تیل اور قدرتی گیس کی قیمتوں میں شدید اضافہ دیکھنے میں آیا ہے، جب امریکہ نے تہران اور واشنگٹن کے درمیان اسلام آباد مذاکرات کی ناکامی کے بعد آبنائے ہرمز پر بحری محاصرہ نافذ کرنے کی جانب قدم بڑھایا۔
ماہرین نے خبردار کیا ہے کہ خام تیل کی قیمت 150 ڈالر فی بیرل سے بھی تجاوز کر سکتی ہے، جیسا کہ بلومبرگ نے رپورٹ کیا ہے۔
مزید پڑھیں
برینٹ کروڈ کی قیمت میں 9.1 فیصد اضافہ ہوا اور یہ 104 ڈالر فی بیرل کے قریب پہنچ گئی جبکہ یورپی گیس فیوچرز میں 18 فیصد تک اضافہ ریکارڈ کیا گیا۔
امریکی سینٹرل کمانڈ کے مطابق محاصرہ آج پیر کو نافذ کیا جا رہا ہے اور یہ اقدام صرف ان جہازوں پر لاگو ہوگا جو ایرانی بندرگاہوں میں داخل یا وہاں سے باہر جا رہے ہیں۔
عالمی توانائی بحران
جنگ کے باعث عالمی توانائی منڈیوں میں شدید ہلچل پیدا ہو گئی ہے۔
ریفائنری کمپنیاں اور تاجر فوری خام تیل کی فراہمی کے لیے دوڑ میں لگے ہوئے ہیں جبکہ سپلائی میں کمی سے مہنگائی اور معاشی سست روی کا خطرہ بڑھ گیا ہے۔
امریکی صدر ڈونلڈ ٹرمپ نے کہا ہے کہ یہ اقدام <انتہائی مؤثرQ ہوگا اور مزید محدود فوجی کارروائیوں پر بھی غور کیا جا رہا ہے۔
سابق امریکی سفیر مائیکل رٹنی نے خبردار کیا کہ یہ فیصلہ عالمی سطح پر بڑے خطرات پیدا کر سکتا ہے، خصوصاً اگر چین کو جانے والے تیل کے جہاز بھی متاثر ہوئے۔
150 ڈالر فی بیرل کا خدشہ
توانائی کمپنی ’اونکس کیپیٹل‘ کے ڈائریکٹر جارج مونٹی بیک نے کہا کہ موجودہ قیمتیں اصل صورتحال کی عکاسی نہیں کرتیں اور اگر محاصرہ مکمل طور پر نافذ ہوا تو تیل 140 سے 150 ڈالر فی بیرل تک جا سکتا ہے۔
ان کے مطابق اس اقدام سے علاقائی تنازع عالمی بحران میں تبدیل ہو سکتا ہے اور یومیہ 12 ملین بیرل تک سپلائی متاثر ہو سکتی ہے۔
آبنائے ہرمز اور باب المندب میں خطرہ
آبنائے ہرمز خلیج کو عالمی منڈیوں سے جوڑنے والا اہم راستہ ہے اور جنگ کے آغاز سے ہی یہاں صورتحال کشیدہ ہے۔
ماہرین نے خبردار کیا ہے کہ بحران بڑھنے کی صورت میں باب المندب بھی متاثر ہو سکتا ہے۔
عالمی منڈیوں پر اثرات
بحیرہ احمر کے راستوں کی اہمیت بڑھ گئی ہے جبکہ سعودی عرب نے ’ایسٹ، ویسٹ‘ پائپ لائن کے ذریعے تیل کی ترسیل میں اضافہ کیا ہے۔
ماہرین کے مطابق محاصرہ شپنگ میں تاخیر، انشورنس اخراجات میں اضافہ اور سپلائی کی کمی کا باعث بنے گا، جس سے عالمی سطح پر قیمتیں مزید بڑھ سکتی ہیں۔
اوپیک آج اپنی ماہانہ رپورٹ جاری کرے گی، جس میں عالمی توانائی منڈی کی صورتحال پر مزید روشنی ڈالی جائے گی۔