ہر سال حج کا موسم فلسطینیوں بالخصوص ’عرب 48‘ کہلانے والے شہریوں کے لیے ایک نیا روحانی اور جذباتی سفر لے کر آتا ہے۔
مزید پڑھیں
جب یہ قافلے اُردن کی سرزمین سے گزرتے ہیں تو یہ محض ایک مذہبی سفر نہیں رہتا بلکہ قومی شناخت اور عرب یکجہتی کی ایک منفرد تصویر پیش کرتا ہے۔
سعودی وزارتِ حج و عمرہ اور اُردنی حکومت کے اشتراک سے ہر سال تقریباً 4500 فلسطینی عازمینِ حج اُردن کے راستے سفر کرتے ہیں۔
اُردنی وزیر برائے اوقاف محمد الخلاہیلا کے مطابق ان عازمین کو اُردنی
شہریوں کے برابر سہولیات دی جاتی ہیں، جن میں رہائش، نقل و حمل اور طبی نگہداشت شامل ہیں۔
تاریخی تناظر اور سفری سہولیات
یہ سفری سہولیات 1978 سے جاری ہیں، جب شاہ حسین بن طلال کے دور میں سعودی عرب کے ساتھ خصوصی معاہدہ طے پایا تھا۔
اس معاہدے کے تحت فلسطینی عازمین حج کو عارضی اُردنی پاسپورٹ جاری کیے جاتے ہیں، جس سے انہیں مقدس مقامات تک رسائی کا قانونی حق حاصل ہوتا ہے اور یہ سلسلہ آج بھی کامیابی سے جاری ہے۔
معان گورنریٹ میں استقبال
جنوبی اُردن کے معان گورنریٹ میں فلسطینی عازمینِ حج کا استقبال کسی تہوار جیسا ہوتا ہے۔
یہاں مقامی افراد اپنی روایات کے مطابق مہمانوں کے لیے کھانے، قہوہ اور کھجوروں کا خصوصی انتظام کرتے ہیں۔ معان کے گورنر خالد الحجاج کے مطابق یہ خدمت ان کے لیے ایک قومی اور مذہبی فریضہ ہے۔
انتظامی امور اور مربوط نیٹ ورک
مسلم عرب 48 حج کمیٹی کے سربراہ زیاد شربجی کے مطابق حجاج کی سہولت کے لیے مکہ مکرمہ اور مدینہ منورہ میں بھی خصوصی ٹیمیں موجود ہیں۔
اُردنی حکام اور سیکیورٹی اداروں کے ساتھ قریبی رابطے کے باعث اب تک سفر کے دوران فلسطینی عازمینِ حج کسی قسم کی رکاوٹ یا مشکل پیش نہیں آئی ہے۔
حجاج کی روانگی اور موجودہ صورتحال
بعثہ حج کے سربراہ عبد الرزاق ابو راس نے تصدیق کی کہ اب تک کا سفر انتہائی ہموار رہا ہے۔
عازمینِ حج نے اُردنی سیکیورٹی اداروں اور سعودی حکام کی جانب سے فراہم کردہ بہترین سہولیات پر اطمینان کا اظہار کیا ہے، جو اِن کے سفر کو آسان اور پرسکون بنانے میں اہم کردار ادا کر رہے ہیں۔
چیلنجز اور مستقبل کا عزم
وزیر اوقاف محمد الخلاہیلا نے نشاندہی کی کہ اگرچہ عرب 48 کے حجاج کو سہولت حاصل ہے، تاہم غربِ اردن کے بعض فلسطینیوں کو واپسی پر بارڈر پر طویل انتظار کا سامنا کرنا پڑتا ہے۔
ان تمام تر پیچیدگیوں کے باوجود یہ سفر فلسطینیوں کے لیے اپنے حقوق اور عرب دنیا سے جڑے رہنے کا ایک مضبوط ذریعہ ہے۔
فلسطینیوں کا یہ سفر محض مذہبی فریضے کی ادائیگی نہیں، بلکہ ان کی استقامت کی علامت ہے۔
اُردن کی جانب سے مسلسل تعاون اور سعودی عرب کی میزبانی یہ ثابت کرتی ہے کہ جغرافیائی حد بندیاں اور سیاسی رکاوٹیں اس جذباتی تعلق اور روحانی عزم کو کبھی ختم نہیں کر سکتیں۔