امریکی صدر ڈونلڈ ٹرمپ نے ایران کو جنگ کے خاتمے کے لیے ایک نیا اور زیادہ سخت معاہدہ بھیجا ہے۔
اطلاعات کے مطابق نئی شرائط میں افزودہ یورینیم کی منتقلی، جوہری پروگرام پر سخت پابندیاں اور آبنائے ہرمز کی غیر مشروط بحالی شامل ہیں، جس سے مذاکرات مزید طول پکڑ سکتے ہیں۔
اگرچہ گزشتہ چند دنوں میں ایران اور امریکا کے درمیان معاہدہ طے پانے کے امکانات بڑھتے دکھائی دے رہے تھے تاہم باخبر امریکی حکام نے انکشاف کیا ہے کہ امریکی صدر ڈونلڈ ٹرمپ نے جنگ کے خاتمے کے لیے تہران کو ایک نیا اور زیادہ سخت مسودہ بھیجا ہے۔
حکام کے مطابق ٹرمپ نے مجوزہ معاہدے کی شرائط مزید سخت کرتے ہوئے ترمیم شدہ فریم ورک ایران کو دوبارہ جائزے کے لیے بھجوا دیا ہے۔
مزید پڑھیں
امریکی اخبار نیویارک ٹائمز کے مطابق ان ترامیم کی تفصیلات ظاہر نہیں کی گئیں تاہم دیگر امریکی حکام نے بتایا کہ ان کا تعلق ایران کے اندر موجود اعلیٰ درجے کے افزودہ یورینیم کے مستقبل سے ہے۔
نئی ترامیم کے باعث دونوں ممالک کے درمیان مذاکرات مزید چند روز تک طول پکڑ سکتے ہیں، جس کے بعد ہی اس معاہدے پر کوئی حتمی فیصلہ متوقع ہے۔
یہ معاہدہ اس جنگ کے خاتمے کا ذریعہ بن سکتا ہے جو امریکا اور اسرائیل کی جانب سے 28 فروری کو ایران پر مشترکہ حملوں کے بعد شروع ہوئی تھی۔
دو روز قبل امریکی ذرائع نے فرانس پریس کو بتایا تھا کہ معاہدے کی تجویز ٹرمپ کی منظوری کی منتظر ہے تاہم گزشتہ جمعہ وائٹ ہاؤس کے سیچویشن روم میں ہونے والے اجلاس کے بعد بھی کوئی حتمی فیصلہ نہیں کیا گیا۔
صدر ٹرمپ نے واضح کیا ہے کہ کسی بھی معاہدے میں ایران کی جانب سے جوہری ہتھیار نہ بنانے کی ضمانت اور آبنائے ہرمز کو مکمل اور غیر مشروط طور پر دوبارہ کھولنا شامل ہونا چاہئے، جہاں سے دنیا کی تقریباً 20 فیصد تیل سپلائی گزرتی ہے۔
انہوں نے یہ بھی کہا کہ وہ معاہدے کے لیے جلد بازی نہیں کریں گے اور اپنی ’سرخ لکیروں‘ پر قائم رہیں گے۔
ٹرمپ متعدد مواقع پر یہ عندیہ بھی دے چکے ہیں کہ اگر معاہدہ نہ ہوا تو امریکا دوبارہ فوجی کارروائی کا راستہ اختیار کر سکتا ہے، اگرچہ وہ اب بھی سفارتی حل اور ہرمز کی فوری بحالی کو ترجیح دیتے ہیں۔
یاد رہے کہ دونوں فریق کئی ہفتوں سے پاکستانی ثالثی کے ذریعے مذاکرات کر رہے ہیں تاہم کئی اہم نکات تاحال حل طلب ہیں۔
ان میں سب سے اہم تقریباً 440 کلوگرام اعلیٰ درجے کے افزودہ یورینیم کا معاملہ ہے۔
ایران اس مواد کو کسی تیسرے ملک، خصوصاً امریکا، منتقل کرنے کی مخالفت کر رہا ہے، جبکہ واشنگٹن اس مطالبے پر قائم ہے۔
اس کے علاوہ بیرون ملک منجمد ایرانی اثاثوں کا مسئلہ بھی مذاکرات میں ایک بڑی رکاوٹ بنا ہوا ہے، جس کے حل کے لیے مختلف تجاویز زیر غور ہیں۔