عالمی کریڈٹ ریٹنگ ایجنسی موڈیز نے سعودی عرب کی کریڈٹ ریٹنگ Aa3 سطح پر برقرار رکھتے ہوئے مستقبل کا منظرنامہ مستحکم قرار دیا ہے۔
ایجنسی نے سعودی معیشت کی مضبوطی، وژن 2030 کے اثرات، نان آئل شعبوں کی ترقی، حکومتی اصلاحات اور علاقائی کشیدگی سے نمٹنے کی معاشی صلاحیت کو اہم عوامل قرار دیا۔
کریڈٹ ریٹنگ ایجنسی موڈیز نے سعودی عرب کی خودمختار کریڈٹ ریٹنگ Aa3 درجے پر برقرار رکھتے ہوئے مملکت کے معاشی مستقبل کے حوالے سے اپنا اعتماد ایک بار پھر ظاہر کیا ہے، جبکہ مستقبل کا منظرنامہ بھی ’مستحکم‘ قرار دیا گیا ہے، جو عالمی مالیاتی اداروں کی نظر میں سعودی معیشت کی مضبوط بنیادوں کی عکاسی کرتا ہے۔
موڈیز نے اپنی رپورٹ میں واضح کیا کہ سعودی عرب کی مضبوط معاشی پوزیشن کئی بنیادی عوامل پر قائم ہے، جن میں مملکت کی وسیع تیل کی دولت، عالمی توانائی منڈیوں میں اس کی اہم اور مسابقتی حیثیت اور حالیہ برسوں کے دوران حکومتی اداروں اور پالیسیوں کی کارکردگی میں نمایاں بہتری شامل ہے۔
مزید پڑھیں
رپورٹ کے مطابق سعودی وژن 2030 کے تحت نافذ کئے گئے ترقیاتی منصوبوں، اقتصادی اصلاحات اور حکومتی سرمایہ کاری نے نان آئل شعبوں کی ترقی میں اہم کردار ادا کیا ہے۔
موڈیز نے نشاندہی کی کہ مملکت نے اپنی معیشت کو تیل پر انحصار سے نکال کر متنوع بنانے کے لیے بڑے پیمانے پر اقدامات کئے، جن کے نتیجے میں سیاحت، ٹیکنالوجی، خدمات، صنعت اور نجی شعبے کی
سرگرمیوں میں نمایاں وسعت دیکھنے میں آئی۔
ایجنسی نے مالیاتی اور اقتصادی شفافیت میں بہتری کو بھی سعودی عرب کی معاشی کامیابی کا اہم عنصر قرار دیا۔
اس کے مطابق شفاف مالیاتی پالیسیوں، حکومتی اصلاحات اور مؤثر اقتصادی منصوبہ بندی نے سرمایہ کاروں کے اعتماد میں اضافہ کیا اور بین الاقوامی سطح پر مملکت کی معاشی ساکھ کو مزید مضبوط بنایا۔
موڈیز نے اس بات پر بھی زور دیا کہ سعودی عرب علاقائی جغرافیائی و سیاسی کشیدگی اور عالمی چیلنجز کا مقابلہ کرنے کی مضبوط صلاحیت رکھتا ہے۔
رپورٹ میں کہا گیا کہ مملکت کی لچکدار معیشت اور توانائی کے شعبے میں متبادل برآمدی راستوں کی دستیابی، خصوصاً مشرق سے مغرب تک پھیلی آئل پائپ لائن، کسی بھی ممکنہ بحران کے دوران توانائی سپلائی کے تسلسل کو یقینی بنانے میں اہم کردار ادا کر سکتی ہے۔
وژن 2030 نے
نان آئل شعبوں کی
ترقی اور
سرمایہ کاری کو
فروغ دیا
رپورٹ میں مزید کہا گیا کہ سعودی عرب کی وسیع معاشی اور سماجی اصلاحات آنے والے برسوں میں اقتصادی تنوع کے عمل کو مزید تیز کریں گی۔
ان اصلاحات نے خدمات کے شعبے، غیر تیل معیشت اور نجی سرمایہ کاری کو نئی رفتار دی ہے، جبکہ مقامی اور غیر ملکی سرمایہ کاروں کے لیے مواقع میں بھی اضافہ ہوا ہے۔
موڈیز نے یہ پیش گوئی بھی کی کہ علاقائی کشیدگی میں کمی آنے کے بعد سعودی عرب کے غیر تیل نجی شعبے کی شرح نمو دوبارہ 4 سے 5 فیصد تک پہنچ سکتی ہے، جو خلیجی ممالک کے مقابلے میں بلند ترین شرحوں میں شامل ہوگی۔
ایجنسی کے مطابق حکومتی سرمایہ کاری، نجی شعبے کے بڑھتے کردار اور اقتصادی اصلاحات کی رفتار اس ترقی کو مزید مستحکم بنائے گی۔
ماہرین کے مطابق موڈیز کی جانب سے کریڈٹ ریٹنگ برقرار رکھنا عالمی سرمایہ کاروں کے اعتماد کے لیے مثبت اشارہ ہے، جو مملکت کے مالیاتی استحکام، ترقیاتی منصوبوں اور وژن 2030 کے اہداف کے حصول کی جانب پیش رفت کو ظاہر کرتا ہے۔