امریکہ اور ایران کے درمیان جاری بالواسطہ مذاکرات ایک بار پھر پیچیدہ مرحلے میں داخل ہوگئے ہیں۔
صدر ڈونلڈ ٹرمپ کی جانب سے مجوزہ معاہدے میں نئی سخت ترامیم کے بعد تہران نے واضح کیا ہے کہ وہ قابلِ اعتماد ضمانتوں کے بغیر کسی معاہدے پر دستخط نہیں کرے گا، جبکہ یورینیم ذخائر اور آبنائے ہرمز بدستور سب سے بڑے تنازعات ہیں۔
ایک باخبر ذریعے نے اتوار کے روز انکشاف کیا ہے کہ امریکی صدر ڈونلڈ ٹرمپ نے ایران کے ساتھ مجوزہ مفاہمتی مسودے میں نئی ترامیم شامل کرنے کے بعد اسے دوبارہ تہران بھیج دیا ہے تاکہ ایرانی قیادت اس کا جائزہ لے کر اپنی منظوری یا اعتراضات سے آگاہ کر سکے۔
ذرائع کے مطابق یہ تیسری مرتبہ ہے کہ ٹرمپ نے امریکی تجویز میں تبدیلیاں کی ہیں۔
واشنگٹن اور تہران کے درمیان یہ مسودہ مختلف سفارتی ذرائع اور ثالثی چینلز کے ذریعے مسلسل تبادلہ کیا جا رہا ہے۔
مزید پڑھیں
رپورٹس کے مطابق پاکستان دونوں ممالک کے درمیان پیغامات اور تجاویز کی ترسیل میں مرکزی کردار ادا کر رہا ہے۔
ذرائع کا کہنا ہے کہ حالیہ امریکی ترامیم ’اہم نوعیت‘ کی ہیں، تاہم ان کی تفصیلات سامنے نہیں لائی گئیں۔
ساتھ ہی یہ بھی واضح کیا گیا ہے کہ کسی حتمی معاہدے کے لیے ابھی تک کوئی ڈیڈ لائن یا مقررہ مدت طے نہیں کی گئی۔
مسودے پر مسلسل ردوبدل
دوسری جانب ایرانی ذرائع نے بھی تصدیق کی ہے کہ ممکنہ فریم ورک معاہدے کے متن پر تہران اور واشنگٹن کے درمیان پیغامات کا تبادلہ جاری ہے۔
ایرانی خبر رساں ایجنسی تسنیم کے مطابق دونوں فریق باری باری اپنی تجاویز اور ترامیم پیش کر رہے ہیں، تاہم اب تک کسی حتمی متن پر اتفاق نہیں ہو سکا۔
یہ پیش رفت ایسے وقت میں سامنے آئی ہے جب امریکی حکام اور باخبر ذرائع نے اشارہ دیا ہے کہ ٹرمپ انتظامیہ نے ایران کو نسبتاً سخت شرائط پر مشتمل نئی تجویز ارسال کی ہے، جس سے مذاکرات کا دورانیہ مزید طویل ہو سکتا ہے۔
ادھر امریکی نشریاتی ادارے سی این این نے ذرائع کے حوالے سے بتایا ہے کہ صدر ٹرمپ ایران کو بڑی مالی رقوم فراہم کرنے کے خیال کے حامی نہیں ہیں۔
فوجی آپشن اب بھی موجود
صدر ٹرمپ نے ایک مرتبہ پھر اس بات پر زور دیا ہے کہ اگرچہ وہ سفارتی حل کو ترجیح دیتے ہیں، تاہم ضرورت پڑنے پر فوجی کارروائی کا آپشن اب بھی موجود ہے۔
فاکس نیوز کو دیے گئے ایک انٹرویو میں انہوں نے کہا کہ ایران کے ساتھ معاہدہ طے پانے کی صورت میں آبنائے ہرمز فوری طور پر عالمی بحری آمدورفت کے لیے کھول دی جائے گی۔
انہوں نے مزید کہا کہ ایران کے جوہری پروگرام کے معاملے کے حل اور آبنائے ہرمز کی بحالی کے بعد امریکی افواج خطے سے واپس چلی جائیں گی۔
ٹرمپ کے مطابق ایران کو کبھی بھی جوہری ہتھیار حاصل کرنے کی اجازت نہیں دی جا سکتی۔
انہوں نے اعتراف کیا کہ مذاکرات میں وقت لگ رہا ہے کیونکہ ایرانی فریق تجربہ کار مذاکرات کاروں پر مشتمل ہے، تاہم انہوں نے یہ بھی واضح کیا کہ وہ کسی جلد بازی میں نہیں ہیں۔
ٹرمپ کا کہنا تھا کہ تہران اصولی طور پر جوہری ہتھیار نہ بنانے اور نہ خریدنے پر آمادگی ظاہر کر چکا ہے۔
ایران کا مطالبہ: مضبوط اور قابلِ عمل ضمانتیں
ایرانی پارلیمنٹ کے اسپیکر اور مذاکراتی عمل میں نمایاں کردار رکھنے والے محمد باقر قالیباف نے کہا ہے کہ ایران کسی ایسے معاہدے کو قبول نہیں کرے گا جس میں ایرانی حقوق اور مفادات کے تحفظ کے لیے ’مضبوط اور یقینی ضمانتیں‘ شامل نہ ہوں۔
ایرانی رکن پارلیمنٹ محمود نبویان کے مطابق ممکنہ معاہدے کی ضمانت کے لیے اقوام متحدہ کی سلامتی کونسل کی قرارداد ایک مؤثر راستہ ثابت ہو سکتی ہے، جو دونوں فریقوں کو اپنی ذمہ داریوں کا پابند بنائے۔
ایرانی ذرائع کے مطابق تہران اس بات پر بھی زور دے رہا ہے کہ معاہدے پر عمل درآمد مرحلہ وار اور باہمی بنیادوں پر ہو، یعنی ایران کوئی قدم اس وقت تک نہ اٹھائے جب تک امریکہ اعتماد سازی کے اقدامات نہ کرے۔
بعض اطلاعات کے مطابق مجوزہ فریم ورک میں ایک بین الاقوامی نگرانی کمیٹی کے قیام کی تجویز بھی شامل ہے جس میں چین، روس اور پاکستان شریک ہوں گے۔
ٹرمپ نے ایران
کے ساتھ مجوزہ
معاہدے میں
تیسری بار
ترامیم کیں۔
دو بڑے تنازعات اب بھی برقرار
واشنگٹن اور تہران کے درمیان سب سے بڑا اختلاف ایران کے پاس موجود تقریباً 440 کلو گرام اعلیٰ درجے کے افزودہ یورینیم کے ذخیرے پر ہے۔
امریکہ اس مواد کو کسی تیسرے ملک منتقل کرنے کا مطالبہ کر رہا ہے، جبکہ ایران اس تجویز کو مسترد کر رہا ہے۔
اسی طرح بیرون ملک منجمد ایرانی اثاثوں اور فنڈز کا معاملہ بھی تاحال حل طلب ہے اور اس حوالے سے مختلف تجاویز زیر غور ہیں۔
دوسری بڑی رکاوٹ آبنائے ہرمز کا مستقبل ہے۔
جنگ کے آغاز پر ایران نے اس اہم بحری گزرگاہ کو بند کر دیا تھا، جس کے جواب میں امریکہ نے ایرانی بندرگاہوں پر پابندیاں اور عملی محاصرہ نافذ کیا۔
امریکہ آبنائے ہرمز پر ایران کے خصوصی کنٹرول کی مخالفت کر رہا ہے، جبکہ تہران اسے اپنی اہم ترین ضمانتی طاقت قرار دیتا ہے اور اشارہ دے چکا ہے کہ اگر معاہدے کی خلاف ورزی ہوئی تو وہ اس آبی راستے میں جہاز رانی کے انتظامات پر نظرثانی کر سکتا ہے۔
ان تمام اختلافات کے باوجود دونوں فریق مذاکراتی عمل جاری رکھنے پر متفق ہیں، تاہم موجودہ صورتحال ظاہر کرتی ہے کہ حتمی معاہدے تک پہنچنے کے لیے ابھی کئی پیچیدہ مراحل باقی ہیں۔