محمد عاقل
جدہ
برصغیر میں عام طور پر یہ تصور پایا جاتا ہے کہ مرد کو نماز کے وقت لازماً ٹوپی پہننی چاہئے، جبکہ صحیح احادیث میں ایسا کوئی واضح حکم موجود نہیں کہ مرد کی نماز سر ڈھانپے بغیر درست نہیں ہوتی۔
ٹوپی، عمامہ یا رومال لباس اور معاشرتی روایت کا حصہ ہوسکتے ہیں، مگر انہیں نماز کی صحت کی شرط قرار دینے کے لئے واضح شرعی دلیل ضروری ہے۔
اچھا دکھائی دینے کی خواہش ہر انسان میں ہوتی ہے۔
لباس نہ صرف ظاہری شخصیت سنوارتا ہے بلکہ انسان کی تہذیب، مزاج اور کردار کی بھی عکاسی کرتا ہے۔
اسلام بھی پاکیزگی، صفائی اور اچھا لباس اختیار کرنے کی ترغیب دیتا ہے۔
رسول اکرمﷺ نے فرمایا:
’بے شک اللہ تعالیٰ جمیل ہے اور جمال کو پسند فرماتا ہے۔‘ (صحیح مسلم)
دنیا کی مختلف قوموں اور معاشروں میں سر ڈھانپنے کے الگ الگ طریقے رائج رہے ہیں۔
عرب ممالک میں رومال یا غترہ، برصغیر میں ٹوپی اور پگڑی جبکہ مختلف علاقوں میں مخصوص طرز کے سرپوش ثقافت کا حصہ ہیں۔
لہٰذا ٹوپی پہننا بذاتِ خود کوئی ناپسندیدہ عمل نہیں، بلکہ یہ لباس اور معاشرتی روایت کا حصہ ہوسکتا ہے۔
اصل سوال یہ ہے کہ کیا نماز کے دوران مرد کے لئے سر ڈھانپنا ضروری ہے، اور کیا ٹوپی کے بغیر نماز ناقص یا ناپسندیدہ ہوجاتی ہے؟
قرآن و حدیث کے مطالعے سے یہ بات سامنے آتی ہے کہ کسی صحیح حدیث میں نبی کریمﷺ نے مرد کو نماز کے دوران لازماً ٹوپی، عمامہ یا کوئی دوسرا کپڑا سر پر رکھنے کا حکم نہیں دیا۔
مزید پڑھیں
اگر نماز میں سر ڈھانپنا ضروری ہوتا تو اس کا حکم اسی وضاحت کے ساتھ دیا جاتا جس طرح نماز کے دوسرے ضروری آداب اور ستر کے احکام بیان کئے گئے ہیں۔
صحیح بخاری میں حضرت ابوہریرہؓ سے روایت ہے کہ رسول اللہﷺ نے فرمایا:
’تم میں سے کوئی ایک کپڑے میں اس طرح نماز نہ پڑھے کہ اس کے کندھوں پر کچھ نہ ہو۔‘
اس حدیث میں نماز کے لباس سے متعلق کندھوں کا ذکر واضح طور پر موجود ہے، لیکن سر ڈھانپنے کا کوئی حکم نہیں دیا گیا۔
اس سے معلوم ہوتا ہے کہ مرد کے لئے نماز میں سر ڈھانپنا نماز کی صحت کی شرط نہیں۔
اسی طرح احادیث میں بالغ عورت کے لئے نماز کے وقت سر ڈھانپنے کا خاص حکم آیا ہے۔
فقہاء نے بھی اس فرق کو واضح کیا ہے کہ عورت کے لئے نماز میں سر ستر کا حصہ ہے، جبکہ مرد کے سر کو اس درجے میں شمار نہیں کیا گیا۔
صحیح بخاری میں حضرت جابر بن عبداللہؓ سے ایک اہم واقعہ منقول ہے۔
وہ ایک کپڑے میں لپٹ کر نماز پڑھ رہے تھے جبکہ ان کے پاس دوسرا کپڑا بھی موجود تھا۔
نماز کے بعد ان سے اس کی وجہ پوچھی گئی تو انہوں نے بتایا کہ انہوں نے رسول اللہﷺ کو اسی طرح نماز پڑھتے دیکھا تھا۔
اس روایت سے معلوم ہوتا ہے کہ نماز کے لئے ایسا مخصوص ظاہری لباس لازم نہیں جسے دین نے لازم قرار نہ دیا ہو۔
یہ کہنا بھی درست نہیں کہ اگر کوئی شخص ٹوپی کے بغیر نماز پڑھے تو اس کی نماز میں کمی واقع ہوجاتی ہے۔
ٹوپی پہننا کسی شخص کی عادت، ثقافت یا پسند ہوسکتی ہے، لیکن اسے نماز کی ایسی شرط قرار دینا جس کے بغیر عبادت ناقص سمجھی جائے، اس کے لئے واضح شرعی دلیل درکار ہے۔
بعض لوگ یہ استدلال کرتے ہیں کہ ٹوپی یا پگڑی احترام اور شرافت کی علامت ہے، اس لئے اللہ کے سامنے نماز میں بھی سر ڈھانپنا چاہئے۔
لیکن حج اور عمرہ کی مثال ہمارے سامنے ہے۔
حالتِ احرام میں مرد کے لئے سر کو کھلا رکھنا ضروری ہوتا ہے، اور اسی حالت میں وہ مسجد الحرام میں نماز بھی ادا کرتا ہے۔
اس سے یہ حقیقت واضح ہوتی ہے کہ ننگا سر ہونا بذاتِ خود بے ادبی یا عبادت کے منافی نہیں۔
احادیث میں نبی کریمﷺ کے غسل کے بعد مسجد تشریف لانے اور آپﷺ کے بالوں سے پانی کے قطرے ٹپکنے کا ذکر بھی ملتا ہے۔
حضرت عبداللہ بن عباسؓ سے روایت ہے کہ رسول اللہﷺ مسجد تشریف لائے تو آپﷺ کے سر مبارک سے پانی ٹپک رہا تھا اور آپ ﷺ اپنے بالوں کو ہاتھ سے درست کررہے تھے۔
اس روایت سے بھی یہ نتیجہ اخذ کیا جاتا ہے کہ نماز کے لئے سر پر لازماً ٹوپی یا عمامہ موجود ہونا ضروری نہیں۔
ٹوپی پہننا
جائز اور اچھی
معاشرتی روایت
ہوسکتی ہے
اس بحث کا مقصد ہرگز یہ نہیں کہ لوگ ٹوپی پہننا چھوڑ دیں یا ننگے سر نماز پڑھنے کو کوئی الگ شعار بنالیں۔
جو شخص ٹوپی یا عمامہ پہن کر نماز پڑھتا ہے اسے بھی پورا اختیار ہے، اور جو بغیر ٹوپی نماز ادا کرتا ہے اس کی نماز کو محض اسی بنیاد پر غلط قرار نہیں دیا جاسکتا۔
بعض مساجد میں ٹوپیاں اس تصور کے تحت رکھی جاتی ہیں کہ ننگے سر نماز نہیں ہوتی۔
کبھی ایسا بھی دیکھا گیا ہے کہ کسی نمازی کے سر پر دورانِ نماز پیچھے سے ٹوپی رکھ دی جاتی ہے۔
اس قسم کا عمل نمازی کے خشوع و خضوع میں خلل ڈال سکتا ہے، اس لئے اس سے اجتناب بہتر ہے۔
اصل توجہ نماز کے باطن، خشوع، طہارت، ستر اور اللہ تعالیٰ کی طرف یکسوئی پر ہونی چاہئے۔
خلاصہ یہ ہے کہ مرد کی نماز ٹوپی کے ساتھ بھی درست ہے اور ٹوپی کے بغیر بھی۔
ٹوپی ایک جائز لباس اور معاشرتی روایت ہوسکتی ہے، لیکن اسے نماز کی صحت کی لازمی شرط قرار دینے کے لئے واضح شرعی دلیل موجود نہیں۔