امریکی صدر ڈونلڈ ٹرمپ نے اعتراف کیا ہے کہ ایران نے چند روز قبل امریکی طیارہ بردار بحری جہاز کو نشانہ بناتے ہوئے وسیع حملہ کیا، جو 17 مختلف سمتوں سے کیا گیا۔
میامی میں ایک سرمایہ کاری فورم سے خطاب کرتے ہوئے ٹرمپ نے بتایا کہ تقریباً 101 میزائل اس جہاز کی جانب داغے گئے، جسے انہوں نے ’انتہائی قیمتی ہدف‘ اور دنیا کا سب سے بڑا طیارہ بردار جہاز قرار دیا۔
سبق ویب سائٹ کے مطابق انہوں نے مزید کہا کہ حملہ اچانک اور شدید نوعیت کا تھا، جس کے باعث افواج کو فوری طور پر حرکت میں آنا پڑا تاکہ خطرے سے بچا جا سکے تاہم انہوں نے نقصان یا جانی نقصان سے متعلق کوئی تفصیلات فراہم نہیں کیں۔
ٹرمپ نے نہ تو اس طیارہ بردار جہاز کا نام بتایا اور نہ ہی حملے کے وقت یا مقام کی وضاحت کی، جس کے باعث اس واقعے کی مزید تفصیلات تاحال غیر واضح ہیں۔
یہ بیان ایسے وقت میں سامنے آیا ہے جب امریکہ اور ایران کے درمیان کشیدگی میں اضافہ ہو رہا ہے اور خطے میں فوجی صورتحال مزید پیچیدہ ہوتی جا رہی ہے۔