قدیم زمانے میں حج کا سفر صرف مذہبی فریضہ نہیں بلکہ جان، مال اور صبر کا سخت امتحان بھی ہوتا تھا۔
حجاج کو ڈاکوؤں، شدید گرمی، پانی کی قلت، مہلک بیماریوں، لوٹ مار اور خطرناک سفری راستوں کا سامنا کرنا پڑتا تھا۔
تاریخ بتاتی ہے کہ کئی لوگ منزل تک پہنچنے سے پہلے ہی جان کی بازی ہار جاتے تھے، اسی لیے ماضی میں مشہور تھا کہ ’حج پر جانے والا گم، واپس آنے والا نئی زندگی پا کر لوٹے گا‘۔
’جانے والا گم، واپس آنے والا گویا نئی زندگی پا کر لوٹے گا‘ — یہ محض ایک قدیم کہاوت نہیں تھی، بلکہ صدیوں تک حج کے سفر کی تلخ حقیقت کی جیتی جاگتی تصویر تھی۔
بیت اللہ کے سفر کا راستہ کبھی موت کی راہداری سے کم نہ تھا۔
ڈاکوؤں کی تلواریں، جان لیوا گرم ہوائیں، مہلک بیماریاں، پیاس، بھوک، لوٹ مار اور طویل صحرائی سفر، ان تمام خطرات نے حج کو ایک عظیم عبادت کے ساتھ ساتھ زندگی اور موت کی آزمائش بھی بنا دیا تھا۔
حجاج اپنے اہل خانہ سے اس طرح رخصت ہوتے جیسے شاید دوبارہ واپسی نہ ہو۔
وہ اپنی وصیتیں لکھتے، اپنا مال چھوڑتے اور بے رحم صحراؤں، خطرناک راستوں اور سمندروں سے گزرتے ہوئے مکہ مکرمہ کا رخ کرتے، ایسے دور میں جب عبادت بعض اوقات جان کی قیمت پر ادا کی جاتی تھی۔
مزید پڑھیں
قدیم مسلمان سیاحوں اور مؤرخین کے سفرنامے بتاتے ہیں کہ ماضی میں حج کا سفر ناقابل تصور مشکلات سے بھرا ہوتا تھا۔
اگرچہ ڈاکو اور مہلک بیماریاں سب سے بڑے خطرات تھے، لیکن بعض حکمرانوں اور سرکاری اہلکاروں کے ظلم بھی حاجیوں کے لیے اضافی مصیبت بن جاتے تھے۔
چھٹی صدی ہجری میں اندلس سے حج کے سفر پر نکلنے والے مشہور
سیاح ابن جبیر اندلسی نے اپنی تحریروں میں مصر اور حجاز کے بعض حکام کی جانب سے حجاج پر عائد بھاری ٹیکسوں اور ناروا سلوک کا ذکر کیا۔
وہ لکھتے ہیں کہ بعض مقامات پر حجاج سے سختی سے ٹیکس وصول کیے جاتے اور جو ادائیگی نہ کر سکتا اسے اذیت دی جاتی تھی۔
اس زمانے میں بعض علاقوں میں ہر حاجی پر 7 اور آدھا مصری دینار تک ٹیکس عائد تھا اور جو غریب اس کی ادائیگی نہ کر سکتا، اسے سزا کا سامنا کرنا پڑتا۔
ڈاکو، جو ہر راستے پر موجود تھے
اگرچہ دنیا بھر سے آنے والے حجاج کے قافلے فوجی محافظوں کے ساتھ سفر کرتے تھے مگر راستے کے خطرات ختم نہیں ہوتے تھے۔
ان خطرات میں سب سے خوفناک ’قطاع الطرق‘ یعنی قزاق تھے۔
ڈاکوؤں، لوٹ مار
اور غیر محفوظ
راستوں نے
ہزاروں حاجیوں
کو نشانہ بنایا
اٹھارہویں صدی کے برطانوی سیاح جوزف پٹس، جو ایک الجزائری شخص کے ساتھ حج پر آئے تھے، اپنی یادداشتوں میں لکھتے ہیں کہ نیل کے راستے سفر کے دوران انہیں ڈاکوؤں کے حملے کا خوف لاحق رہا۔
وہ لکھتے ہیں کہ نیل میں ڈاکو عام تھے، خاص طور پر اس موسم میں جب حجاج کشتیوں کے ذریعے سفر کرتے۔
ڈاکو جانتے تھے کہ حاجیوں کے پاس رقم ہوتی ہے، اس لیے وہ انہیں لوٹنے کی کوشش کرتے۔
مورخین کے مطابق ڈاکو صرف عام حجاج ہی نہیں بلکہ بڑے قافلوں اور معزز افراد کو بھی نشانہ بناتے تھے۔
مشہور مؤرخ ابن جوزی نے اپنی کتاب المنتظم میں کئی ایسے برسوں کا ذکر کیا جن میں وسطی ایشیا، خراسان اور عراق سے آنے والے حجاج صرف اس لیے حج نہ کر سکے کیونکہ راستے غیر محفوظ تھے۔
مدینہ سے مکہ تک بھی خطرات
یہ خطرات صرف دور دراز علاقوں سے آنے والوں تک محدود نہیں تھے۔
حتیٰ کہ مدینہ منورہ سے مکہ جانے والے قافلے بھی محفوظ نہ تھے۔
سن 982 ہجری میں مدینہ سے نکلنے والے حاجیوں کے ایک قافلے پر حملہ ہوا، جس میں قتل، لوٹ مار اور تشدد کے واقعات پیش آئے۔
اٹھارہویں صدی کے سیاح ابو البرکات السویدی نے العلا کے علاقے کے بارے میں لکھا کہ بعض ڈاکو نخلستانوں میں چھپ جاتے اور تنہا سفر کرنے والے حاجیوں کو قتل کر کے ان کا مال لوٹ لیتے۔
بیسویں صدی تک خطرات برقرار رہے
انیسویں صدی کے آخر تک بھی حجاج ڈاکوؤں کے خوف میں مبتلا رہتے تھے۔
1899ء میں روسی فوجی اور سیاح عبدالعزیز دولتشین حج پر آئے تو انہوں نے اپنے سفرنامے میں لکھا کہ ہم لوگوں کے درمیان مسلسل یہ خبریں سنتے تھے کہ آج فلاں حاجی لوٹ لیا گیا، فلاں کو قتل کر دیا گیا۔
اسی طرح شام کے معروف عالم محمد بہجت بیطار 1910ء میں حج کے سفر کے دوران ڈاکوؤں کے ہاتھوں اپنا مال اور سامان کھو بیٹھے۔
پانی کی ایک بوند بھی قیمتی تھی
قدیم دور میں حاجیوں کے لیے پانی سب سے بڑی آزمائشوں میں سے ایک تھا۔
ساتویں صدی ہجری کے سیاح ابن رشید الفہری نے لکھا کہ تبوک سے العلا تک کا سفر انتہائی دشوار تھا، جہاں پانی کی شدید قلت کے باعث بڑی تعداد میں لوگ جان سے ہاتھ دھو بیٹھتے تھے۔
مشہور مؤرخ الذہبی نے ذکر کیا کہ 781ء میں حج کے دوران پانی کی قلت اس حد تک بڑھ گئی تھی کہ حاجیوں کو اپنی موت سامنے نظر آنے لگی۔
روسی سیاح عبدالعزیز دولتشین بھی لکھتے ہیں کہ میں 5 گھنٹے سے سفر کر رہا تھا، میرا حلق مکمل خشک ہو چکا تھا، پیاس ناقابل برداشت ہو چکی تھی۔
ہیضے اور دیگر
وبائی امراض نے
مختلف ادوار میں
ہزاروں حجاج کی
جانیں لے لیں
گرمی، جو جان لے لیتی تھی
جزیرہ عرب کی شدید گرمی بھی حاجیوں کے لیے ایک مہلک آزمائش تھی۔
گیارہویں صدی ہجری کے سیاح العیاشی لکھتے ہیں کہ شام سے آنے والے قافلے شدید گرمی کے باعث راستے میں بڑی تعداد میں اموات کا شکار ہوئے۔
1853ء میں برطانوی سیاح رچرڈ برٹن نے بھی اپنی حج کی یادداشتوں میں شدید گرمی اور اس کے اثرات کا ذکر کیا۔
وہ لکھتے ہیں کہ بعض اوقات شدید گرمی لوگوں کے مزاج بدل دیتی، معمولی جھگڑے خونریز تصادم میں بدل جاتے۔
مکہ میں بھی خطرات ختم نہیں ہوتے تھے
خطرات صرف راستوں تک محدود نہ تھے، بلکہ مکہ مکرمہ بھی بعض ادوار میں سیاسی اور عسکری کشمکش کا مرکز بن جاتا۔
اسلامی تاریخ کی سب سے ہولناک حج سانحات میں سے ایک 317 ہجری میں پیش آیا، جب قرامطہ نے مکہ مکرمہ پر حملہ کیا۔
اس حملے میں تقریباً 30 ہزار افراد جاں بحق ہوئے، حجر اسود کو نکال کر لے جایا گیا، اور حرم مکہ شدید خونریزی کا منظر بن گیا۔
اسی طرح مختلف ادوار میں حکمرانوں، فوجی قافلوں اور مقامی طاقتوں کے درمیان تنازعات بھی حجاج کے لیے مصیبت کا باعث بنتے رہے۔
وبائیں بھی ہزاروں جانیں لے گئیں
قدیم زمانوں میں طبی سہولیات، قرنطینہ اور حفاظتی انتظامات نہ ہونے کے باعث وبائی امراض بھی حجاج کے لیے بہت بڑا خطرہ تھے۔
1892ء میں ہیضے کی وبا حج کے موسم کے دوران پھیلی تو صورتحال انتہائی خوفناک ہو گئی۔
رپورٹس کے مطابق عرفات اور منیٰ میں بڑی تعداد میں اموات ہوئیں، جبکہ بعض مقامات پر مرنے والوں کو فوری دفنانا بھی ممکن نہ رہا۔
آج کا حج اور ماضی کا فرق
آج کے دور میں جدید ٹرانسپورٹ، طبی سہولیات، سکیورٹی، مواصلاتی نظام اور منظم انتظامات نے حج کو ماضی کے مقابلے میں کہیں زیادہ محفوظ بنا دیا ہے۔
مگر تاریخ کے صفحات گواہی دیتے ہیں کہ صدیوں تک حج کا سفر انتہائی کٹھن، خطرناک اور جان لیوا رہا۔
شاید اسی لیے پرانے زمانے کے لوگ کہا کرتے تھے:
’جانے والا گم، اور واپس آنے والا گویا نئی زندگی پا کر لوٹتا ہے۔