امریکی صدر ڈونلڈ ٹرمپ نے دعویٰ کیا ہے کہ ایران کے ساتھ معاہدہ آخری مراحل میں داخل ہو چکا ہے اور آنے والے دنوں میں اہم پیش رفت سامنے آسکتی ہے۔
انہوں نے کہا کہ تہران کو اقتصادی دباؤ کا سامنا ہے اور وہ معاہدے کا خواہاں ہے، جبکہ پاکستان بھی مذاکرات کے کامیاب اختتام کے قریب ہونے کا اشارہ دے چکا ہے۔
امریکی صدر ڈونلڈ ٹرمپ نے ایک بار پھر ایران کے ساتھ جاری مذاکرات میں بڑی پیش رفت کا عندیہ دیتے ہوئے کہا ہے کہ تہران کے ساتھ ممکنہ معاہدہ آخری مراحل میں داخل ہو چکا ہے اور آئندہ چند روز میں صورتحال مزید واضح ہو سکتی ہے۔
نیویارک کے جان ایف کینیڈی ایئرپورٹ پر صحافیوں سے گفتگو کرتے ہوئے ٹرمپ نے کہا کہ انہیں آئندہ چند دنوں میں ایران کے ساتھ معاہدے کے حوالے سے واضح تصور حاصل ہو جائے گا۔
مزید پڑھیں
انہوں نے امید ظاہر کی کہ دونوں ممالک کے درمیان بہترین معاہدہ طے پا سکتا ہے۔
امریکی صدر کا کہنا تھا کہ ایران شدید اقتصادی مشکلات کا شکار ہے اور اسے معاہدے کی ضرورت ہے۔
ایران کو جوہری ہتھیار حاصل کرنے کی اجازت نہیں دی جائے گی اور اقتصادی پابندیاں فوجی کارروائی کے مقابلے میں زیادہ مؤثر راستہ ہیں۔
ٹرمپ نے سابقہ ایرانی جوہری معاہدے کو ناکام قرار دیتے ہوئے کہا کہ موجودہ مذاکرات مختلف نوعیت کے ہیں اور ان سے مثبت نتائج کی توقع کی جا رہی ہے۔
انہوں نے یہ دعویٰ بھی کیا کہ ایران جوہری پروگرام سے دستبردار ہونے کے لیے تیار دکھائی دیتا ہے۔
اس موقع پر ٹرمپ نے اسرائیلی وزیراعظم بنیامین نتن یاہو کے ساتھ ہونے والی گفتگو کا بھی ذکر کیا اور کہا کہ دونوں رہنماؤں کے درمیان بات چیت انتہائی مثبت رہی۔
ان کے مطابق ایران اور اسرائیل کے درمیان حالیہ فوجی کشیدگی ختم ہو چکی ہے اور فی الحال صورتحال قابو میں ہے۔
یہ بیانات ایسے وقت میں سامنے آئے ہیں جب ایران اور اسرائیل نے حالیہ میزائل اور فضائی حملوں کے بعد جنگ بندی کا اعلان کیا ہے۔
گزشتہ چند روز کے دوران دونوں ممالک کے درمیان ہونے والی شدید جھڑپوں نے خطے میں ایک بڑے تصادم کے خدشات کو جنم دیا تھا۔
دوسری جانب پاکستان بھی ایران اور امریکا کے درمیان جاری سفارتی کوششوں میں اہم کردار ادا کر رہا ہے۔
وزیراعظم محمد شہباز شریف پہلے ہی کہہ چکے ہیں کہ ایران اور امریکا کے درمیان امن مذاکرات کا حتمی ہدف پورا ہونے کے قریب پہنچ چکا ہے۔