عربی کہاوت ہے ’اگر بات چاندی ہے تو خاموشی سونا ہے‘ مگر حقیقت میں اس جملے کی قدر سونے سے بھی زیادہ ہو سکتی ہے۔
ماہرین کے مطابق خاموشی محض آواز کی غیر موجودگی نہیں بلکہ ایک ایسی کیفیت ہے جو جسم کو توازن بحال کرنے اور ذہنی دباؤ کم کرنے میں مدد دیتی ہے، اور یہ چیز آج کے شور زدہ دور میں انتہائی ضروری ہو چکی ہے۔
مزید پڑھیں
نئی تحقیقات کے مطابق روزانہ صرف 2 گھنٹے مسلسل خاموشی میں بیٹھنا دماغ کے اُن حصوں میں نئی خلیات کی نشوونما کو بڑھا سکتا ہے جو یادداشت اور سیکھنے سے متعلق ہیں۔
خاموشی ذہنی بیداری کو فروغ دیتی ہے، بے چینی کو کم کرتی ہے، تیز رفتار خیالات کو پرسکون بناتی ہے اور اعصابی نظام کو آرام پہنچاتی ہے، انسان لمحے میں زیادہ سکون کے ساتھ جینے کے قابل ہوتا ہے۔
خاموشی انسان کو اپنے آپ کو سمجھنے اور جذبات کا بغیر کسی فیصلہ کے مشاہدہ کرنے کا موقع دیتی ہے۔
اس کے ذریعے وہ جان سکتا ہے کہ وہ پرسکون ہے یا دباؤ میں، اور اپنی ضروریات کے بارے میں زیادہ باخبر ہو جاتا ہے۔
کچھ مطالعات یہ بھی ظاہر کرتے ہیں کہ خاموشی دماغی سرگرمی کو بہتر بنانے اور یادداشت و سیکھنے سے متعلق خلیات کی نشوونما میں مدد دیتی ہے، اسی لیے یہ ذہنی صحت اور توجہ کے لیے مفید ہے۔
اس کے علاوہ خاموشی تناؤ کو کم کرتی ہے کیونکہ یہ دباؤ کے ہارمونز جیسے کورٹیزول کی سطح کو گھٹاتی ہے۔
حتیٰ کہ چند منٹ کی خاموشی بھی جسم کو دیگر طریقوں کے مقابلے میں زیادہ سکون دے سکتی ہے۔
جدید زندگی کے شور میں ذہنی سکون کا مؤثر حل
دماغ کو معلومات کو سمجھنے اور نئے خیالات کو ترتیب دینے کے لیے سکون درکار ہوتا ہے۔ خاموشی کے لمحات اسے سیکھے گئے مواد کو محفوظ کرنے، غور و فکر کرنے اور بہتر انداز میں سمجھنے میں مدد دیتے ہیں۔
خاموشی تخلیقی صلاحیتوں کو بھی فروغ دیتی ہے کیونکہ یہ ذہن کو شور سے دور کر کے پرسکون بناتی ہے، اور جب ذہن خاموش ہوتا ہے تو نئے خیالات آسانی سے جنم لیتے ہیں۔
مزید یہ کہ خاموشی جدید زندگی کے شور میں توجہ بڑھانے میں مدد دیتی ہے۔ جب انسان خود کو خلفشار سے دور کرتا ہے تو اس کی توجہ اور کارکردگی بہتر ہو جاتی ہے۔
دو منٹ کی خاموشی اور بلڈ پریشر
بلند فشار خون، جسے اکثر ’خاموش قاتل‘ کہا جاتا ہے، خاموشی کے ذریعے کم کیا جا سکتا ہے۔ ایک تحقیق کے مطابق صرف دو منٹ کی خاموشی بلڈ پریشر کو نمایاں طور پر کم کر سکتی ہے، اور اس کا اثر پرسکون موسیقی سننے سے بھی زیادہ مؤثر پایا گیا۔
مزید یہ کہ شور والی جگہیں دل کی دھڑکن اور بلڈ پریشر میں اضافے کا سبب بنتی ہیں۔
خاموشی کو عادت کیسے بنائیں؟
ماہرین مشورہ دیتے ہیں کہ روزانہ کچھ وقت ایسا نکالا جائے جب آپ مکمل طور پر خلل سے آزاد ہوں۔
اس دوران کسی پرسکون اور آرام دہ جگہ پر بیٹھیں، صبح کا وقت یا سونے سے پہلے کا وقت اس کے لیے بہترین ہوتا ہے۔
ٹیکنالوجی کے شور سے وقفہ لیں اور ہر خالی لمحہ ٹی وی یا ویڈیوز سے بھرنے سے گریز کریں۔ سفر کے دوران خاموشی اختیار کریں، موسیقی بند کر دیں اور اپنے دن پر غور کریں۔
اگر آپ جہاز یا ٹرین میں ہوں تو شور کم کرنے والی ہیڈفونز استعمال کریں، آنکھیں بند کریں اور اپنی سانسوں پر توجہ دیں۔
گھر کے کام جیسے صفائی یا کھانا پکانے کے دوران موسیقی کے بجائے خاموشی اپنائیں تاکہ ذہن کو سکون ملے اور آپ اپنے احساسات سے جڑ سکیں۔
اگر آپ اکیلے کھانا کھاتے ہیں تو موبائل یا ویڈیوز سے خود کو دور رکھیں اور سکون سے کھانے کا لطف اٹھائیں، اس سے باخبر انداز میں کھانے کی عادت پیدا ہوتی ہے۔
اسی طرح آپ ساحل یا پارک میں بیٹھ کر قدرتی آوازوں کو سن سکتے ہیں، جو ذہنی سکون میں مزید اضافہ کرتی ہیں۔