صبح آنکھ کھلتے ہی کافی کا کپ، جلدی میں میٹھی پیسٹری، پھر کام کی دوڑ دھوپ۔ بظاہر یہ ایک عام معمول ہے، لیکن روزانہ دہرائی جانے والی یہی چھوٹی چھوٹی عادات وقت کے ساتھ دل کی صحت کو متاثر کرسکتی ہیں۔
مزید پڑھیں
ماہرین امراض قلب کا کہنا ہے کہ دن کا آغاز کس غذا اور مشروب سے ہوتا ہے، اس کا اثر مجموعی صحت پر پڑ سکتا ہے۔
دل کے ماہر ڈاکٹر سنجے بھوجراج، جنہیں 20 سال سے زیادہ تجربہ حاصل ہے، نے صبح کی پانچ ایسی عادات کی نشاندہی کی ہے جن سے وہ خود گریز کرتے ہیں۔ انہوں نے بتایا کہ متوازن ناشتہ، مناسب پانی اور پرسکون آغاز دل کی صحت کے لیے بہتر انتخاب ہیں۔
میٹھی کافی کا چھپا ہوا نقصان
ذائقے دار Latte اور دوسری میٹھی کافی میں چینی کی مقدار بعض اوقات کئی درجن گرام تک پہنچ جاتی ہے۔
اضافی چینی روزانہ کی کیلوریز بڑھانے کے ساتھ مٹاپے اور میٹابولزم سے متعلق مسائل کا سبب بن سکتی ہے، جو دل کی بیماریوں کے خطرات بڑھاتے ہیں۔
ماہرین کے مطابق بہتر ہے کہ بغیر چینی یا کم چینی والی کافی استعمال کی جائے۔
صرف پیسٹری کھانا کافی نہیں
کروساں، مفنز اور میٹھی بیکری مصنوعات فوری بھوک تو مٹاتی ہیں، لیکن ان میں اکثر چکنائی اور سفید آٹے کی مقدار زیادہ جبکہ فائبر اور پروٹین کم ہوتے ہیں۔
نتیجتاً کچھ دیر بعد دوبارہ بھوک لگ سکتی ہے۔ ناشتے میں انڈہ، دہی، پھل یا دلیہ شامل کرنا زیادہ بہتر ہے۔
ناشتے میں پراسیس شدہ گوشت
ساسیجز، بیکن اور دیگر پراسیس شدہ گوشت میں نمک اور سیر شدہ چکنائی زیادہ ہوسکتی ہے۔
ان کا مسلسل اور زیادہ استعمال دل کی بیماریوں سمیت بعض دائمی امراض کے خطرات بڑھانے سے منسلک ہے۔ ان کی جگہ انڈے، دالیں اور کم پراسیس شدہ پروٹین والی غذائیں بہتر انتخاب ہیں۔
انرجی ڈرنکس سے ہوشیار
دن بھر چاق و چوبند رہنے کے لیے انرجی ڈرنکس پینا بھی اچھا معمول نہیں۔ ان میں کیفین، چینی اور دیگر محرک اجزا کی زیادہ مقدار ہوسکتی ہے۔
بعض افراد میں یہ دل کی دھڑکن تیز اور بلڈ پریشر بلند کرسکتی ہیں۔ دل کی دھڑکن میں بے ترتیبی کے مریضوں کو خصوصی احتیاط کرنی چاہیے۔
صرف کافی، پانی اور ناشتہ غائب!
صبح صرف کافی پی کر کام شروع کردینا اور کئی گھنٹے کچھ نہ کھانا بھی اچھا معمول نہیں، خصوصاً جب جسم کو پانی بھی مناسب مقدار میں نہ ملے۔
ڈاکٹر کے مطابق بیدار ہونے کے بعد پانی پینا اور اپنی ضروریات کے مطابق متوازن ناشتہ کرنا بہتر ہے، تاہم ناشتہ چھوڑنا ہر شخص کے لیے لازماً نقصان دہ نہیں، اس کا انحصار مجموعی خوراک اور صحت پر ہے۔
دل کے لیے بہتر صبح کیسی ہو؟
ماہر امراض قلب انڈے اور پھل، جو (Oats) کے ساتھ یونانی دہی، چیا سیڈز، اخروٹ اور بیریز جیسی غذاؤں کو اچھے انتخاب قرار دیتے ہیں۔
اس کے ساتھ صبح چند منٹ چہل قدمی، ہلکی ورزش یا پرسکون انداز میں سانس لینے کے لیے نکالنا بھی مفید ہوسکتا ہے۔
امریکن ہارٹ ایسوسی ایشن کی 2026 کی غذائی رہنمائی بھی پھلوں، سبزیوں، اناج، صحت مند پروٹین اور کم پراسیس شدہ غذاؤں کو ترجیح دینے جبکہ اضافی چینی، نمک اور غیر صحت مند چکنائی کم کرنے پر زور دیتی ہے۔
یاد رہے کہ دل کی حفاظت صرف ناشتے تک محدود نہیں۔ مناسب نیند، جسمانی سرگرمی، بلڈ پریشر اور کولیسٹرول پر قابو اور تمباکو نوشی سے اجتناب بھی ضروری ہیں۔
دل کے مریض یا مستقل ادویات استعمال کرنے والے افراد اپنی غذا میں بڑی تبدیلی سے پہلے معالج سے مشورہ ضرور کریں۔