بحرین کی دفاعی افواج کی جنرل کمان نے اعلان کیا ہے کہ اس کے فضائی دفاعی نظاموں نے ایرانی جارحانہ حملوں کا مؤثر طور پر مقابلہ کیا اور 45 میزائلوں اور 9 ڈرون طیاروں کو تباہ کر کے گرا دیا، جن میں ’شاہد 136‘ طرز کے ڈرون بھی شامل تھے۔
ایران، امریکہ جنگ: تمام خبریں ایک جگہ پر، کلک کریں
سبق ویب سائٹ کے مطابق جنرل کمان نے تصدیق کی کہ اس کے دفاعی نظام ہر قسم کے خطرات سے نمٹنے کے لیے مکمل تیاری اور اعلیٰ ترین سطح کی چوکسی پر موجود ہیں تاکہ وطن کی سلامتی کو یقینی بنایا جا سکے۔
مزید وضاحت کی گئی کہ متعلقہ فیلڈ ٹیمیں حملوں کی جگہوں کو محفوظ بنانے کے اقدامات جاری رکھے ہوئے ہیں تاکہ شہریوں اور مقیم افراد کی حفاظت یقینی بنائی جا سکے۔
کمان نے زور دیا کہ اس کے اہلکاروں کی مستعدی اور تیاری مملکتِ بحرین کے امن و استحکام کو نشانہ بنانے والی کسی بھی جارحیت کو ناکام بنانے کی صلاحیت رکھتی ہے۔
جنرل کمان نے عوام سے اپیل کی ہے کہ وہ انتہائی احتیاط اور ہوشیاری کا مظاہرہ کریں، گھروں میں رہیں اور اشد ضرورت کے بغیر باہر نہ نکلیں، اپنی سلامتی کے پیشِ نظر ہدایات پر عمل کریں، افواہوں یا غیر مصدقہ خبروں کے پھیلاؤ سے گریز کریں، معلومات صرف سرکاری ذرائع سے حاصل کریں اور حملوں کے مقامات سے دور رہیں۔