عبد الستار خان
اوورسیز پوسٹ
ایثار کا اصل امتحان اس وقت ہوتا ہے جب انسان اپنی پسندیدہ چیز دوسروں کے لیے قربان کرتا ہے۔
مضمون کی دوسری اور آخری قسط میں صحابہ کرامؓ اور بزرگانِ دین کے واقعات کے ذریعے ایثار کی عملی صورتیں، نفس کی تربیت اور اس عظیم اخلاقی وصف کے روحانی و معاشرتی فوائد بیان کئے گئے ہیں۔
2/2
تاریخِ اسلامی ایثار کے نمونوں سے بھری ہوئی ہے، چند ایک مثالیں پیشِ خدمت ہیں:سردیوں کا زمانہ تھا، ایک انصاری خاتون نے دربارِ رسالت مآبﷺ میں عرض کیا کہ اے اللہ کے رسولﷺ، میں آپﷺ کے لئے بردہ سی دیتی ہوں جو اس سردی میں آپﷺ کے کام آئے گا۔
آپﷺ نے اجازت دی، خاتون نے وہ بردہ سیا اور آپﷺ کی خدمت میں پیش کیا۔
آپﷺ نے پہلی مرتبہ وہ بردہ زیبِ تن کیا اور صحابہ کرامؓ کی مجلس میں تشریف لے گئے۔
ایک انصاری نے دیکھا اور کہا:
یہ کتنا اچھا بردہ ہے، اے اللہ کے رسولﷺ، آپ یہ مجھے عطا کر دیں۔
آپﷺ نے فوری طور پر وہ بردہ اتارا اور انصاری کو دے دیا۔
صحابہ کرامؓ گویا زبانِ حال سے کہہ رہے تھے کہ اے انصاری، یہ تو نے کیا کر دیا۔
انصاری ان کی نظروں کو سمجھ گئے اور کہا:
میں چاہتا ہوں کہ جب میں مر جاؤں تو اس میں مجھے کفن دیا جائے۔
مزید پڑھیں
٭ جب حضرت عمر بن خطابؓ کی وفات کا وقت قریب آیا تو اپنے بیٹے عبداللہ کو ام المؤمنین حضرت عائشہؓ کے پاس کہلوا بھیجا کہ:
عمرؓ نے آپ کو سلام بھیجا ہے، وہ آپ سے اجازت چاہتا ہے
کہ انہیں اپنے دونوں ساتھیوں کے ساتھ دفن کیا جائے۔
حضرت عائشہؓ کا ایثار دیکھئے، فرمایا:
اس جگہ کو تو میں نے اپنے لئے رکھ چھوڑا تھا مگر آج میں عمر کو اپنے اوپر ترجیح دیتی ہوں۔
٭ حضرت ابو الحسن انطاکیؒ کے متعلق روایت ہے کہ ان کے گھر میں 30 سے زیادہ افراد آئے، ان کے پاس اتنا کھانا نہیں تھا جو سب کے لئے کافی ہوتا۔
انہوں نے سارا کھانا دسترخوان پر لگا دیا اور چراغ گل کر دیا۔
سب لوگ دسترخوان پر بیٹھے، جب فارغ ہو کر اٹھے اور چراغ جلایا گیا تو دیکھا، کھانا جیسا تھا، ویسا ہی پڑا ہوا ہے، ہر فرد نے اپنے بھائی کو اپنی ذات پر ترجیح دیتے ہوئے کھانے سے ہاتھ روکے ہوئے تھا۔
مزید پڑھیں
ایثار کا مطلب ہی یہ ہے کہ اپنے بھائی کو اپنی ذات پر ترجیح دی جائے حالانکہ وہ خود محتاج ہو۔
رسول اکرمﷺ نے اس کے لئے پیمانہ وضع کیا ہے:
تم میں کوئی شخص مومن نہیں ہو سکتا جب تک اپنے بھائی کے لئے وہ کچھ پسند نہ کرے جو اپنے لئے کرتا ہے۔
حضرت علیؓ کا قول ہے:
ایثار ایمان کی چوٹی ہے۔
ایثار کا میدان بہت وسیع ہے، یہ محض انفاق اور عطا تک محدود نہیں بلکہ ہر جگہ اور ہر شعبے میں اس کی ضرورت ہے۔
اچھے بھلے آدمی مال کی قربانی کا وقت آتا ہے تو مال قربان کرنے سے دریغ نہیں کرتے، وہ وقت قربان کرتے ہیں، صلاحیتیں قربان کرتے ہیں اور اللہ نے انہیں جو کچھ عطا کیا ہے، وہ سب کچھ قربان کرتے ہیں مگر قربان نہیں کرتے تو رائے کی قربانی نہیں کرتے۔
میری رائے میرے نزدیک سب سے عزیز اور محبوب ہے اور اللہ تعالیٰ ہم سے مطالبہ کرتا ہے کہ اس کی راہ میں پسندیدہ ترین چیز خرچ کی جائے اور اس مجلس میں میری پسندیدہ ترین چیز میری رائے ہے۔
حضرت عبداللہ بن عمرؓ کو مچھلی کھانے کی خواہش ہوئی، بڑی مشکل سے آپ کے لئے گھر میں مچھلی پکائی گئی، جب مچھلی دسترخوان پر رکھی گئی، عین اسی وقت سائل نے دروازہ کھٹکھٹایا۔
آپ نے فرمایا اسے مچھلی دے دو، گھر والوں نے کہا، ہم نے بڑی مشکل سے آپ کے لئے مچھلی پکائی ہے، گھر میں گوشت کا سالن ہے، ہم وہ سائل کو دے دیتے ہیں، آپ مچھلی کھائیں، مگر آپ کا جواب تھا:
وَلٰكِنِّي أُحِبُّ السَّمَكَ
مگر مچھلی مجھے پسند ہے۔
جو چیز جس موقع پر سب سے زیادہ عزیز ہو اسی کی قربانی دینے سے وہ مقام حاصل کیا جا سکتا ہے جسے قرآن مجید نے ’بِر‘ کہا ہے۔
ایثار اس وقت تک نہیں ہو سکتا جب تک آدمی اپنے ساتھیوں کے حقوق کی تعظیم نہیں کرتا اور ان کو ادا کرنے کی سعی نہیں کرتا۔
علاوہ ازیں اچھے اخلاق جہاں وہبی ہوتے ہیں وہاں کسبی بھی ہو سکتے ہیں۔
علماء کرام کہتے ہیں یہ ایثار جس کی طرف میں نے اشارہ کیا ہے، اسے انجام دینا انسان کے نفس پر بڑا شاق گزرتا ہے، انسان کو اپنے نفس کو اس کا عادی بنانے کے لئے اس پر جبر کرنا پڑتا ہے۔
آخر میں ایثار کے فوائد آپ کے سامنے رکھتا ہوں:
ایثار ایمان کی علامت ہے، اللہ کی محبت کے حصول کا ذریعہ ہے، لوگوں کے درمیان الفت و محبت قائم کرنے کا سبب ہے، نفس کے جود و سخا کی علامت ہے، اس سے برکت ہوتی ہے، اس سے رحمت کا حصول ہوتا ہے، اس میں فلاح و نجات ہے۔