیتے ہیں۔
امریکی صدر ڈونلڈ ٹرمپ اس حقیقت سے بخوبی واقف ہیں۔
2016 میں وہ معاشی بے چینی کے سہارے وائٹ ہاؤس پہنچے، 2020 میں کورونا وبا سے متاثرہ معیشت نے انہیں نقصان پہنچایا اور 2024 میں انہوں نے مہنگائی ختم کرنے اور پٹرول کی قیمت دو ڈالر فی گیلن سے کم کرنے کے وعدے کے ساتھ دوبارہ اقتدار حاصل کیا۔
مزید پڑھیں
تاہم اپنی دوسری مدتِ صدارت کے دو سال مکمل ہونے سے پہلے ہی یہ وعدے دباؤ کا شکار دکھائی دے رہے ہیں۔
نومبر 2026 کے وسط مدتی کانگریسی انتخابات قریب آ رہے ہیں اور امریکی ووٹر مہنگائی، ایندھن کی بڑھتی قیمتوں اور معاشی دباؤ سے نالاں نظر آتے ہیں۔
حالیہ دنوں میں آبنائے ہرمز کھولنے کی ضرورت پر گفتگو کرتے ہوئے
ٹرمپ نے کہا کہ ایران سمجھتا ہے کہ وہ ان کی مدتِ صدارت ختم ہونے تک انتظار کر سکتا ہے۔
اس موقع پر انہوں نے یہ بھی کہا کہ انہیں وسط مدتی انتخابات کی کوئی پروا نہیں۔
لیکن سیاسی مبصرین کے مطابق امریکی سیاست میں انتخابات کو نظرانداز کرنا آسان نہیں۔ 2024 میں ٹرمپ کی کامیابی کی بنیاد معیشت، مہنگائی اور توانائی کی قیمتوں پر ان کی برتری تھی، مگر اب یہی عوامل ان کے لیے سیاسی خطرہ بنتے جا رہے ہیں۔
اپریل 2026 میں امریکی افراطِ زر کی شرح 3.8 فیصد تک پہنچ گئی، جو 2023 کے بعد بلند ترین سطح ہے۔
اس اضافے کی ایک بڑی وجہ ایران کے ساتھ جنگ کے بعد توانائی کی قیمتوں میں نمایاں اضافہ ہے۔
تیل اور گیس کی قیمتیں 2022 کے بعد بلند ترین سطح پر پہنچ چکی ہیں جبکہ عام پٹرول کی اوسط قیمت 4.50 ڈالر فی گیلن تک جا پہنچی ہے۔
حالیہ سرویز کے مطابق صرف 26 فیصد امریکی مہنگائی کے معاملے میں ٹرمپ کی کارکردگی سے مطمئن ہیں، جبکہ پٹرول کی قیمتوں کے حوالے سے ان کی مقبولیت محض 21 فیصد رہ گئی ہے۔
آبنائے ہرمز کا سیاسی جال
آبنائے ہرمز کا بحران اس بات کی واضح مثال بن چکا ہے کہ جغرافیائی سیاست اور معیشت کس طرح ایک دوسرے سے جڑی ہوئی ہیں۔
اگرچہ امریکا خلیجی خطے سے محدود مقدار میں تیل درآمد کرتا ہے، لیکن عالمی منڈی میں تیل کی قیمتوں میں ہر اضافے کا براہِ راست اثر امریکی صارفین پر پڑتا ہے۔
امریکی وزیر توانائی کرس رائٹ پہلے ہی خبردار کر چکے ہیں کہ سستے پٹرول کا دور وقتی طور پر ختم ہو چکا ہے اور 3 ڈالر فی گیلن سے کم قیمتوں کی واپسی 2027 سے پہلے ممکن نہیں۔
جنگ کے آغاز کے بعد پٹرول کی قیمتوں میں 50 فیصد سے زیادہ اضافے نے امریکی صارفین کے اخراجات کے انداز کو تبدیل کر دیا ہے، جس کے بعد ڈیموکریٹک پارٹی نے بھی اپنی انتخابی حکمت عملی میں اس مسئلے کو مرکزی حیثیت دینا شروع کر دی ہے۔
تاریخ کیا کہتی ہے؟
امریکی تاریخ میں کئی صدور معاشی دباؤ کے باعث سیاسی نقصان اٹھا چکے ہیں۔
- جیرالڈ فورڈ معاشی جمود اور مہنگائی کے بحران کے بعد 1976 میں انتخاب ہار گئے۔
- جمی کارٹر کو 1979 کے تیل بحران اور طویل پٹرول قطاروں نے سیاسی طور پر کمزور کر دیا، اور 1980 میں رونالڈ ریگن نے انہیں شکست دی۔
- جارج بس نے ٹیکس بڑھائے تو سیاسی قیمت چکائی اور بل کلنٹن کے لیے راستہ ہموار ہوا۔
- 2008 کے مالیاتی بحران میں جارج ڈبلیو بس نے بینکوں کو بچانے کے لیے 700 ارب ڈالر کا پیکیج منظور کیا، مگر ریپبلکن پارٹی وائٹ ہاؤس سے محروم ہوگئی۔
- بعد ازاں باراک اوباما نے معاشی بحالی کے لیے سخت فیصلے کیے اور سیاسی نقصان اٹھایا۔
’مجھے پروا نہیں‘ کا خطرہ
سیاسی تجزیہ کاروں کے مطابق اگر ٹرمپ واقعی انتخابات کی پروا نہیں کرتے تو بھی وہ معاشی حقائق کو نظرانداز نہیں کر سکتے۔
جمہوری نظام کی ایک بڑی خصوصیت یہی ہے کہ ووٹر بالآخر حکمرانوں کو ان کی معاشی پالیسیوں کی بنیاد پر جوابدہ بناتے ہیں۔
کئی ریپبلکن حکمتِ عملی سازوں کا خیال ہے کہ اگر ایران کے ساتھ تنازع جلد ختم بھی ہو جائے تو اس کے مثبت معاشی اثرات نومبر 2026 کے انتخابات سے پہلے عوام تک نہیں پہنچ سکیں گے، کیونکہ معاشی تکلیف فوری محسوس ہوتی ہے جبکہ بحالی میں مہینے یا سال لگ سکتے ہیں۔
اگرچہ ٹرمپ کو ایک غیرمعمولی سیاسی حکمتِ عملی رکھنے والا رہنما سمجھا جاتا ہے اور ماضی میں وہ کئی بار تمام پیش گوئیوں کو غلط ثابت کر چکے ہیں، تاہم امریکی سیاسی تاریخ ایک سبق بار بار دہراتی ہے:
آپ کہہ سکتے ہیں کہ آپ کو انتخابات کی پروا نہیں، آپ یہ بھی کہہ سکتے ہیں کہ معیشت اہم نہیں لیکن ووٹنگ کے دن اپنی گاڑی میں پٹرول ڈلوانے والا امریکی ووٹر ہی فیصلہ کرتا ہے کہ حقیقت کیا ہے۔