کویت کی وزارت دفاع نے کہا ہے کہ کویتی افواج نے گزشتہ 24 گھنٹوں کے دوران 3 بیلسٹک میزائل تباہ کر دیے جو ملک کے جنوبی حصے کی جانب داغے گئے تھے جبکہ دشمن کے ڈرون طیاروں کی ایک لہر بھی کویتی فضائی حدود میں داخل ہوئی۔
وزارت دفاع کے ترجمان کرنل سعود العطوان نے آج اتوار کو پریس بریفنگ میں بتایا کہ کویت کے فضائی دفاعی نظام نے جنوبی کویت میں تینوں بیلسٹک میزائلوں کو کامیابی سے روک کر تباہ کر دیا ہے۔
ایران، امریکہ جنگ: تازہ ترین خبروں کے لیے کلک کریں
انہوں نے مزید کہا کہ فضائی دفاعی نظام اور فضائیہ کے جنگی طیاروں نے دشمن کے ڈرونز کی ایک لہر کا بھی سراغ لگایا جو کویت کی فضائی حدود میں داخل ہوئی تھی، جن میں سے کئی ڈرونز کو تباہ کر دیا گیا جبکہ ان کے ملبے کے ٹکڑے مختلف مقامات پر گرے۔
ترجمان کے مطابق دو ڈرونز نے کویت ایئرپورٹ کے ایندھن ذخیرہ ٹینکوں کو نشانہ بنایا جبکہ ایک ڈرون نے سوشل سیکیورٹی کی عمارت کو نشانہ بنایا۔