آبنائے ہرمز میں امریکی اپاچی ہیلی کاپٹر گرائے جانے کے بعد ایران اور امریکہ کے درمیان کشیدگی خطرناک حد تک بڑھ گئی۔
امریکہ نے جنوبی ایران میں تقریباً 20 فوجی اہداف پر حملے کیے، جبکہ ایران نے جواباً اردن، کویت اور بحرین میں میزائل اور ڈرون حملے کیے۔
دونوں فریقوں کے سخت بیانات نے امن مذاکرات کے مستقبل پر نئے سوالات کھڑے کر دیے ہیں۔
ایران اور امریکہ کے درمیان فوجی محاذ آرائی نئے اور خطرناک مرحلے میں داخل ہو گئی ہے۔ ایرانی فورسز کی جانب سے آبنائے ہرمز کے قریب امریکی اپاچی ہیلی کاپٹر مار گرائے جانے کے بعد خطے میں کشیدگی مزید بڑھ گئی ہے، جس نے جاری سفارتی کوششوں اور جنگ کے خاتمے کی امیدوں پر بھی سوالات کھڑے کر دیے ہیں۔
امریکی فوج نے جنوبی ایران میں فضائی دفاعی نظام، زمینی کنٹرول اسٹیشنز اور ریڈار تنصیبات سمیت تقریباً 20 فوجی اہداف پر فضائی حملے کیے۔
امریکی حکام کے مطابق یہ کارروائی ایران کی حالیہ فوجی سرگرمیوں کے جواب میں کی گئی۔
مزید پڑھیں
ایرانی ذرائع ابلاغ کے مطابق امریکی حملوں میں جزیرہ قشم، ساحلی شہر سیریک اور آبنائے ہرمز کے داخلی راستے کے قریب واقع جاسک کے علاقے نشانہ بنے، جبکہ بندر عباس اور جاسک کے اطراف دھماکوں کی آوازیں بھی سنی گئیں۔
قشم، سیریک اور جاسک ایران کے لیے غیر معمولی اسٹریٹجک اہمیت رکھتے ہیں۔
قشم جزیرہ آبنائے ہرمز میں بحری نقل و حرکت کی نگرانی کا اہم مرکز سمجھا جاتا ہے، جبکہ سیریک اور جاسک بحیرہ عمان اور بحرِ ہند سے آنے والی تجارتی اور فوجی سرگرمیوں پر نظر رکھنے کے لیے اہم حیثیت رکھتے ہیں۔
جاسک ایران کے اُس متبادل تیل برآمدی منصوبے کا بھی مرکز ہے جس کے ذریعے تہران آبنائے ہرمز کو استعمال کیے بغیر عالمی منڈیوں تک تیل پہنچا سکتا ہے۔
ایران کا جوابی وار، خطے میں ہائی الرٹ
امریکی حملوں کے بعد ایران نے اردن، کویت اور بحرین میں میزائل اور ڈرون حملے کیے، جس کے بعد پورے خطے میں سکیورٹی الرٹ جاری کر دیا گیا۔
اردنی مسلح افواج نے اعلان کیا کہ انہوں نے الأزرق فضائی اڈے کی جانب آنے والے 5 ایرانی میزائل فضا ہی میں تباہ کر دیے، جبکہ کسی جانی یا مالی نقصان کی اطلاع نہیں ملی۔
کویت کی فوج نے بھی تصدیق کی کہ اس کے فضائی دفاعی نظام نے ’دشمن فضائی اہداف‘ کا کامیابی سے مقابلہ کیا، جبکہ بحرین میں فضائی حملے کے خدشے کے پیش نظر سائرن بجا دیے گئے اور شہریوں کو محفوظ مقامات پر منتقل ہونے کی ہدایت جاری کی گئی۔
امریکہ کا دعویٰ: تمام حملے ناکام بنادیئے
ایک امریکی عہدیدار کے مطابق ابتدائی جائزوں سے ظاہر ہوتا ہے کہ ایرانی میزائلوں اور ڈرونز کی اکثریت کو راستے میں ہی تباہ کر دیا گیا۔
ان کے بقول امریکی فوجی اڈوں یا اہلکاروں کو کسی قسم کے نقصان کی اطلاع نہیں ملی۔
واشنگٹن کا کہنا ہے کہ حالیہ فضائی کارروائی ایران کی جانب سے امریکی اپاچی ہیلی کاپٹر گرانے کے جواب میں کی گئی، جس کا مقصد ایران کی دفاعی اور نگرانی کی صلاحیتوں کو محدود کرنا تھا۔
تہران کا ردعمل: اپاچی واقعہ محض بہانہ تھا
ایرانی وزارت خارجہ نے امریکی حملوں کی شدید مذمت کرتے ہوئے کہا کہ واشنگٹن نے اپاچی ہیلی کاپٹر کے واقعے کو جنوبی ایران پر حملے کا بہانہ بنایا۔
وزارت خارجہ کے مطابق ایرانی مسلح افواج نے ان امریکی اڈوں کو نشانہ بنایا جو ایران کے خلاف کارروائیوں کا ذریعہ بن رہے تھے اور تہران اپنی خودمختاری اور قومی سلامتی کے دفاع کے لیے ہر ممکن اقدام کرے گا۔
دوسری جانب پاسدارانِ انقلاب نے خبردار کیا ہے کہ اگر امریکہ نے مزید کسی فوجی کارروائی کی کوشش کی تو ایران ’فیصلہ کن اور تباہ کن جواب‘ دے گا۔
مذاکرات کا مستقبل غیر یقینی
یہ تمام پیش رفت ایسے وقت میں سامنے آئی ہے جب امریکی صدر ڈونلڈ ٹرمپ بارہا دعویٰ کر چکے تھے کہ واشنگٹن اور تہران جنگ کے خاتمے کے لیے ایک معاہدے کے قریب پہنچ چکے ہیں، جبکہ پاکستان کی جانب سے بھی دونوں ممالک کے درمیان سفارتی رابطوں اور ثالثی کی کوششیں جاری تھیں۔
تاہم تازہ فوجی جھڑپوں نے امن مذاکرات کے مستقبل کو غیر یقینی بنا دیا ہے۔
آبنائے ہرمز میں ایرانی پابندیاں اور ایرانی بندرگاہوں پر امریکی دباؤ برقرار رہنے کے باعث خطے میں کشیدگی کے مزید بڑھنے کے خدشات پیدا ہو گئے ہیں، جس کے اثرات عالمی توانائی منڈیوں اور بین الاقوامی تجارت پر بھی مرتب ہو سکتے ہیں۔