تزکیۂ نفس محض برائیوں سے بچنے کا نام نہیں بلکہ اپنے کردار کو سنوارنے اور نیکیوں کو فروغ دینے کا مسلسل عمل ہے۔
قرآن و حدیث کی روشنی میں جانئے کہ نفسِ امارہ اور نفسِ مطمئنہ میں کیا فرق ہے اور حقیقی کامیابی کیسے حاصل کی جا سکتی ہے۔
عربی زبان میں تزکیہ کے لغوی معنی ہیں کسی چیز کو صاف ستھرا بنانا اور اس کو نشوونما دے کر پروان چڑھانا۔
ایک اور اصطلاح میں تزکیہ کا مطلب یہ ہے کہ اپنے آپ کو غلط رجحانات، میلانات اور اعمال سے ہٹا کر نیکی اور تقویٰ کی راہ پر ڈالنا۔
تزکیۂ نفس درجِ ذیل طریقے سے کر سکتے ہیں:
اپنا محاسبہ کر کے دیکھنا کہ ہم میں کیا کیا خرابیاں اور برائیاں ہیں اور انہیں دور کرنا۔
اپنا محاسبہ کر کے دیکھنا کہ ہم میں کون سی اچھائیاں نہیں اور اس کے لئے کوشش کر کے اسے اپنے اندر پیدا کرنا۔
مزید پڑھیں
اب جو شخص اپنے نفس کا تزکیہ چاہے گا وہ ان اعمال کا جائزہ لے گا جن سے برائیاں اس سے دور ہوں اور اچھائیوں کا اس میں اضافہ ہو گا، اگر وہ ایسا نہ کر سکے تو اس میں بھی کامیاب نہیں ہوگا۔
انسانی نفس ان اعمال کو بے فائدہ اور لاحاصل سمجھتا ہے جس کے فوائد اس کے ذہن نشین نہ ہوں، اس لئے تزکیۂ نفس کا خیال اسی کے دل میں آسکتا ہے جو یہ سمجھ لے کہ برائیاں میرے لئے ہلاکت خیز اور اچھائیاں
فائدہ مند ہیں، اس لئے انسان کو پہلے تو یہ یقین ہو جائے کہ اللہ تعالیٰ نے مجھے جن باتوں سے روکا ہے وہ اس لئے کہ وہ میرے لئے تباہ کن ہیں اور جن باتوں کا حکم دیا ہے وہ مجھے دنیوی اور اخروی سعادتوں سے ہمکنار کرنے والی ہیں۔
سورۃ الشمس میں اللہ تعالیٰ کا ارشاد ہے:
’یقیناً کامیاب ہوا وہ جس نے نفس کا تزکیہ کیا اور برباد ہوا وہ جس نے اسے دبا دیا۔‘ (الشمس: 9، 10)
نفس کا تزکیہ کرنے اور دبا دینے کی تشریح یوں ہے کہ تزکیہ کا مطلب ہے پاک کرنا، ابھارنا اور نشوونما دینا یعنی جو اپنے نفس کو فسق و فجور سے پاک کر دے، اس کو ابھار کر تقویٰ اور بلندی پر لے جائے اور اس کے اندر بھلائی کو نشوونما دے وہ فلاح پائے۔
آیتِ مبارکہ میں ’’دَسَّاهَا‘‘ ہے جس کا مطلب دبا دینے کے ہیں۔
وہ یہ کہ نامراد ہوا وہ شخص جو اپنے نفس میں نیکی کے جذبات کو ابھارنے کی بجائے اس کو دبا دے اور برائی کے رجحانات کو اتنا غالب کر دے کہ تقویٰ اور نیکیاں اس کے نیچے چھپ جائیں جیسا کہ مٹی کے نیچے لاش دبا دی جائے۔
ہمارے نفس میں دونوں قسم کی خواہشات دبی ہوئی ہیں۔ نیکی اور برائی۔
برے نفس کو نفسِ امارہ کہتے ہیں جبکہ نیک نفس کو نفسِ مطمئنہ اور جس نے نیک جذبات کو غالب کیا اس نے نفس کا تزکیہ کیا اور کامیاب ہوا۔
حضرت زید بن ارقمؓ بیان کرتے ہیں کہ حضور اکرم ﷺ یہ دعا مانگا کرتے تھے:
’اے اللہ! میرے نفس کو اس کا تقویٰ عطا کر اور اس کا تزکیہ کر، تو ہی بہتر ہستی ہے جو اس کا تزکیہ کر سکتی ہے، تو ہی اس کا سرپرست اور مولا ہے۔‘
تزکیۂ نفس کا اصل مطلب یہ ہے کہ انسان عملاً اپنے آپ کو برائیوں سے پاک کرنے اور اچھائیوں سے مزین کرنے کا کام شروع کر دے اور اس سلسلے میں پہلا قدم یہ ہے کہ اچھائیوں سے الفت اور برائیوں سے نفرت پیدا ہو۔
نیکی کی کروڑوں تعریفیں کرنے سے بھی انسان کا نفس پاک نہیں ہوتا جب تک نیکی کو عملاً اختیار نہ کرے اور اس طرح وہ اجتماعی دکھ بھی دور نہیں ہوتے جن کا منبع گناہ ہے۔