ربیع الاول کا پیغام: سیرتِ رسولﷺ مکمل دستورِ حیات

حضرت محمدﷺ بھٹکی ہوئی انسانیت کو فلاح اور کامیابی کا راستہ دکھانے کے لیے ایسا دستورِ زندگی لے کر تشریف لائے جو ہر قوم، ہر ملک اور ہر زمانے کے لوگوں کے لیے نسخۂ کیمیا ہے۔
اس دستور میں کالے اور گورے، عربی اور عجمی، امیر اور غریب، بادشاہ اور فقیر کے درمیان کوئی امتیاز نہیں رکھا گیا۔
آپﷺ کی تعلیمات میں انسان کی عزت کا معیار اس کا رنگ، نسل، قوم، زبان، دولت یا خاندانی حیثیت نہیں، بلکہ اس کا تقویٰ، کردار اور عمل ہے۔ کرۂ ارض پر جہاں کہیں بھی انسان آباد ہیں، پیغامِ محمدیﷺ سب کے لیے یکساں طور پر ہدایت اور رحمت کا ذریعہ ہے۔
رسول اللہﷺ نے حجۃ الوداع کے تاریخی خطبے میں انسانی مساوات کا عظیم منشور پیش کرتے ہوئے ارشاد فرمایا:
’اے لوگو! خبردار ہوجاؤ، تمہارا رب ایک ہے اور تمہارا باپ آدم علیہ السلام بھی ایک ہے۔
کسی عربی کو عجمی پر اور کسی عجمی کو عربی پر کوئی فضیلت حاصل نہیں، نہ کسی سفید فام کو سیاہ فام پر اور نہ کسی سیاہ فام کو سفید فام پر، سوائے تقویٰ کے‘۔